صنف تقيل

سلام جميل على فضفضة والأستاذة نيفين وسلام لكل أصدقائنا ،
يا جماعة انا متجوز من 11 سنة وطبعا مش محتاجين لشرح أقول فيه حالتي لكن انا في مرحلة دلوقتي غريبة شوية مش هقول مراهقة متأخرة لأني كرهت الصنف كله ( مع انه صنف لذيذ بس من بعيد لبعيد ) ولا يمكن أكرر المصيبة كمان مرة .. حياتي دلوقتي بتمر بحالة اللاحرب واللاسلم وملل ابن كلب مالوش حل وعندي رغبة ملحة في الطلاق حتى لو مفيش مشاكل كبيرة لكن مشتاق بطريقة فظيعة للحياة لوحدي أعيش من تاني الخصوصية اللي الواحد اتحرم منها سنين طويلة ومجرد ما الواحد يدخل البيت ما يلاقيش فيه مخلوق أيا كان عامل إزعاج ولا هادي لكن الفكرة بتلح فعلا وأنا من الواضح اني محتاج اعمل كدة وعلشان محدش يقول خدلك اجازة لوحدك والجو ده انا عملت كدة وكتير كمان لكن برجع لحالة الكآبة من تاني والبلادة والركود وارجع للروتين والأسئلة المملة بتاعة كل يوم والزيارات الإجبارية والمجاملات الفارغة والزن وهم العيشة .. بجد .. المسئولية الزيادة عن اللزوم قطمت ضهري وعجزتني بدري ودة مش معناه اني مش عايز أشيل مسئولية لا بالعكس ما انا شايلها العمر اللي فات لكن طهقت وقرفت حاسس اني مش عارف أعيش لنفسي ومش عارف اعمل ابسط الأشياء على مزاجي وحتى لو مش عايز اعمل حاجة خالص كفاية ان الواحد يقعد مفضي الجمجمة وعايش الفراغ .. بجد انا لقيت في الموضوع ده خلاص من هموم كتيرة وخصوصا في الوقت اللي كلنا بنعيش فيه الهم الكبير بتاع بلدنا مصر .. مش عارف اعمل ايه ومش قادر اظلم أهل بيتي معايا لكن انا متأكد لو فضلت على الحال ده هبدا أبقى إنسان تاني بسلوكيات صعب حد يستحملها .. أسف شيلتكم الهم لكن قلت افضفض .
سليم
Fadfada@elfagr.org