غرام واحد محروم!

كفاية كده.. تعالى. أرجوكى تعالى. بعادك بيلخبط عقلى وبيضيق خلقى وبحس إن قريب أوى.. ها يطير برجى. قاعد طول الليل با ستعجل قربك، وكل دقيقة بتمشى بطيئة وزى ما يكون عقارب الساعة من الدوران.. تعبانة. أجلت كل حاجة بسببك. أكلى وشربى وشغلى وحتى دقنى.. قولت مش هاحلقها إلا لما أشوفك.
مقدرتش مرة أعمل حاجة بدونك، قولى عاجز قولى مشلول أنا خدت عليكى لدرجة إن من غيرك بحس إنى بالقيود مغلول. با سأل دايما نفسى هو أنا قبل ما أعرفك وأشوفك كنت با عمل ايه من غيرك ؟ ولاقى نفسى مش فاكر حاجة قبلك.. وزى ما يكون حياتى ابتدت معاكى واتولدت أول ما شفتك.
حاجة غريبة اكتشفتها.. ولو قولتها مش ها تصدقي إني عملتها. كنت واقف وسط الناس اسمعهم وهما بيشكروا فيكي ويتكلموا عليكي. تصدقي أول مرة أحس إني مش غيران.. وحابب أسمعهم وهما بيعددوا جمايلك وأفضالك، وباستمتع وهما بيتغزلوا فيكى، ويتنفسوا الصعداء أول ما يظهر فى الأفق.. طيفك.
كتيير أوي اصحي من النوم أناديكي.. وأدور عليكي، وأزعل أوي لما الناس تقول لي انك مشيتي وكمان ها تغيبي، جايز مش بأعرف قيمتك وانتي جنبي.. لكن صدقيني لما أقول لك أنا ولا حاجة من غيرك، والدنيا بتبقي ضلمة و"ساكتة " وانتي مش موجودة.
وأنا صغير.. كانوا بيعاقبوني بيكى، لما كنت أغلط كانوا بيبعدوني عنك، ويفرقوا بينى وبينك، عشان عارفين إني كنت - ولا زلت - بأكره الدنيا في غيابك. كانوا بيضحكوا عليا لما كنت أصرخ وأطالبهم برجوعك، ويسخروا منى وأنا قلبى مقبوض من فراقك، ويزرعوا فى خيالى الرعب حتى تتجمد أطرافى، ويروحوا يتبادلوا النكات عندما تخوننى شجاعتى.. وتتغلب طفولتى على إرادتى ويفقدنى الخوف سيطرتى على "مثانتى"، بينما أمى وأبويا يندبا حظهما على طول زمن طفولتى وبراءتى. وأول ما ترجعى.. ألاقى الغشاوة هجرت عينيا، وقلبى رجع ينبض من تانى، وعروقى رجعت لها الحياة..وعاد دمى للجرى فى كل قناة.
وأنا صبى.. كوابيس الدنيا كلها كانت بتصيبني لما اتحرم منك، وتستغل غيابك وتتحرش بيا، والتهيؤات كانت بتحرض الوحوش عليا، وقوتى كانت تخور وتضعف، وبسهولة.. بيعرفوا يغلبوني. عارفة ليه ؟ عشان عارفين إني من غيرك أعمي بلا بوصلة أو منارة، والدنيا بتتحول بحر..عينيا مش بتشوف فيه شط ولا موجة، والغريب زي القريب والراجل زى الست مش شايف اختلاف أو فرق، وأظن إنى مش أنا الوحيد اللى أحاسيسى بتتلخبط بالشكل ده..سبقنى عظماء وأبطال عرفوا قيمة وجودك ووضعوا قواعد وامثال وحكم عند فقدانك، ونابليون قال.. تتساوى كل نساء الارض عند غيابك.
هيييييييييييه..قلبى انشرح وأنا بأسمع العيال فى الشارع بيقولوها وبعرف إنك رجعتى لما يفضلوا يرددوها. والنبى ما تمشى تانى أنا بكره نفسى من غيرك. ده العالم كله بيحلف ويمجد اللى بدعك وخلقك وصنعك، ومن ساعة ما اخترعك والناس كلها خدت عليكى.. ومستحيل تعيش بدونك أو من غيرك. أرجوكوا ادعموها وصونوها..واتركوا الكهربا.. ولا تقطعوها.