شقيقة ضحية المرج: ضهري اتعرى واتكسر بعد قتله.. فيديو

رصد برنامج "تفاصيل"، المُذاع عبر فضائية "صدى البلد 2 " ، تقديم الإعلامية "نهال طايل"، تفاصيل جريمة قتل بشعة لموظف بالمرج ضربا بالرصاص.
وقالت "شقيقة الضحية"،: "أخويا راح هدر، كان نسمة ومكنش ليه دعوه بالمشاكل، كان بيطيب بخاطر ولادي، ومبيعملش حاجه في حد وحشه".
وأضافت: "كان هو الصغير بس كان ابني وأخويا.. وجعني في قلبي، وضهري اتكسر خالص.. وحسبي الله ونعم الوكيل في اللي حرمنا منه، حرام حد مالوش ذنب يموت كدا من غير سبب وعياله صغيرين".
وتابعت: "اللي رمي ابني كده يترمي رميته، وحسبي الله ونعم الوكيل في اللي ضربه غدر، وهو عمره ما شتم حد ولا اتخانق مع حد"، مؤكده: "ضهري اتعرى من بعده".


زوجة ضحية المرج باكية: أقوم الصبح أدور عليه في الشقة والشارع مش لاقياه.. فيديو

رصد برنامج "تفاصيل"، المُذاع عبر فضائية "صدى البلد 2 " ، تقديم الإعلامية "نهال طايل"، تفاصيل جريمة قتل بشعة لموظف بالمرج ضربا بالرصاص.
وقالت زوجة الضحية: "زوجي كان بيشتغل في البيت وفجأة سمعنا صوت ضرب النار وناس بتصوت طلعنا نشوف فيه إيه لقينا حسن أخوه منزله على السلم وكله دم"، لافتة: "زوجي كان معايا وماكنش فيه أي مشاكل مع أي حد".

وأشارت: "متكلمش معايا في أي حاجه، وماكنش ليه مشاكل مع أي حد، وكل الناس كانت بتحبه، وكان بيقعد مع العواجيز والأطفال، محمود ماكنش بتاع مشاكل، كان بييجي من شغله ينام ساعتين وبعدين ينزل المحل".
وأوضحت: "نزلت جري على الصويت شوفته ولحد دلوقتي مش مصدقة إنه راح منّي، وحاسه أنه في حتة وهيرجع"، لافته: "محمد ابني دايما يعيط ويسألني على باباه ويقولي أبويا وحشني".
وأضافت: "شوفنا حسن أخوه نازل بيه كله دم، طلعنا بيه على المستشفى وقعد أسبوع في الرعاية وبعدين توفى"، مؤكدة: "كان حنين وطيب، وعمره ما زعلني، وماكنش يخليني أنام زعلانة، محمود كان طيب مع الناس كلها".

وأكملت: "محمود ضحك علينا كلنا ومشي بسرعة، وأنا عايزة حقه وحق عيالي، عايزة حق الأطفال الصغيرين مش عارفه أقول لأولادي أبوهم فين، أنا ضهري عريان مش حاسة بأي حاجه، حاسة إني فاضية".
ولفتت: "بقوم الصبح أدور عليه في الشقة والشارع مش لاقياه، بقول أنه في حته وهيرجع، بكدب نفسي وبقول هيرجع"، مردفه: "عندي 3 أولاد محمد وعبدالحميد وكريم".