40 ألف جنيه ونقيب المهن التمثيلية يتدخل.. القصة الكاملة لأزمة رحمة حسن والمنتج هاني أسامة

تصدرت الفنانة رحمة حسن تريند مواقع التواصل الاجتماعي بعد أن اتهمت المنتج هاني أسامة بأنه أخذ منها مبلغا ماليا ولم يعده لها وذلك عبر حسابها الشخصي على موقع التواصل الاجتماعي لتبادل الصور والفيديوهات "إنستجرام".

وكتبت رحمة حسن قائلة: "صباح الخير أحب أقول اني ليا عند هاني أسامة المنتج 40 ألف جنيه من 2018 وكل ما اكلمه يقولي اني مش معايا فلوس.. أنا كمان مش معايا فلوس يا هاني بس مش بقول انت شغال مشاالله.انا لا .شكرا انا هسيب الرسالة دي هنا".

أشرف زكي يبادر بالمساعدة
الأزمة لم تقف عند تلك النقطة، وتدخل الفنان أشرف زكي للرد، وقال نقيب المهن التمثيلية، إن الفنانة رحمة حسن ليست عضوة في النقابة، لافتة إلى أنه اتصل بها، وأبلغها بأن المشاكل لا تدار علي الفيسبوك وإذا كان لديها مشكلة عليها أن تتوجه للنقابة بشكوى ولكنها رفضت التقدم بشكوى.
وأضاف أشرف زكي خلال مداخلة هاتفية مع برنامج "حضرة المواطن" المذاع علي قناة "الحدث اليوم": أن رحمة رفضت حذف البوست من علي الفيسبوك إلا بعد أن يقوم المنتج هاني أسامة بدفع المبلغ المالي الخاص بها.
أشرف زكي يفجر مفاجأة بشأن مشكلة رحمة حسن مع المنتج هاني أسامة
رحمة حسن ردًا على تصريحات أشرف زكي: مش هاشيل البوست لحد ماخد فلوسي
رحمة حسن توضح القصة

وأوضحت رحمة الصورة من خلال منشور عبر حسابها على إنستجرام وقالت: "أولا : كل الاحترام والتقدير للدكتور أشرف ذكي .. علي استجابته وسؤاله.. وأحب أوضح أن الفلوس الي ليا عند هاني اسامه المنتج هي باقي أجري عن مسلسل سابع جار .. وكان ليا جزء كبير منها .. ولجأت للدكتور اشرف في 2019 علشان يساعدني .. وحصل .. وأداني جزء بسيط من فلوسي .. وللعلم الوقت ده كان بابا تعبان وفي المستشفي وهاني اسامه كان عارف وقلتله اني محتاجه الفلوس ارجوك .. ورفض بعدها يديني أي فلوس من باقي اجري ومكانش بيرد علي رسايل او مكالمات مني .. للأسف بابا اتوفي بعدها بكام يوم ..ومن ساعتها وانا تعبانة ومش ناسيه هو عمل معايا ايه .. وكان صعب عليه اني اطلب تاني من دكتور اشرف انه يتدخل لان هاني مش بيستجيب اصلا ..وانا كنت تعبت من كتر مابطلب حقي وهاني بيتهرب .. بس بين كل فتره والتانيه كنت ببعتله رساله او اكلمه وبرضوا مافيش حاجه .. كل ده بمنتهي الذوق والاحترام والرسايل موجوده معايا من 2018 كله علي التليفون .. وطبعا الوقت بيعدي وانا معنديش شغل ماعنديش دخل .. تعبت وبعتله تاني من كام يوم وقلتله .. وبرضوا مافيش حاجه .. وكمان العقد بتاعي معايا ومخصوم منه الضرايب الي دائما بدفعها علي اي عمل بشارك فيه من زمان .. العقد بتاعي علي مسلسل 60 حلقه .. هاني صور وذاع 67 حلقه يعني ليا كمان 7 حلقات مش موجودين في عقدي وماختش عليهم كمان اجر و ماطلبتش بيهم اصلا بس هو عارف ..الفكره انه طلع ان في كذا شخص في الشغل مش انا بس ، عندهم نفس الموقف مع هاني .. ويمكن بفلوس اكتر بكتير وفي نفس الموضوع والنقابات والقضيه وما الي ذلك.

أما بخصوص إن الدكتور أشرف طلب مني اني اروحله النقابة عشان نتكلم في الموضوع .. انا قلتله اني مش عايزه اتعبه اكتر من كدا معايا .. خصوصا اني عارفه اني مش نقابيه واني بشتغل بتصاريح ومش عايزه اضيع وقته خصوصا انه ساعدني قبل كدا.. وكمان عشان عارفه ان هاني مش بيستجيب عشان هو منتج فا تبع نقابه تانيه .. وكنت عارفه ان الدكتور اشرف كلمه قبل كدا في موضوع الفلوس ده و برضوا ماحصلش حاجه .. يعني لو كان عايز يدفع كان دفع من زمان .. المسلسل اتذاع وخلص وهاني عمل بعده كذا عمل .. انا قلت للدكتور اشرف اني مش هاقدر اجي لاني تعبانه واني مش هاشيل البوست لحد ماخد فلوسي .. لاني بحاول اجيب حقي الي بقالي 3 سنين مش عارفه اجيبه.

وأنهت حديثها: "شكرا لكل حد اهتم .. بس انا حبيت أوضح ايه الي بيحصل .. وشكرا لكل الي ساعد والي بيحاول يساعد.
وللعلم انا لسه ماخدتش فلوسي برضوا .. شكرًا وأخيرا .. لم أدلي باي تصريح صحفي ولست مسئولة عن أي كلام يكتب بالنيابة عني.