«المصري كيدز».. حدوتة هدية ربنا

وأنا صغير قولت لبابا وماما إنى عاوز أصوم فى شهر رمضان زى الناس الكبيرة.. ماما قالتلى اصبر لما تكبر شوية علشان ما تتعبش.. بس أنا قولتلها يا ماما أنا خلاص بقيت كبير ولازم أصوم معاكى إنتى وبابا.. ولما رمضان جه بعد السحور قولت لماما أنا خلاص كده بقى هصوم معاكو.. ماما طبطبت عليا وقالتلى إنت عاوز تصوم ليه؟..
قولتلها علشان آخد حسنات كتير ولما أكبر أدخل الجنة.. راح بابا نادهنى وقالى إن ربنا هيدينى حسنات كتير لو أنا اهتميت بجسمى وما تعبتهوش علشان هو هدية ربنا إدهالنا ولازم نحافظ عليها.. قولتله طب ما انت وماما كده مش بتحافظوا على الهدية بتاعة ربنا.. بابا وماما ضحكوا عليا لإنى كنت زعلان علشان نفسى أصوم زيهم.. وبابا راح قايلى هو ينفع يا حبيبى ماما تحطلك أكل وهو مش مستوى؟.. قولتله لأ علشان كده بطنى ممكن توجعنى وسنانى هى كمان تتعب.. راح قايلى إن جسم الأطفال هو كمان لازم نساعده ونقدمله كل البروتينات والخضروات والألبان وكل عناصر الغذاء علشان يبقى قوى ويقدر يستحمل الصيام لما تكبر شوية.. واتفق معايا إنى كل يوم أصوم عدد ساعات صغيرين وكل ما أكبر أزودهم ساعة لحد ما ييجى الوقت إللى أستحمل فيه الصيام زى الكبار..
وكمان قالى إن كده ربنا هيحبنى ويدينى حسنات كتير علشان أنا كده هبقى بحافظ على نعمته اللى بعتهالى هدية فى جسمى.. وأنا كمان سمعت كلام ماما وبابا وبقيت أصوم لحد ما أعطش أو أبقى عاوز آكل.. بس كمان بقيت ما أعملش شقاوة كتير علشان بابا كان بيبقى راجع من الشغل صايم ومحتاج ينام شوية من غير ما أعمله إزعاج.. وبقيت أساعده لما يصحى من النوم ويعمل السلاطة قبل الفطار وكنت ببقى فرحان أوى.. وأول ما المغرب يأذن أجيب كبايات ميه وعصير وأوزع على بابا وماما والضيوف علشان آخد حسنات كتير.. ولما بقيت كبير بقيت أحكى الحدوتة دى للأطفال فى شهر رمضان علشان هما كمان يبقوا عندهم حسنات من غير ما يتعبوا.. وكمان يحافظوا على هدية ربنا.