"وفاء" تطلب الخُلع في الشرقية: "عايزني أصرف عليه وعلى العيال"

"طول الليل صاحي بيتفرج على أفلام، ولما آجي أصحيه الصبح علشان يشوف أكل عيشنا مايرضاش يصحى، عايزني أشتغل وهوَّ يُعقد مع العيال في البيت".. بهذه الكلمات بدأت "وفاء" من إحدى القرى التابعة لمركز ومدينة منيا القمح، بمحافظة الشرقية، سرد تفاصيل طلبها الخُلع من زوجها بعد نحو 5 سنوات زواج.
"اتجوزت أحمد جواز تقليدي وما قدرتش أعرف طبعه في فترة الخطوبة، وأول سنة اشتغل شوية في مصنع بالعاشر من رمضان وبعدها فصلوه وقعد في البيت"، تضيف وفاء: "قولت لما ربنا يكرمني وأخلف هيحس بالمسئولية ويلتزم علشان نعرف نصرف على المولود الجديد، وفعلًا لما ربنا كرمنا بمصطفى اتشجع وطلع اشتغل".
وتابعت: "التزم بعدها شوية وبقى يشتغل في أي حاجة يطلع رمل بالونش يعتق طوب، أي حاجة تجيب فلوس، لكن مفيش كام شهر ورجع لعادته القديمة يشتغل يوم وينام أسبوع".
عدم رضاء الزوجة بحال زوجها، دفعها لمغادرة منزلها بحثًا عن أي عمل يًساعد في مصروفات البيت، بحسب ما توضح: "فكرت أساعده واشتغلت فعلًا في البيوت، اللي عنده شقة عايزة تتمسح، واللي عاوزني أمسح سلم، مع إني عمري ما عملت الموضوع دا قبل ما اتجوز بس رضيت علشان أعرف أصرف على ابني واللي في بطني من بعده، وبقيت أدعي ربنا يهدي جوزي ويحس بالمسئولية بعد ربنا ما كرمنا ببنتي رحمة".
وتابعت: "قعدت بعد ولادة البنت ومبقيتش أطلع اشتغل وقولت أخلي بالي منها يمكن يحس على دمه وينزل يشتغل زي ما عمل في ولادة مصطفى، لكن بقينا قاعدين في وش بعض مشاكل وخناقات على طول، وهوَّ زي ما هوُ يشتغل يوم وينام باقي الأسبوع وطول الليل يتفرج على الأفلام ويشرب مخدرات، وبعدها ينام لحد الظهر، وبصراحة بقيت يعني حتى العيال مش بآمن أسيبهم معاه".
لم يتغير الوضع كثيرًا إلا للأسوء، حتى أن الزوج أقدمَّ على ما لم تتوقعه وفاء، وفقَّ ما قالت: "طلب مني أنا أنزل اشتغل في مصنع وهوَّ يُقعد مع العيال في البيت، قولت خلاص كدة عمر حاله ما هينصلح، وشغل بشغل أطلع أشتغل وأصرف أنا على عيالي وهوَّ يبعد عني بدل ما أتحمل مسئوليته ومصاريف السجاير والحشيش اللي بيشربه".