آسف ياريس : ضحكتوا على الشعب وخليتم مشكلة اللى مبتخلفش فى"مبارك"

وجهت صفحة أنا آسف ياريس برسالة إلى الثوار تحت عنوان"عارفين ليه مش ثورة" .

وتابعت خلال تغريدة لها صباح اليوم : لأنها أتولدت على كره وعلى حقد وعلى طمع وعلى صراع على السلطة كل واحد كان ليه هدف ومطمع داخلي جواه كان بيدارية بشعار الحرية والعدالة الاجتماعية لكن محدش كلم الراجل الغلبان الفقير اللى لا يفهم فى سياسة ولا ليه فى مظاهرات ولا مليونيات.

وأضافت : عارفين ليه مش ثورة لانكم ضحكتوا ع الشعب ووهمتوه أن مشكلة اللى مبتخلفش فى مبارك واللى رجليه وجعاه فى مبارك واللى راح مشوار وعمل حادثة هو مبارك واللي طلق زوجته السبب مبارك لحد ما خليتوا الناس تنسى ربنا وأن هو اللي بيرزق وهو اللى بيمرض وهو اللى بيشفى وصحتوهم من حلم الملاين والكنوز اللي ناهبها مبارك وانهار العسل واللبن اللي كان منعها مبارك عن الشعب لحد ما صحيوا على كابوس واقعي مرعب لا لاقين أمن ولا أمان ولا شغل ولقمة عيش ولا حتى حرية ولا حتى عدالة.

عارفين ليه مش ثورة لانها خرجت أقذر ما فينا خرجت حقدنا وكرهنا فرقت الصاحب عن صحبة والاخ عن أخوه عارفين ليه مش ثوره لأنها أتبنت على ظلم مش على عدل حاربتوا الفنان اللى عارضكم وقال كلمة حق فى لقمة عيشه وقصفتوا قلم الصحفى اللى حاول يقول كلمة حق وخلتوه فلول وقسمتوا المجمتع يا أما معاكم ويشتم فى مبارك ويبقى ثوري وياما يقول عيب ويبقى حزب وطني وفلول .

عارفين ليه مش ثورة لأنها قسمتنا مش جمعتنا فلول وكنبة واخوانى وليبرالى وناصري بعد ما كنا مصرين .
عارفين ليه مش ثورة لأننا أتفننا فى إهانة "سلطان الله فى الارض" ودخلناه السجن وبنتشفى فيه وفى مرضه وبنحملوا اى حاجة تحصل حتى بعد ما ساب الحكم عارفين ليه مش ثورة لأن الشعب بيقتل فى بعضه علشان نخبه بتحاول تاكل وتقاسم الاخوان فى تورتة مصر.

مختتمة : ها عرفتوا ليه مش ثورة؟