أب يتخلص من ابنته ب سم صراصير في لبن الرضاعة.. التفاصيل الكاملة لحادثة المرج

رصد برنامج "تفاصيل"، المُذاع عبر فضائية "صدى البلد 2"، تقديم الإعلامية "نهال طايل"، تفاصيل جريمة بشعة "أب يضع السم لابنته في لبن الرضاعة ويتخلص منها بدون رحمة".
وروت "رحمة والدة الطفلة"، تفاصيل الواقعة قائلة: "تعرفت عليه عن طريق واحدة صديقة ليا، قالت لي هو كويس ومراته تركت له 3 أولاد وأقنعتني بيه وأنا وافقت وقولت أربي عياله وأكسب ثواب، كنت متجوزه قبل ما أتجوزه وخلفت بنت منه، وقالي مش عايز ولاد تاني قولتله خلاص".
وأضافت: "جوزي كان شغال قهوجي وبعدين قعد من الشغل"، موضحه: "ربنا شاء أني أجيب طفل كمان، ومكنتش اعرف اني حامل، وقولت له أنا حاسه أني حامل قالي عادي، لقيت كلامه عادي معايا فكرني بهزر.. وأما اتأكدت قال لي نزليه من عايزه، قولتله حرام وربنا أراد".
وتابعت: "كشفت بعدها لقيت نفسي في أول الشهر الخامس، وقولت له مش هعرف أنزله قالي لو جبتيه هيحصلك مشاكل كتير وهضرك بيه، وفضل ورايا لمدة شهر علشان انزله، وحاول معايا كتير علشان أنزل العيل، قولت له أنا هشتغل وأصرف عليه قالي لا مش عايزه".
وأشارت: "قال لي أما تولدي أنا هبيعه، قولتله هحبسك لو عملت كدا، وقال لي مش هصرف على العيل في أي حاجه"، مؤكدة: "مكنتش اعرف أني حامل، وفجأة لقيت حاجه بتتحرك في بطني.. وقولت له أنا في بطني بنت، قالي أنا معايا 3 بنات مش عايز بنات تاني، قال لي أنا هبيعها".
وأكملت: "كان مصمم أنه يبيعها أما تتولد، راح معايا المستشفى في الولادة، وقال لي أنا مش معايا فلوس أطلع لها شهادة ميلاد، قال لي أنا هطلعك من المستشفى وبعد كده نبقى نشوف الشهادة علشان كان عايزه يبيعها".

ولفتت: "خرجوني من المستشفى بدون الشهادة، وكل ما اكلمه يقول لي مش معايا فلوس، وكل ما أقربها منه يقولي ابعديها بعيد عني.. وعرض عليا كتير أني أبيعها، والناس ساعدتي علشان أطلع شهادة الميلاد، وقال لي عملتي اللي ف دماغك علشان معرفش أبيعها.. قولتله طلقني وسبني في حالي".
أب يتخلص من ابنته ب«سم صراصير» في لبن الرضاعة
واستطردت: "بعد 40 يوم من الولادة قولت له أنا عايزة أشتغل علشان أصرف على أولادي.. ونزلت اشتغلت في 6 أكتوبر، وقولته البنت أمانة في رقبتك قالي حاضر، وكنت أطلع من البيت 5 الفجر أرجع الساعة 8 بالليل ألاقيها نايمة زي ماهي، كان بيديها الرضعه بس، كان بيموتها بالبطيء وكان بيغطيها بالبطانية".
وأضافت: "أخد أجازه مخصوص علشان يموتها.. وبنتي اتقلت بسبب أنه بيعملها وحش، ويوم الخميس كان محضر طبق فول، وكان حاطط لي منوم وأصر أني أكل معاه علشان ما ألحقش بنتي، ووحط لها دواء صراصير في لبن الرضاعة، ودي كانت أول مرة يقولي قومي نامي، روحت في النوم صحيت قبل الفجر بنص ساعة، لقيته نايم جنبها وبيشرب سجاير جنبها.. وهي صحيت وأنا نايمة وشربها لبن الرضاعة تاني".

وأشارت: "يوم الجعة قبل الصلاة، كنت نايمة لقيت حاجه بتصحيني بتقولي أنا مُت قومي خديني، صحيت أدور عليها مكنتش لقياها، في البيت، فضلت أدور عليها لقيتها تحت الدولاب كان جسمها بارد، فضلت أكلمها مردتش عليا، كان إيدها وصوابعها زرقاء قعدت أصوت شمتني وقالي بتصوتي ليه، قولتله عملت أيه في البنت قال لي معمتلش حاجه، قولتله تعاله معايا المستشفى قال لي استني اما أفوق من النوم".
وتابعت: "نزلت لجارتي، طلعت قالت لي البنت ماتت، والمعمل الجنائي قال أنها ماتت بسبب السم"، موضحه: "بعدها قولت له عايزة اروح مسشتفي حكومي قالي أنتي عايزه تحبسيني.. وبتي دخلت مشرحة علشان واحد ميسواش ضفر عيل".
واختتمت: "مفيش حد من أهله كلمني.. وأنا عايزاه يتعدم لأن بنتي بتجيلي كل يوم في المنام قولي أنا عايزه حقي".