محمد رمضان يرد على منتقدي ظهوره بالحلق.. ويكشف حقيقة خلاف زوجات جعفر العمدة

حل الفنان محمد رمضان ضيفا على برنامج "الراديو بيضحك" عبر راديو 9090، ليلة أمس، الأربعاء 12 أبريل، وتحدث عن نجاح مسلسل "جعفر العمدة"، وكواليس فيلمه الجديد "هارلي"، المنتظر عرضه في موسم عيد الفطر المبارك.
ويرصد موقع "صدى البلد" الإخباري، في التقرير التالي، أبرز تصريحات محمد رمضان:

محمد رمضان: كلمة "ليفة" عملت مشكلة لمحمد سامي.. وزينة مش بتهتم بالسوشيال ميديا
وقال محمد رمضان: "زينة عملت السهل الممتنع، وهي مش متجاهلة نجاح المسلسل ولا حاجة، بس هي بتتعامل بحذر شديد، ومش بتهتم بالسوشيال ميديا أوي زي أختها ياسمين".
وأضاف: "كلمة يا ليفة عملت مشاكل للمخرج محمد سامي عشان بقى يستخدمها في حياته العادية، وهي طلعت مني بالصدفة وبقت لازمة للدور".
وأكد محمد رمضان، أن نهاية مسلسل "جعفر العمدة" سوف تكون مرضية لجميع المشاهدين.

كريستيانو لابس حلق.. محمد رمضان يرد على انتقادات فيلم هارلي
كشف الفنان محمد رمضان، عن كواليس فيلم "هارلي" المنتظر عرضه في موسم عيد الفطر المبارك.
ورد محمد رمضان، على الانتقادات التي وجهت له من خلال فيلم "هارلي"، قائلا إن كل مشروع يقدمه يخاطب شريحة معينة من الجمهور، وعلق: "هارلي ده فيلم سينما.. وجمهور السينما بيختلف تماما عن جمهور الدراما".
وتابع محمد رمضان: «في السينما أنا بخاطب شريحة عمرية وهم رواد السينما الحقيقيون، هما من سن 12 سنة لسن 28 سنة.. دول جمهور السينما الحقيقي وأنا اخترت فيلم يخاطب هذه الشريحة ويمثلها».
واستكمل محمد رمضان: «هارلي هو شاب ينتمي لهذا الجيل اللي هو ممكن يكون بيختلف عن جيلي وعن الجيل اللي قبلي.. جيلي مكنش عنده إنستجرام.. وهذا الجيل عامل فولو لكريستيانو اللي هو عامل حلق أو فلان.. وكلنا بنعاني مع ولادنا إن هما بيقلدوا اللوك بتاع بعض.. وهو شيء عادي بالنسبة لجيل جديد».
واستطرد: «هو ده الممثل يعني الممثل الحرباء إن هو إزاي يبقى في كل أرض لون الأرض دي.. وهو طبعا نقلة غريبة جدا من جعفر العمدة زي، وإن شاء الله الناس لما تشوف الفيلم هيشوفوا النقلة أكتر كمان إزاي شخص بيمشي ماشية مختلفة طريقة كلامهم مختلف، في أكشن تقريبا في السينما، أكشن ورومانسي، وفي كوميديا».
وأضاف محمد رمضان: «أنا كنت عامل في السينما قلب الأسد وعبده موتة وواحد صعيدي، بس لما رحت الدراما عملت ابن حلال لأن أنا عارف إني داخل الدراما وأنا ضيف عندك في البيت، فلازم أبقى حريص إن هبقى لابس إيه؟ وهتكلم ازاي؟ وهقعد ازاي؟».
واختتم محمد رمضان: «بإذن الله فيلم هارلي يكون يعني ثقة في الله بتنبأ إن هو يكون أعلى إيراد في مسيرتي السينمائية إن شاء الله».

محمد رمضان يكشف حقيقة خناقة زوجات جعفر العمدة في الكواليس
نفى الفنان محمد رمضان، في لقائه مع راديو 9090، ما تردد حول وجود خلاف بين بطلات مسلسل "جعفر العمدة"، اللاتي يجسدن أدوار زوجاته في العمل.
وحول هذه الشائعات، رد محمد رمضان، قائلا: «لأ خالص والله، وأنا لم أتدخل في اختيار الممثلين، أنا رأيي استشاري كممثل، يعني المخرج المفروض هو المسئول عن عن اختيار الممثلين، وأنا بقول رأيي إن مثلا أنا حاسس إن ده أنسب أو حاسس إن ده كذا».
وتابع: «المخرج محمد سامي اختار كل الناس برؤية صائبة يعني بجد، من من أحمد فهيم وطبعا الأستاذة هالة صدقي إضافة لينا كلنا إن إحنا اشتغلنا معاها وإضافة للمسلسل».
وأضاف محمد رمضان: «كل الممثلين كانوا جمال جدا وفعلا مكانوش مركزين غير في الشغل، محدش كان مركز في تفاصيل بقى شخصية إن مثلا ده واخد وضع أحسن، ما فيش الكلام دا، ولو كنت شفت اللوكيشن كنت هتقولي المكان ده مش هيطلع غير نجاح».