أحمد المحمدي: لا أمانع الانضمام للمنتخب دون الشارة أو المشاركة.. واستبعادي بسبب السن غير مقنع

أكد أحمد المحمدي، الظهير الأيمن لفريق أستون فيلا الإنجليزي، أنه لا يمانع الانضمام لصفوف منتخب مصر دون المشاركة أساسيًا، أو ارتداء شارة القيادة.
وقال المحمدي، في تصريحات لبرنامج "الماتش" الذي يقدمه الإعلامي هاني حتحوت عبر شاشة صدى البلد "النقطة المهمة هي الصعود، الأجواء كانت صعبة في كينيا، وفي لعيبة بقالها فترة بعيدة عن المنتخب، الصعود والتأهل كان الأهم، والفترة الجاية صعبة؛ علشان تصفيات كأس العالم، الناس لازم تقدر ظروف المنتخب، والتجمع في فترات صغيرة بيكون صعب بالنسبة للأداء، والأهم هو الأداء".
وتابع: "الفترة الجاية هيكون في فترة أطول عشان الجهاز يقدر يشوف اللعيبة بشكل أكبر، أتمنى الفترة الجاية أكون موجود، وده شرف كبير لأي لاعب".
وأضاف: "استبعادي عن المنتخب مع حسام البدري، وجهة نظر فنية تحترم طبعًا، ممكن الفترة دي الجهاز يعتمد على عناصر تانية، لكن الفترة الجاية رأيي إنه هيعتمد على أصحاب الخبرات أكتر، في عناصر شابة انضمت هتبقى مفيدة للمنتخب".
وواصل المحمدي: "مؤمن بمقولة إن الجهاز الفني له الرأي الأول والأخير ولكن في رأيي إن اللاعبين أصحاب الخبرات لازم يكونوا موجودين؛ علشان يفيدوا القائمة، حتى لو مش هيشاركوا أساسي، علشان تدي اللعيبة المنضمة حديثًا الخبرات، مع كوبر مكنتش بنضم في الأول ولما لعبت في الجابون قدمت بطولة مميزة، مش شرط اني العب اساسي علشان انضم، دي رؤية الجهاز الفني".
وتابع المحترف في الدوري الإنجليزي، تصريحاته: "وارد يكون عامل السن سبب في عدم ضمي، لكن في ناس أكبر مني انضمت عادي، علشان كدة أنا شايف إن ده مش سبب مش مقنع، ممكن يكون بيفكر ينزل بالسن، ولكن المرحلة الجاية مختلفة".
واختتم أحمد المحمدي تصريحاته: "بخصوص شارة القيادة، أنا بقالي سنين في إنجلترا، والمدير الفني هو اللي بيقرر، مش بالأقدمية، الموضوع مختلف بره مصر، وأنا بالنسبالي اتعودت إن لو المدير الفني مش هيختارني كابتن؛ خلاص عادي، لو أنا موجود مع المنتخب والشارة هتبقى مع حد تاني معنديش مشكلة".