رباب أنور تكتب معادلة صعبة

معادلة صعبة في حبك يا مصر حيرت عُلما و أساتذة عقدت طلبة و تلامذة
عالقهوة لما غنالها حمزة ( طعم الوطن ) لقيته ( مُر )
( كيميا ) هي و لا ( جبر ) ؟؟؟
في المعادلة طرف ( سالب ) حقوقنا و لقوتنا ناهب
يا ( بختنا ) ننام كل ليلة ( مغلوبين ) و يبات هو ( غالب )

طرف تاني ( بموجب ) ( الصندوق ) لقيناه للموجة راكب
ساب الفُتات و أخد كل ( النوايب )

و طرف تالت بيقولوا خفي و غايب عن عيونهم لكن عيونا شايفاه سبب المصايب
طرف يسرق و عزيز في أهله يبان ( مربوط ) و ديله سايب و الطبع غالب
لما يغلط ما حدش يلومه
و نام ضميره و متهني في نومه

في المعادلة طرف ( مجهول ) مالوش أمارة
لا هو (موجب) و لا هو (سالب) و جاري البحث عن الإشارة
قلت أحطه مابين ( قوسين )
لقيته أطراف كتير ( مجهولين )

طرف عايش ( اليوم بيومه )
نصبة قهوة و شاي.. عربية كبدة و سجق .. كرتونة فيها سميط و بيض و جبنة .. جزمجي ( تلمع يابيه ) ؟؟.... سَريح كل حاجة معاه ( ب الجنيه )
أرزقي على كتفه بؤجة و على كتفه التاني شايل همومه ..

طرف من (قروض) (صندوق التنمية ) و (أقساط) التاكسي و الميكروباص باع في الآخر (هدومه)

طرف عشوائي ساكن (العشش الصفيح)
عايش ريشة في مهب الريح
نفسه يتعامل ك ( آدم ) لما ييجي ( لامؤاخذة ) يقضي حاجته يبقى عنده صرف صحي و لما يعطش يلقى حنفية تنزل منها مَيه ( صالحة للأغراض الآدمية )
كل (حلمه) جُدران (تلمه) قبل ما السوس ياكل (عرق خشب) شايل التعريشة إللي (مش) ساتراه هو و مراته و عياله و أمه
و ده أبسط حقوقه الإنسانية ...

طرف نايم تحت (كوبري)
و لما يجوع ياكل م ( الزبالة)
و آخر الليل يتاخد ( تحري )
مسطول و لا فايق مش فارقة معاه أي حالة ...
مفيش بطاقة و ما يعرفش يعني إيه كلمة ( وطن )
كل شيء في حياته (جايز ) أصله عايش ( برة ) الدين و الزمن ....
ما تقسوش عليه حاسبوا ( بلد ) عمالة ( تخلف ) و ترمي في الشوارع
البلد اللي همها مؤشر البورصة نازل و لا طالع
و مستثمر أجنبي ( هرب ) و ما عادش راجع
و عدد الكنايس أكتر و لا عدد الجوامع ؟؟
و زعيق نواب الشعب في المجلس ملا الدنيا و الشعب يصرخ و لا حد سامع

إيييييييييييييييه يا بلد خللي بالك مني مرة و اسمعيني
بحبك و بتكرهيني بضمك و بتبعديني أفك أسرك و تسجنيني أصونك و تشرديني !!!!

لو هو ده العلم بلاها العلام يعني اللي إتعلم ( إتعرف) ؟؟
و لا بعلمه ( إتنصف ) ؟؟
تعب و ذاكر
إتخرج و عافر
و يا ريتهم وظفوه !!
و لما اتعين ( مؤقت ) يا ريتهم ثبتوه !!
و لا حتى ( قَبَضُوه ) !!
و لما قبض ( الملاليم ) رمى نفسه في أول طيارة عالخليج (سافر )

و اللي أمه داعياله في ليلة القدر و ( ثبتوه )
لا حد ( أدنى ) و لا ( أقصى ) في الأجور حددوه ..
يا ( شاطر ) لو كنت ( فاكر ) إن الإمتياز و المرتبة ( هاينفعوك )
و في الكلية ( هايعينوك )!!! إنسى و خَدها ( ابن الإيه )
و مكانك مع ( الطير المهاجر )

خليني جاهل ما بين ( قوسين ) (مجهول )
متعلم و لا جاهل في الآخر هاموت ( مشلول )