العالم كله هيضحك علينا !

السلام عليكم , أصدقاء فضفضة , انا فضلت إمبارح اقرأ كل الرسائل بتاعة فضفضة الخاصة برأي الناس في الإنتخابات ومرسي والواد الرايق ابو لا ليه في ده ولا ده .. بس انا لية رجاء الله يخليكو .. ياريت فعلا لو من خلال فضفضة أو غيرها نحاول نتناقش بجدية في أمور أهم بكتير من فكرة فرض الآراء وفكرة التعصب اللي كان واضح في طريقة البعض ونبعد عن كل الأفكار اللي مش هناخد منها غير الهم والغيظ وتضييع الوقت .. انا بدعو الجميع من هنا اننا نكون ايجابيين شوية .. واللي زعلان من رئاسة الدكتور مرسي أو الفرحان بيه , لا ده يشتم ولا التاني يغيظه .. هوة احنا ليه دايما بنقف على الصغائر .. خلاص الراجل مسك الحكم وده في النهاية قدر الله , دونا بقى حاجات تانية خالص غير اننا نفضل نكيد في بعض , كلنا اخوات سواء اخوان ولا برة الإخوان والإخوة الأفاضل المسيحيين .. هوة احنا مش مصريين ولا ايه , البلد العظيمة دي بتاعتنا كلنا ونتشرف بيها قدام العالم كله , وعشان الشرف يكمل لازم نبدأ نتخلص من وساوس قهرية اسمها تحيز وتعصب لأن بالطريقة دي العالم كله هيضحك علينا والله .. طيب ليه ندي لأعدائنا الفرصة على طبق دهب ؟ .. انا خلصت كلامي وارجو الرسالة تكون وصلت وارجو من الأستاذة نيفين ما تبخلش علية بعرضها .
أحمد الراعي


فضفضة

أستاذ أحمد جازاك الله خيرا على رسالتك .
نيفين حجازي