نصائح ممتازة لتخفيض استهلاك الوقود

وسأقوم الأن بعرض هذه النقاط السابق ذكرها في الجزء الأول من الموضوع او الأصدار السابق من الموضوع بعد تعديلها وأضافة بعض النقاط الأخري والتي عثرت عليها من خلال بحثي في الأنترنت من بعض المواقع والصفحات الألكترونية.

1- ارفع رجلك من علي البنزين

علي قد ماتقدر ارفع رجلك من علي دواسة البنزين وسيب العربية تمشي لوحدها، ودة عن تجربة هيقلل جداً الأستهلاك لأن عدم الضغط علي الدواسة (بالزات في العربيات الأنجيكشن) دة معناه ان الكنترول هيوقف الأمداد بالوقود – يعني هتقطع اطول مسافة ممكنة بدون ولا نقطة بنزين

يعني لو انت داخل علي اشارة وشايفها قافلة شيل رجلك من علي البنزين بمسافة كافية لأنك كدة كدة هتوقف
لو عارف ان في مطب في المكان الفلاني شيل رجلك من علي البنزين بمسافة كافية وليكن 500 متر وسيب العربية ماشية براحتها
لو الطريق منحدر وانت مش مستعجل اوي شيل رجلك من علي البنزين وسيب العربية تمشي بقصورها الذاتي
2- ريح العربية في الغيارات

حاول ماتحرقش علي الغيار وانقل علي الغيار الأعلي بحد اقصي علي 2.5 rpm ولو عايز تريحها خالص يستحسن تنقل علي 2 rpm وانا شخصيا بنقل علي 2 ولو بحرق بوصل 2.5 بحد اقصي
3- اغلق زجاج جميع الأبواب

حاول تقفل جميع شبابيك العربية وانت ماشي ودة هيقلل بدوره مقاومة العربية للهواء وهيوفر معاك في البنزين علي المدي الطويل لو بتسافر او بتمشي مسافات طويلة علي الدائري
4- قلل المسافات قدر المستطاع

حاول تقلل المسافات المقطوعة بالعربية قدر المستطاع ، يعني لو بأمكانك تمشي في شارع موازي للشارع الي انت رايحه وتدخل في شارع مقابل لليو ترن عشان تقلل المسافات الي هتهدرها في الرايح والجاي يكون دة افضل
مثال : لو انت عايز تروح مكان محدد في شارع الطيران وانت ماشي في شارع يوسف عباس حاول تدخل في الشارع الصح الي مقابل لليو ترن عشان ماتمشيش مسافة مالهاش لازمة وهترجعها تاني لما تلف

5- تجنب المطالع

لو المكان الي انت رايحه عارف ان الطريق بتاعه فيه مطالع حاول تمشي في طريق تاني معتدل
مثال : انا شخصيا لو رايح 6 اكتوبر بروح من طريق الواحات لأن الطريق معتدل نوعا ما لكن لو روحت عن طريق مصر – اسكندرية الصحراوي تقريبا همشي المسافة كلها مطالع

6- بنفس المنطق دور علي المنازل

بنفس المنطق السابق حاول تختار طريق انت عارف انه منزل او منحدر
مثال : لو انت راجع من اكتوبر ورايح الهرم حاول تمشي طريق المحور ثم مصر – اسكندرية الصحراوي لأن تقريبا هتستهلك ربع البنزين فقط لو طبقت النصيحة الأولي وهي انك ترفع رجلك من علي دواسة البنزين وتسيبها علي الله.

7- بطل في الأشارات

العربية بتستهلك بنزين كتير جدا في الأشارات

لو انت اغلب مشيك جوة البلد اصبح معظم الأشارات دلوقتي الكترونية وفيها عداد بيقولك هتفتح امتي ودة هيديلك وقت مناسب جدا انك تبطل العربية وترجع تدورها قبل الأشارة ماتفتح ودة هيوفر معاك بنزين لو بتمشي جوة البلد كتير.
بس بشرط : ان يكون معاك الوقت الكافي بحد أدني 50 ثانية. لأنه ثبت عملياً ان ابطال المحرك وأدارته في وقت بسيط بيزيد من استهلاك الوقود ويقلل من عمر أجهزة الأدارة والمحرك عموماً.

8- خفض السرعات

تقريبا معظم العربيات سواء كربراتير او انجيكشن بتستهلك مرة ونص لما بتتخطي سرعة 96 كم/ ساعة

فحاول علي قد ما تقدر ماتمشيش بسرعة اعلي من 90 منها عشان الرادار ومنها هتوفر في البنزين كتير
9- خفف من وزن العربية

لو قدرت تفضي شنطة العربية من الأشياء عديمة القيمة في الوقت الحالي هتوفر كتير من بنزين العربية لأن عزم الطلعة من اكتر الأوقات الي العربية بتستهلك فيها بنزين عن غيره من الأوقات

10 – لا تطيل من وقت تسخين المحرك (خاص بمحركات الأنجيكشن)

يكفي فقط 30 ثانية من وقت أدارة المحرك لتكتمل عملية تزيت جميع اجزاءه، وإلي ان يصل المحرك لحرارة تشغيله المثالية (درجة حرارة فتح ثرموستات الكوعة) يكون السير علي سرعات منخفضة. وبعدها تستطيع الأنطلاق بسرعات اعلي

11- مون بليل وانت اولي بالفرق

معروف ان الحرارة بتمدد الغازات ودة بيخلي الطرمبة بتاعة المحطة معيارها يختلف عن البنزين الحقيقي الي بينزل
يعني لو مونت بليل 20 لتر يمكن فعلا تحط في العربية 20 لتر
لكن لو مونت الصبح 20 لتر يمكن فعلا يتحط في العربية 19 لتر
وفي سبب علمي اخر لنفس النقطة وهو ظاهرة التطاير ونسبة البخر والتي ترتفع مع ارتفاع درجة الحرارة وتنخفض بأنخفاض درجة الحرارة اي انها متناسبة طردياً مع درجة الحرارة.

12 – اضبط الموتور وغير البوجيهات ونظف الكربراتير او البوابة والرشاشات

لو ضبطت موتورك وعملت السيرفيس بتاع عربيتك يمكن يكلفك اقل من تكلفة البنزين الي مش موجود اصلا

13- اضبط ضغط الأطارات

الكاوتش لو مريح شوية بيزيد من احتكاكه بالأسفلت وبالتالي بيزود استهلاك البنزين

14- قلل من استخدامك للعربية قدر المستطاع

لو هتنزل تشتري حاجة ينفع تشيلها علي ايدك فمفيش داعي من استخدام العربية
منها تمشي رجلك شوية ومنها ماتسخنش وتستهلك ومنها ماتمشيش بيها وتستهلك
ولو تقدر تروح شغلك مواصلات يبقي بردو خير وبركة

15- خليك دايماً مفول

معلومة عرفتها مؤخراً وبعد التجربة ثبتت معايا صحتها. وهي ان كلما ازدادت كمية الهواء داخل تانك البنزين – كلما زادت نسبة البخر للبنزين -
ولو حضرتك عايز تجربها لأثبات صحة هذا الأفتراض أملأ تانك البنزين لأخره (فوول) وبعد اول ربع اعد الملأ مرة اخري واحسب كمية الأستهلاك ثم اعد ملأه مرة اخري عند مستوي ربعين (عند نص التانك) واحسب الأستهلاك مرة اخري – ستجد ان استهلاك الربع الأول اقل من استهلاك الربع التاني.

ولهذه الملاحظة جانب نفعي أخر للسيارات التي توجد طرمبة البنزين داخل التانك – فأن البنزين يكون بمثابة مبرد للطرمبة يعمل علي تبريدها لتعمل بكفاءة أكثر ويطيل من عمرها الأفتراضي.

16- مش لازم تشحن البطارية قبل ما تنام

عادة سيئة اكتسبها المصريين من الصنايعية والمهنيين – وهي الأعتقاد ان قبل اطفاء المحرك يجب الضغط علي دواسة البنزين مرة او اتنين او أكثر لشحن البطارية – رغم انك للتو قطعت مسافة بالسيارة تكفي لشحن البطارية ، فلا داعي من هذا الفعل حيث انك تزيد من الأستهلاك ولا تستفيد في المقابل بشحن البطارية كما تتصور.

17- نقي الشارع اللي هتمشي فيه

اصبح اليوم معظم شوارع مصر الداخلية مسفلتة (حتي لو مش قد كدة) ولذلك حاول ان تسلكها عوضاً عن السير في شوارع غير ممهدة او وعرة حيث ان وعورة الطريق تؤثر بالسلب علي استهلاك الوقود وتزيده بنسبة تصل الي 30%.

18- ماتحملش اوي وانت مسافر

حاول تقليل عدد الشنط قدر المستطاع اثناء السفر بحيث لا تتعدي مساحة شنطة السيارة مما يضطرك لوضعها فوق سطح السيارة. فوضعها بتلك الطريقة يزيد من مقاومة الهواء وبالتالي ارتفاع نسبة الأستهلاك. فيكفي انها وزن زائد يزيد من الأستهلاك في حد ذاته فلا تجمع علي نفسك تأثير سلبي اخر بجانب التأثير الأول يكفي عليك وزنها فلا تجعلها وزن زائد وعائق للهواء في نفس الوقت. (راجع النقطة 9- خفف وزن السيارة)

19- استخدم انسب بنزين لعربيتك

معروف ان لكل محرك نسبة انضغاط وبناء علي هذه النسبة يتحدد الرقم الأوكتيني للبنزين، فاستخدامك للبنزين ذو الرقم الأوكتيني المناسب يضمن لك تحقيق انسب قدر من استهلاك الوقود. فقد يكون استخدامك لبنزين ذو رقم اوكتيني اعلي (اغلي) اوفر لك من استخدام بنزين ذو رقم اوكتيني اقل (ارخص) والعبرة بعدد اللترات المستهلك مقابل عدد الكيلومترات المقطوعة.
انا شخصيا سيارتي نسبة انضغاط محركها 1:10.2 مما يعني استخدام بنزين 92 او اعلي ومكتوب علي غطاء تانك البنزين ينصح باستخدام بنزين 95 وعند تجربة هذين النوعين اكتشفت تقارب شديد في استهلاك السيارة حيث ان استخدام بنزين 95 جعلها تقتطع مسافة معينة بعدد اقل من لترات البنزين عند قطع نفس المسافة باستخدام بنزين 92 بعدد لترات اكثر.

نصائح اخري لم تجرب ولا اعرف حتي كيف تجرب ولكن سأنقلها من باب الأمانة فقد تفيد البعض

1- قلل معدل ضخ البنزين اثناء التزود بالوقود – فزيادة معدل الضخ يزيد من نسبة البخر اثناء التزود بالوقود (قد يكون لمسدس الضخ سرعات – وعند استخدام السرعة القصوي تزداد معه نسبة البخر)
2- الأسراف في تشغيل مكيف الهواء داخل السيارة يزيد من استهلاك الوقود (لم اشعر بها في سيارتي فتشغيل المكيف لا يؤثر عندي في الأستهلاك او قد لا اشعر انا بهذا)
3- لا تملء خزان الوقود اثناء اعادة ملء المحطة بالوقود من شاحنات نقل الوقود لأن ذلك يزيد من معامل البخر ويحرك الشوائب والترسبات لتدخل الي تانك سيارتك – اعتقد ان معظم المحطات في مصر بتغلق اثناء تزودها بالوقود ولا تسمح لقائدي المركبات بالدخول اثناء عملية التفريغ لدواعي الأمن والسلامة.