حسين معوض يكتب: أنا الشعب.. لا أعرف المستحيل

أنا الشعب لا اعرف المستحيل.. أنا اللى بغير العناوين اسكنك قصر وارجعك زنازين.. أنا قيمتك وهيبتك وخيبتك

أنا الشعب أنا الشعب.. لا أعرف المستحيل، أنا الشعب قادر على التغيير، وطول ما دم المصرى رخيص يسقط يسقط أى رئيس..

أنا الشعب العامل.. أنا الشعب العاطل.. أنا الشعب بدبورة ونسر وكاب.. أنا الشعب صاحب الصوت العالى.. الرأى رأيى والكلمة كلمتى.

أنا اللى هتفت واحتجيت، أنا اللى نمت على الرصيف عند فى الظالم، فى الإرهابى، فى الجاهل، فى المتكبر.

أنا اللى مشيت فى المسيرة، أنا اللى صبرت على اللى خان واللى باع واللى قتل وحرق.

أنا الشعب لا أموت.. أنا الشعب اللى نزل من البيوت، أنا اللى واقف على باب الجنة يا ادخلها يأما أعيش حياة حرة.

أنا الشعب صوته مش عورة، وكلمته حرة، وجتته مش عزيزة على بلده، ولا عينه أغلى من نورها.

أنا الشعب فى الميدان.. كل ميدان.. أنا الشعب فى الشارع.. أنا اللى بيصلى فى الكنيسة وفى الجامع، أنا بنت وولد.. وبينا أمل، أنا الغزل العفيف، أنا الأمل والحلم، أنا صاحب الحكم.

أنا الراجل الكبير ما هدنيش الزمن، أنا ست البيت أم الولاد والبنات، أنا الجدة اللى ما تنساش العلم.

أنا اللى بحميك من ضلالك، أنا اللى بغفرلك نسيانك، أنا التاريخ يا غافل، أنا الجغرافيا اللى بتلمك، أنا همك ودمك.

أنا الشعب لا اعرف المستحيل.. أنا اللى بغير العناوين اسكنك قصر وارجعك زنازين، أنا قيمتك وهيبتك وخيبتك.

أنا الأبطال فى الحرب، أنا الارض والعرض، أنا الشباب اللى زى الورد اللى ماتوا واللى مستنيين دورهم.

أنا الثورة فى وش الظلم.. أنا اللى بنزع العنف من قلبك، أنا اللى بمسح الخوف عن عنيك، شد حيلك وحيلتك، سيب همومك عليا، كل الهموم فى قلبى أنا، كل همكم واحد، وربكم واحد، وحلمكم واحد، وأنا متهمنيش تفاصيل.

أنا فى رابعة وفى الجيزة، أنا فى التحرير والاتحادية والقبة والمنصورة والمحلة وطنطا والإسكندرية واسيوط وسوهاج وبنى سويف والفيوم ودمياط والغردقة، أنا فى كل مصر، فى كل عصر، فى كل اتجاه، أنا الحاكم والمحكوم، أنا الظلم والظالم، أنا المظلوم والثائر، أنا الشعب، أنا واحد وانتم متفرقين، أنا الملايين.

أنا الهتاف على لسانكم، أنا حلمكم، أنا بكرة وامبارح، أنا النهاردة وكل لحظاتكم.

أنا اللى بينكم، أنا اللى ببنيلكم، أنا نيلكم، أنا غيط العنب، أنا زهرة القطن اللى ما بتموتش، أنا التراب والسما، أنا النجوم والغنا.

أنا الشعب أنا الشعب.. لا أعرف المستحيلا.. أنا الشعب وبقولك استنى ما تستعجلش.. استنى ما تندمش.. استنى ما تهربش.. استنى اللى جاى كتير.. ويوم ما تفقد الايمان أنا إيمانى ما بيتهز..

أنا الجبل والخضرا، أنا الطين والغبرة، أنا التراب والصحرا، أنا بيتك وعنوانك.. عنوانك ما بيتوهش.

أنا الشعب أنا الشعب.. أنا الملايين السارحة ورا قوتها.. وحواديتها ما بتخلص.. أنا العزيمة اللى فى عروقك، أنا العند اللى فى دماغك، أنا صورتك وصوتك، أنا اللى نصرتك وعزيتك.

أنا جواز سفرك.. أنا وطنك

أنا الشعب أنا الشعب.. أنا انت.