حريم الملاية اللف

سلامو عليكو
أنا راجل بسيط وبشتغل صنعة من بعد ما خلصت جامعة .. طبعا أنا زي غيري من ناس كتير خريجين جامعات وبيشتغلوا صنايعية وغيره ... المهم أنا متجوز من حوالي ست سنين ومن اول جوازي و أنا بشوف بيتي وطلباته وربنا كان موفقني والحمد لله ،،، زوجتي طول عمرها عصبية لكن على نفسها طبعا انما بعد ما فقدت شغلي بسبب إصابة في اليد اليمين اتقلب الحال وبقت عصبيتها علية أنا والعيال والصريخ والزعيق وقلة الادب بقت الكيف الجديد وتسليتها.... اصل الهانم نفسها بالمحسوس كدة تقول اني عاطل ومبقتش اصرف زي الاول .... المشكلة ان كان عندي قرشين محوشهم للعيال وهمة دول اللي بصرف منهم دلوقتي وهية وارثة من أبوها قهوة بلدي وطبعا شغالة ما شاء الله تمام ومن هنا بقى ابتديت اسمع المعايرة والوساخة تبان ،،، لو علية ارمي عليها يمين الطلاق بالتلاتة ولا تسوى بس عيالي ايدي اللي بتوجعني وهية بتعرف تقرص علية ازاي ... واللي زاد بقى انها ابتدت تتجرأ علية قدام الجيران واحنا ساكنين في منطقة شعبي شعبي وانا لية برضك مظهري قدام العالم وف مرة اتهورت رحت سافخها قلم على خلقتها في وسط الشارع راحت بنت المجنونة عاملالي محضر ... الجيران والمعارف الله يكرمهم ادخلو للصلح والموقف هدي لكن اللي في القلب في القلب خلاص هية طلعت مرة واطية منتظرة مني ايه ؟؟! نسيت لما كنت شايلها هية وعيالنا وأول ما ربنا اختبرني في صحتي افترت علية وبتتنطط بفلوس أبوها يلعن ابو اللي جابوها .... أنا عايز اقول صحيح أنا مربوط من عرقوبي بسبب عيالي لكن هيجيلها يوم ومش عارف بصراحة لو طلقتها العيال مصيرهم ايه أنا عندي عيلين ولو خليتها على ذمتي والله ما تستاهل النعمة دي ..... دلوني الله يباركلكم
منصور