الإخوان دول أبو الفلول

مساء الخير أستاذة نيفين , انا ابتديت بس من أول إمبارح أحس بشوية تفاؤل بسبب حكم المحكمة الدستورية .. حاسة إني أخدت نفسي بعد ما الأمل قرب وراح ناحية أحمد شفيق , الناس مش فاهمة ان الإخوان همة كمان فلول هوة مش في الدين الإسلامي برضه حرام التكفير ولو بالنطق ؟ مش حرام الإكراه في الدين زي ما بيعملوا ؟ مش عيب وتشويه للدين ان حد فيهم سواء ست او راجل يمد ايده ويضرب مصري زية لمجرد انه متعصب ؟ مش من الفجر انه يقتل بدون وجه حق زي ما عمل البعض منهم في أحدى المحافظات امبارح عشان مواطن هتف بإسم شفيق ؟ مش تخلف عقلي وجهل ديني لما تقابلني ست منقبة وتقوللي انت كدة كافرة لازم تتحجبي ؟ هوة الدين يا بهوات لو بالمنظر ده اقسم بالله ما كان حد دخله من الأساس .. ده طلعان دين مش دخول فيه .. هية دي أخلاق النبي عليه افضل الصلاة والسلام ؟ هية دي تعاليم الدين الإسلامي اللي تخلي واحد زي مرسي يكدب وتخلي نائب يصيع مع واحدة في عربية وتخلي الشاطر يهدد باللي قاله ؟ ايه الإدعاءات دي وازاي وصلنا للمرحلة دي ؟ طيب ايه رأيك انا مش بلوم على الإخوان انا بلوم على الناس المصرة انهم يعيشوا الكدبة ويستاهله اللي يجرالهم بعد كدة سواء شفيق فضل فيها ولا لأ .. الناس مبقاش عندها عقل تميز ؟ الحسبة دلوقتي مش الإختيار بين فلول أو غيرة الحسبة لازم تكون الأصلح لمصر ولو حد قاللي ان شفيق فلول طيب ما الإخوان للمرة المليون أبو وأم الفلول وكله بيتم بإسم الجهاد في سبيل الله .. هوة دة بقى الجهاد في سبيل الله ؟ اللهم إضرب الظالمين بالظالمين , ومكروا ومكر الله والله خير الماكرين وحسبنا الله ونعم الوكيل .

فضفضة
انا شخصيا ضد اي تعدي يقوم به اي إنسان أيا كانت ديانته ومعتقداته , وأميل أكثر لأن يتحدث الناس سويا بالكلمة الطيبة , ان لم تكن الكلمة ذات قيمة فلما ساواها الله بالصدقة ؟ .. صديقتي .. برغم حدوث بعض المخالفات والتعديات وأيضا الإدعاءات إلا انه من الظلم أيضا أن نعمم السيئة فيوجد الصالح ويوجد غير ذلك .. ندعوا الله أن يولي الأصلح لبلادنا وأن يرحمنا ولا يولي علينا من لا يخافه ويظلمنا .