احمد شوبير يكتب : الحائرون !!

فى نهاية المقال السابق ومع الحيرة التى انتابت الجميع مع من يسيرون وإلى أى اتجاه يذهبون بعد أن كفرّهم الجميع بالجميع، فعبدالناصر لم يكن زعيماً والسادات أبداً لم يكن وطنياً ومبارك كان ديكتاتوراً ظالماً وتوقفنا عند الإخوان المسلمين وأنهم الملاذ الآمن لمصر وشعبها بل وللأمة العربية، فقد جاءت النصيحة للشباب بل والكبار بأن يتجهوا فوراً إلى الإخوان، ولما سأل الشباب واشمعنى الإخوان؟ جاء الرد سريعاً يا ابنى دى أهم حركة وطنية فى تاريخ مصر تاريخ ناصع البياض كفاح عن الأمة العربية وقضية فلسطين فى قلوبهم.. الفقراء هم أحبابهم، الدين هو ملاذهم لا يريدون شيئاً من الحياة سوى الرضا وإسعاد الناس لا يبحثون عن منصب أو سلطة كل ما يحلمون به أن يروا الشعب المصرى سعيداً والشعب الفلسطينى أكثر سعادة، مكثوا سنوات طويلة فى السجون والمعتقلات ومع ذلك لم ييئسوا، ظلوا على صمودهم لرفع الظلم عن الشعب المصرى، تصدوا فى عز الازمات والديكتاتورية لحسنى مبارك وقبله السادات وطبعاً عبدالناصر قتل منهم من قتل وشنق منهم من شنق ومع ذلك لم يتخلوا عن القضية.. وراءهم فصيل كبير من الشعب المصرى يؤيدهم ويقف خلفهم.. لديهم مشروع نهضة واضح لمصر كلها يحمل الخير للناس جميعاً.. يا ابنى لا تتردد الإخوان هم الحل.. وهنا همّ الشاب بالانصراف لأنه أخيراً وجد الحل فى الإخوان ولكنه سمع صوتاً عالياً يصرخ: يا ابنى إخوان إيه وبتاع إيه انت مش شايف اللى بيحصل فينا من يوم ما تولوا الحكم أزمات ومشاكل ومظاهرات وانقطاع كهرباء، ونقص حاد فى السولار، ارتفاع مذهل فى الأسعار، ضياع الأمن من كل البلد، البلطجية اللى كانوا بيقولوا دول صناعة مبارك عددهم زاد عشرات المرات فى عهدهم تزوير انتخابات.. انت ناسى يا ابنى البطاقات المزورة بتاعة المطابع الأميرية اللى لقوها فى انتخابات الرئاسة.. انت ناسى يا ابنى الموظفين اللى كانوا فى الاستفتاء وعاملين نفسهم قضاة ومستشارين.. إنت ناسى يا ابنى أن مجلس الشورى فجأة أصبح اسمه مجلس الشعب وهو اللى بيشرع وبيعمل كل حاجة ومفيش فيه أى معارضين، انت مش شايف البلد ماشية إزاى كل يوم قرار ويرجعوا فيه انت مش شايف يا بنى مذبحة القضاة الجديدة، والا أنت مش شايف بيعملوا إيه فى الإعلام اللى فجأة أصبح فاسد، يا ابنى هى الناس عارفة تعيش دى الأسعار نار والقطارات وقفت عن الشغل ومترو الأنفاق أصبح تقريباً يومياً فى مشاكل، وهو انت مش شايف المرور عامل إزاى علشان تروح مشوار كان بياخد ربع ساعة دلوقتى على الأقل تاخد يجى ساعتين أو أكثر، شايف يا ابنى عدم تنفيذ أحكام القضاء وامتهان كرامته، وهو انت شفت مشروع النهضة اللى قالوا عليه حسيت منه حاجة ده احنا يا ولداه رايحين لكل بلاد الدنيا نستلف فلوس من اللى يسوى واللى ما يسواش وانت مش فاكر ان قرض صندوق النقد الدولى أيام الجنزورى لما كان حرام دلوقتى بنجرى وراهم وبنبوس إيديهم وطبعاً رافضين علشان عايزين يغلوا البنزين والجاز والسكر والزيت والعيش يعنى نموت كلنا ولا إيه يا ابنى سيبك من الكلام ده وروح للى يستاهل.. يعنى أروح فين.. طبعاً مافيش غير جبهة الإنقاذ.. اشمعنى.. هى دى محتاجة كلام ناس وطنيين عندك البرادعى مفجر الثورة المصرية الراجل الوحيد اللى قال «لأ» فى عز جبروت نظام مبارك راجل وطنى من الدرجة الأولى طبعاً أكيد بتشوف حمدين صباحى هذا الوطنى الناصرى الرائع المنحاز للفقراء اللى بيمشى فى الشارع وهو مش خايف بسبب حب الناس ليه يا راجل ده واحد مننا واحد زينا بيحس بينا ونحس بيه ولا عمرو موسى احسن وزير خارجية فى تاريخ مصر واللى حسنى مبارك شالوا لما شعبان عبدالرحيم غنى له أنا باحب عمرو موسى وباكره اسرائيل وبتشوف كلامه زعيم وطنى بجد رئيس جمهورية ملو هدومه، يا ابنى متفكرش عليك وعلى جبهة الانقاذ لأنها آخر أمل حقيقى لمصر.. إذن خلاص نتوكل على الله على جبهة الانقاذ.. يا ابنى انقاذ مين وبتاع مين انت بتصدق الكلام الفارغ وأنت صحيح ان البرادعى راجل وطنى ومخلص ده صناعة أمريكية 100٪ مش ده برده الراجل اللى ضرب العراق، مش ده الراجل اللى كل ما يكون فى حاجة كبيرة فى مصر يكون مسافر، مش ده الراجل اللى ضربوه يوم انتخابات الرئاسة، يا راجل عيب لما تقولوا إنه راجل وطنى بجد ولا حمدين صباحى اللى عاملينه زعيم.. على إيه.. ده راجل كل اللى عنده كلمتين حافظهم من زمان يفضل يقولهم فى كل مكان وعامل فيها ناصرى ومجاهد من أجل الفقراء وهو بيلبس أشيك وأجمل بدل فى العالم وعربيات فاخرة ناهيك إنه حتى فى بلده بلطيم لما حصلت مشكلة صغيرة بين قريتين هرب وسافر تركيا وبعد كده عايزنى أمشى وراه ويبقى رئيس جمهورية حرام عليكو دى مصر كبيرة قوى وكمان سيبك من عمرو موسى ده أولاً راجل داخل على 80 سنة وبعد كده مش صاحب أمريكا واسرائيل واللى كان موجود معاهم دايماً فى المؤتمرات ولم نسمع منه ولو مرة واحدة كلمة نقد ليهم وبأمارة إيه يبقى رئيس جمهورية مش ده اللى بعد وزارة الخارجية قعد سنين طويلة فى الجامعة العربية وبعدين مش لما قبض 5 ملايين دولار مكافأة نهاية الخدمة كل دول يا ابنى ما ينفعوش.. وهنا صرخ الشاب: جننتونى كفرتونى أروح لمين أروح فين مافيش حد نافع فى مصر مين الصح ومين الغلط أرمى نفسى فى النيل.. أقطع طريق.. أعطل القطارات.. صندوق الانتخابات مش نافع كله بالسكر والزيت.. حمدين صباحى لا.. عبدالناصر لا.. السادات لا.. مبارك لا.. الإخوان لا أمال مين!! آه يا بلد.