أحمد فريد يكتب: معادن الأرض

ايه هوّ اغلي معدن في الكرة الأرضية؟
المقال دا هو مقال للمنظرة، وأكيد أي واحد منكم عندو حاجة شبه اللي هتكلم عليها، برضو بيتمنظر بيها . علشان لازم نفكر بعض بالحاجات دي وإحنا إيه وظيفتنا فالحياه. و إيه هوا أغلى معدن مكن تتمنظر بيه؟ هل هو بقى معدن النحاس ولّا الذهب ولاّ معدن الفضة ولا معدن ساعة اليد ولا حتى معدن العربية (في بعض البلاد اسمها السياره) . إيه المعدن اللي ممكن تتمنظر بيه؟
هطلب من حضراتكم إنكم تحكموا بعد قراءة المقال كامل.
أنا أحمد فريد من عمليات الفضاء بوكالة الفضاء الألمانية.
علشان القارئ يعرف عني أكتر، قررت إن المقال دا يكون خفيف حضراتكم ومن غير معلومات علمية معقدة . و لكن فيه تجارب شخصية ممكن كلنا نستفيد منها وتتعرفوا عليّا من خلالها.

المعادن الغالية موجودة باطن الأرض. وكمان موجودة في كواكب ونيازك وكويكبات كتير أوي غير الأرض . ده بالعكس، دا ممكن فيها معادن أكتر وأغلى من الأرض بكتير جدا جدا . لكن مش ممكن المعيشة فيها، بالرغم من المعادن الغالية اللي فيها . معدن الصواريخ الفضائية من ضمن اغلى المعادن . و في كمان أقمار صناعية مغلفة بميّة الذهب.
هتمنظز (هعيش ف الدور يعني) وأنا عندي 19 سنة، أنا كنت واحد مُهم اوي. جَمَعت فلوس كتير اوي اوي، كنت غني. عارفين إزاي! كنت واحد من ضِمْن المُنظمين "بدون أَجْر" لحفل تبرُّعات كِبير لمستشفي كلّنا عارفينها اسمها 57357 متخصِّصة في عِلاج سرطان الأطفال. لمّينا تبرعات كتيرة وتنظيم وإعداد الحفلة كان علينا .. شغل أيْام كتير وعدد ساعات في الْيَوم كتير (ولا حد كان داريان بحاجة من الناس اللي حواليا و يعرفوني).
عملت كدا ليه؟! وإيه اللي أجبرني على إني اشتغل كل الشغل ده ببلاش وكل ساعات العمل بدون مقابل؟ الإجابة بسيطة جدا، مش أنا اللي قررت دا من نفس ولكن وأنا في سنّ 9 سنين كنت في رِحْلَة مدرسية لمدة يوم واحد بس. لمؤسسة أطفال ذو الاحتياجات الخاصة. كل وظيفتنا هناك أن إحنا نلعب مع بعض، علشان الغرض من الرحلة المدرسية دي إن إحنا كلنا واحد، ومفيش حد احسن من حد . الطفل ذوي الاحتياجات الخاصة عايز يلعب برضو.
وكان الغرض الرئيسي من الرحلة هوّا تأسيس المعدن اللّي جوّانا . أعدنا نضحك ضحك على كرتون ال bugs bunny ، وأد إيه المدرسين كانوا مبسوطين معانا . وافتكر كمان أن إحنا بدأنا نساعد في ألعاب معينة زي تركيب المكعبات . اتعلّمت أنّ المساعدة بتفرّح .. و مش لازم تكون مساعدة بفلوس، ممكن تكون مساعدة بعِلم وممكن تكون بضحكة أو جهد شخصي في مؤسسة . ومن الرحلة المدرسية دي اتعلمت حاجات لرحلة الحياة. تفتكرو دلؤقتي ، ايه هوّا المعدن اللي الواحد ممكن يتمنظر بيه دلوقتي؟
(إتمَنظر بِمَعدنَك إنت ، مِش بمَعْدن إشتريتُه:)