الشاعر جمال بخيب يفتح النار على فيلم "الست".. اعرف التفاصيل

هاجم الشاعر جمال بخيت فيلم "الست"، وذلك بسبب تركيز الفيلم على إظهار كوكب الشرق أم كلثوم بخيلة وذلك من خلال منشور له عبر حسابه الشخصي بموقع التواصل الاجتماعي " فيس بوك ".
كتب جمال، "هو فيه واحدة بخيلة تتبرع بالملايين اللى خدتها باسمها وتاريخها ومحبة الناس ليها وفنها العبقرى للمجهود الحربي! هو فيه واحدة بخيلة تشارك فى حفلات تذهب حصيلة دخلها لمؤسسات وهيئات عامة! هو فيه واحدة بخيلة تفضل فرقتها معاها عشرات السنين، ولا ينفضوا من حولها، ولا يعملوا مع فرق اخرى!".
تابع، "زكريا أحمد وبيرم التونسى رفعوا قضية على أم كلثوم علشان حقوق الأداء العلنى، وهى حقوق لم تكن واضحة فى تلك الفترة، وكان الكل يعمل بالعرف السائد وليس بالقانون، وعندما وصل الموضوع أمام قاضى فاهم قال لهم أنتم قامات نعتز بها وأتمنى أن تُحل هذه المشكلة بعيدا عن القضاء، فتصالحوا وحلوا المشكلة بعيدا عن القضاء.. يعنى الحكاية ما كانتش بخل من أم كلثوم".
وأردف، "أعلى أجر بين كل نجوم العالم وقتها اللى غنوا فى أهم مسرح فى باريس حصلت عليه أم كلثوم، العقد كان مكتوب والحفلات متفق عليها من سنة 1966، ولكن الحفلة اتعملت بعد النكسة، ومع هذا تبرعت أم كلثوم بما حصلت عليه بالكامل للمجهود الحربى، ولما سألتها المذيعة سلوى حجازى: المبلغ بالكامل رايح للمجهود الحربى؟.. ردت عليها بكلمة واحدة (مش كتير)".
واختتم حديثه قائلا: "مفيش بخلاء بيعملوا كده، ومش لازم نسيب الحاجات اللى واضحة وضوح الشمس دى، ونمسك فى شوية النميمة اللى محدش عارف لها مصدر، ونخليها مرجعيتنا فى فيلم سينمائى بيتحول مع الزمن إلى وثيقة تاريخية شئنا أم أبينا".
تم نسخ الرابط