بعتب عليك يا وطن

إيه الجديد
لو كان ده حلم بنحلمه
طب يعني إيه
يجي النهار نبعد نغيب
يا حزن ما تفارقنا يوم!!
قاعد يومين
فى الدنيا دى
ومنين يا حزن النور نجيبْ
أمرك عجيب
ساكن قلوبنا في السجون
ونقول عشانك يا وطنّا
الليل يهون
ليه لما نفرح يا وطن
نحضن فرحنا بالنحيبْ
شفتك بتجري يا وطن
بتداري حاجة في العلم
بتخبي إيه؟؟
والشمس مايله للغروبْ
دانا كنت شايلك من زمان
خايف عليك
كان قلبي في السجن البعيد
بيحن ليك
ويقولي مين؟
قلت الغريب
ايه الغريب!!!
ما انا من زمان
عايش غريب
... ..... ....
دانا كنت راسمك
يا وطن
صورة جميلة في الليمان
وف كل ليله مهما كان
اخدك ف حضني
ايام وانا احكيلك كتير
وبايدي ايه !
ما انت الكبير
جنبك ليلاتي يا وطن
بسهر واغني
الليل يعدي
وقلبي لسه بيحضنك
والصبح يشهد كل يوم
على قسوتك
على صرخة تايهه ف دنيتك
ما تقولي مره يا وطن
على فين واخدني؟
.......... .............
عدت سنين
ودفنت احلامي بترابك
يمكن كمان خدني الحنين
ونسيت وقوفي عند بابك
وطلعت من سجن العجايب
واحضنك
وبقيت تغني واسمعك
ولا كنت عارف
فين شبابي من شبابك؟
وكتير على كتافي
اللي دابت برفعك
شايل مصابك
... ......
ضحيت بعمري
عشان تعيش
وتموت عشانك ذكرياتي
وعشان كمان
غيرك ما ليش
غنيت كتير
وانت اللي بتلحن آهاتي
ونسيت ليالي السجن
يمكن يا وطن
تحلى وتكبر امنياتي
وحاجات كتيره
جنب مني بتختفي
وانت اللي بتضيع حاجاتي
وف كل ليله الحلم
يسرق فرحتي
خايف عليك
واتريك بتتربص حياتي
شاهد عليك الحلم
وهمومك ليلاتي
دلوقت يمكن يا وطن
في الاخره تكمل امنياتي
..... ..... .....
يمكن يكون القبر
اوسع من ضفاف النيل
حياتي ودنيتي
يمكن يكون الصبر
ضي ف تربتي
طول السنين
وانا اقول خلاص
بعد الخلاص
الموت يجيني ف سكتي
على كوبري
شاهد يا وطن
آخر مشاهد قصتي
إيه الجديد
ما انا من زمان
عايش غريب
والشمس مهما الصبح ييجى
يا زمن لازم تغيب
كل اللي فات
من قصتي
وف دنيتى
قسمه ونصيب