علق الفنان رامي جمال، على تصريحات الفنانة الكويتية حياة الفهد التي طالبت بطرد الوافدين من دولة الكويت؛ على خلفية أزمة فيروس كورونا. وقال رامى جمال، عبر صفحته على موقع التواصل الاجتماعي "فيسبوك"، "وجهة نظري أن أزمة كورونا أظهرت حقيقة كل الدول وحقيقة أخلاق الشعوب.. يعني سمعنا عن دول استولت على معدات ومنتجات طبية كانت مساعدة لدول تانية ودي دول كانت حلم لشباب كتير أنهم يسافروا لها.. شفنا دول الاتحاد الأوروبي وهي تتبادل الاتهامات واللي أعتقد أنهم بعد الأزمة هيرجعوا دول منفصلة زي زمان". وأضاف رامى جمال، "شفت وزارة صحة وأجهزة دولة شغالين تقصي ومكافحة وعلاج.. وكلي ثقة في أن ستر ربنا هيكمل المجهود ده بشوية حذر وصبر واتباع تعليمات.. شكرًا للدول العربية اللي احترمت المصريين الموجودين فيها.. شكرًا للدول اللي بتعمل زي مصر وبتعالج اللي على أرضها سواء كان ابنها أو ضيف .. وشكرًا السعودية وشكرًا الامارات كرمكم وطيبكم وأخلاقكم لا تستغرب شكرًا لكل دولة ما أظهرتش كره وعنصرية تجاه إخواتنا وأهالينا آخر حاجة أهلنا الكويتيين عارف أن أكيد الآراء والأصوات العالية اللي مبطلتش غلط وإهانة وعنصرية مع مصر والمصريين دول مش الغالبية وميصحش يكونوا واجهة ليكم". وأوضح رامى جمال، "أتمنى بعد الأزمة ما تخلص ميكونش اللي اتهز واتهد من مشاعر ناحيتكم كبير النظرة الطبقية والدونية دي ملهاش مكان في أزمة خلقها رب العالمين بڤيروس علشان يعلمنا حاجات كتير أولها وآخرها أن.. الله أكبر".
