20 خطوة للتعايش مع الموجة الثانية من فيروس كورونا

خوفا من الموجه الثانية لفيروس كورونا خاصة مع اقتراب فصل الشتاء، استعرض الدكتور فرهاد جورج، أخصائي الامراض الصدرية، بعض الخطوات المهمة لممارسة الحياة الطبيعية تعايشا مع الموجه الثانية من فيروس كورونا، وتتمثل في التالي:
1-متنزلش الا للضروره ، أيوه يعني خفف نزولك وارجع تاني خد حذرك واعتبر نفسك محظور نزولك من البيت الا للحاجات الضرورية والمهمة خصوصا مرضى السكر والضغط والقلب والسمنة والأمراض المزمنة.
2-الكمامة الطبية والكحول اساسي عند الخروج من المنزل او التوجه الى العمل، وطبعا الكمامه قبل لما نخرج من البيت نكون لابسينها وان امكن معانا اكتر من واحده عشان لو اتبلت تتغير في الحال و نلبسها في الاماكن العامه والمواصلات واماكن الازدحام.
3- هنرجع تاني مش هنحضن مش هنبوس و مش هنسلم على حد وخصوصا صحابك القدام وقرايبك وده لمدة شهور قدام لغاية نهاية الشتاء.
4-مش هتاكل من الشارع نهائيا الا لو في مكان مضمون اوي اوي اوي وبيعمل احتياطات وتعقيم كويس وفي الشغل كل واحد له ادواته الخاصة بالاكل والشرب ومفيش الفطار الجماعي بتاع الصبح ده كان زمان دلوقتي ، خلاص احنا داخلين على موجة تانية.
5-هنرجع تاني نحافظ علي المسافات بينا متر ونص علي الاقل والكلام ده بيطبق علي اي مكان انت فيه خارج البيت سواء سوبر ماركت او محلات تجاريه او مصلحه حكوميه
6-هنرجع تاني نستخدم مناديل للعطس والكحه وزي ما تعودنا نتخلص منهم بطريقه امنه
7- نعقم ايدينا كويس بالكحول ، وانت خارج البيت دايما ولو قدرنا نغسل ايدينا بالميه والصابون ، يكون افضل طبعا لمده 20ثانيه
8- طبعا خلاص المدارس والنوادي فتحت يعني ولادك بعد رجعوهم البيت يتعمقوا ويغسلوا ايدهم كويس وبلاش اجتماعات كبيرة أو مغلقة الايام دي لغاية منشوف احنا هنوصل لفين
9- لو بتتمرن لوحدك او مع أفراد قليلة حاول يكون فيه تباعد بينكم واضح
10- ممنوع لبس الماسك اثناء التمرين واثناء ممارسة اي رياضه بشكل عام زي الجرى وركوب العجل.
11-طبعا الكافيهات والمطاعم شغالة عادي لكن مش هناكل او نشرب فيها نهائيا الا لو بيعقمو كويس وبيحافظو على التباعد ولو في منكم هيرمي نفسه في البحر وعايز ياكل في مطعم مزدحم وينزل كافيهات مزدحمة مش محافظين على التباعد بين الناس لازم ياخد باله ويستخدم ادوات ذات الاستخدام الواحد فقط من اطباق وكوبايات .
12- مفيش شيشة نهائيا لانها أكثر سبب لانتشار العدوى .

13- المقاهى وادوات الشرب بها كالاكواب خطر كبير ويجب استخدام الاكواب الورقية والتخلص منها فور استخدامها.
14- لو ركبت مواصلات عامه او تاكسي ولقيت السواق مش لابس كمامه اطلب منه انه يلبسها ولو مرضيش انزل واركب غيرها ساعتها هيخاف علي اكل عيشه وهتجبره انه يلبسها.
15- طيب لو عايز تاكل جوه المطعم او كافيه لازم ناخد بالنا من وسائل التعقيم في المطعم والعاملين لازم يكونو لابسين كمامات او اطلب منهم يلبسوا لو حد نسى وان شاء الله الناس كلها تكون ملتزمه وخايفه علي نفسها من الموجة الثانية .
16- لما نرجع بيتنا بالسلامه يوميا اتعود تلمس مقابض الأبواب و زراير الاسانسير بكوعك مش بصوابعك أو استخدم مناديل الورق وخلي منها كثير في جيبك عند العطس بسبب تغيير الجو والتراب .
17- نقلع الشوز علي الباب وندخل نغسل ايدينا كويس بالميه والصابون ولو خدنا شاور يكون افضل .
18- طول ما احنا برا البيت نحاول علي اد ما نقدر ايدينا متلمسش وشنا خالص ونعقم ايدينا كويس طول ما احنا برا وخلي عندك شعور دائما ان الفيروس في ايديك ولازم تغسل ايدك على طول
19- نكون حذرين في التعامل مع الديليفري اثناء التعاملات الماديه وتعقيم الفلوس واليدين جيدا بعد اي تعامل مادي
20- لو هتروح عيادة او مركز طبي او مستشفى لازم تكون عند الضرورة فقط وناخد بالنا من التباعد والتعقيم والماسكات وعقم الكراسي قبل وبعد جلوسك على كراسي الانتظار وتروح للدكتور لوحدك أو معاك مرافق واحد فقط
أقرأ أيضا:
استجابة لمطالب الأهالي.. محافظ دمياط يتفقد قرية شط جريبة