محمد عبد العزيز يكتب : مسرحية

مسرحية مسرحية .. والحكاية هي هي
العب دورك جد لكن .. جوة حدود المسرحية
خطط واحلم بالتغيير .. مدلي ايدك بالتنوير
و اوجع راسك من التفكير .. و البس و اقلع
و انزل و اطلع .. و اقعد عمرك فى التحرير
لازم توعي ولازم تفهم .. انها لعبة وليها كبير
ماسك كل خيوطها في ايده .. واللعبة خطيرة خيوطها كتير
فمهما تقول ثورتنا قوية .. وعندنا نخبة متنقية
ومطالبنا كلها شرعية .. اياك تنسي انك لسة
جوة حدود المسرحية .. فمسرحية مسرحية
والحكاية هي هي .. العب دورك جد لكن
جوة حدود المسرحية .. قلنا غار ابو دم واقف
و خد معاه اغتت ولية .. شال جماله وخد علاءه
والعصابة المفترية .. و كلهم رايحين في داهية
والف خرارة ورزية .. والسجون راح تملي بيهم
وهيلبسوا مليون قضية .. وراح خلاص زمن النطاعة
والفساد و المحسوبية .. وبلدنا اللي كانت سايبة
وكانت ماشية مهلبية .. فاكرينها ميراث ابوهم
واخدينها مرعي وتكية .. خيرها خلاص راح يبقي لينا
والعيشة هتكون هنية .. والحكم هيبقي في ايدينا
وهنعرف طعم الحرية .. والكل هياخد جزاءه
وكل الروس هتكون سواسية .. تبص تلقي كل حاجة هي هي
نفس السياسة .. نفس الخساسة
نفس اعلام الكدب .. بنفس النجاسة
وبرضو تلقي .. كلب الشرطة لسه بيرعي قطيع البلطجية
واللي يقول ياناس ياهوه .. ياخدوه محاكمة عسكرية
والمجرم هناك سابوه .. وشبابنا مالوهشي دية
ويدور في راسك 100 سؤال و100 قضية
مين اللي هرب .. فين اللي خرب
مين اللي حكم علينا نعيش ضحية
مين اللي سمسر .. فين اللي خنسر
مين اللي لبس شعب مصر السلطانية
ولا حد عارف .. ولا حد شايف
والكل دافس راسه تحت البطانية
ولا حد سامع .. ولا حق راجع
ونفس المشاهد من جوة نفس المسرحية
ياتري
ثورتنا لسة حية .. ولا خنقناها بايدينا
ماشيين طريق النور .. ولا مضحوك علينا
وقاعديين نحدف في التهم
والعجز فينا .. وكأننا ركاب سفينة
تايها مش لاقيلها مينا .. ضايعة جوة بحر عتمة
والهوا من كل حتة .. وكلنا حاسين بكتمة
والموجة شديدة وعفية .. وفي كل لحظة الف صدمة
واحنا
واحد يقولك خد يمينك .. انا شايف هناك مكان
والتاني يقولك ده جاهل .. في الشمال بر الأمان
وانت غافل .. وانت سافل
وانت خاين من زمان .. وانت سلفي
وانت قبطي .. وانت عميل للامريكان
طززززززز فيكم
وكل ده ماكنشي باين .. وانتو واقفين في الميدان
ماكنشي فيه بيننا خاين او عميل او جبان
كان كتفك في كتف اخوك .. نفسك تفديه بروحك
وتحميه من اللي خانوك
اللي باعوك
اللي مصوا دمك ودمه
وبايديهم ضيعوه وضيعوك
واختلفتوا
وقبل ماترسي علي البر افترقتوا
عمركم في يوم ما شفتوا
ان الغنمة التايهة تصبح للديب اجمل هدية
وانها في وسط القطيع عمرها ماتصبح هفية
وناس تقولي اسلامية .. وحبة منكو ليبرالية وعلمانية مهلبية
جاتكوا خيبة من القوية .. جاتكوا خيبة من القوية
وده كوم وأخينا ده كوم .. ماحد يقوله صح النوم
وباينه بقي سمعه تقيل .. مطنش وعامل مش شايف
زي ماكان ابو دم تقيل .. بتقولوا فين دم الشهدا
بيقولك في وزارة وهعمل تعديل
ياخوانا ماتحاسبوا القاتل
دستورنا
اه
دوستورنا مالهوش تبديل
طب قولوا معايا
التعلب فات فات
كل الدستور والنتخابات
وانتو لسه هنا قاعدين .. ياللي ابوكو السقا مات
طب توت توت يارب يموت .. اللي مايفهم معني الموت
معني شهيد
جوة قلوبنا نار بتقيد .. يوم ورا يوم عمالة تزيد
دمعة بتحرق ام واب .. حسرة بتاكل جوة القلب

وجوة عيونكم وصمة عار .. لحد ماناخد يوم بالتار .. يمكن يومها تهدي النار
ويومها نبدأ عهد جديد .. ويومها نبدأ عهد جديد
zizo