صحة الفنانين .. سمير الإسكندراني يخضع لجراحة دقيقة ومي كساب مريضة

تعرض عدد من الفنانين خلال الفترة الأخيرة لوعكات صحية أثارت القلق بين محبيهم ومتابعيهم ويأتي في مقدمة هولاء النجوم الفنان سمير الإسكندراني الذي يخضع لعملية جراحية دقيقة حاليا ولكنه قبل الخضوع للعملية بعث رسالة طمأنينة لجمهوره وقال :" أنا بخير واخضع للعملية جراحية ولكن مع متخصصين واطباء ذو كفاءة عالية واوجه الشكر لكل شخص حاول الإطمئنان عليّ وأنا لن ابتعد عن الغناء وسوف أغني طوال حياتي" .
وكشفت مي كساب عن معاناتها مع مرض لم تكشف عن تفاصيله ولكنها كتبت من خلال حسابها على الفيسبوك :" الحمد لله رب العالمين حتي يبلغ الحمد منتهاه الإنسان بجد ولا حاجه من غير صحته يارب إديني الصحه بس عشان ولادي خمس أيام وحشين قوي الحمد لله إنهم عدو علي خير ".
وأضافت :" محمد كساب ربنا يخليك ليا حنين نفس حنية ماما الله يرحمها يا حبييي قعد يعيط عشاني كأنه أمي ربنا ما يحرمنيش منك أبدا".
اما أحمد أمين الذي عانى من مشاكل في الحنجرة طوال الفترة الماضية فكشف عن تطورات حالته الصحية وكتب من خلال حسابه على الفيسبوك :" أنا الحمد لله بقيت أحسن كتير.، وهارجع اشتغل قريب جدًا، وباخد دلوقتي جلسات voice therapy دي حاجة لطيفة جدًا واكتشفت إنها ضرورية ومفيدة لكل اللي بيستخدم صوته كتير " ممثل - مغني - مدرس" بس مش ده المهم.. المهم هو إني استفدت كتير جدًا من تجربة الصمت.. أسبوعين من غير كلام فرقوا معايا جدًا ذهنيًا.. وينفع يتكتب فيها كتب".
وأضاف "لقيت نفسي عايز اكتب زي زمان.. مش عشان عندي كبت.. لأ.. عشان المخزون بيزيد.. ما هو لما بتقلل وقت الإرسال وقت الاستقبال بيزيد.. أنا بقيت بسمع ، قريت كتير.. قريت حتى حاجات متعلقة عالحيطة في المكتب والبيت من زمان قدام عيني وماكنتش قريتها.. وتقريبًا قربت اسمع الحاجات كمان.. قربت اسمع الزرعة اللي عندي في المطبخ، وكنت بتواصل مع الناس بالكتابة واحتفظت بشوية ورق لقيت الكلام ورا بعضه في سياق مسخرة مش مفهوم بالمرة.. أما الورقة اللي كنت بكلم فيها مراتي لقيت فيها 3 جمل بس.. (ياااه...؟ / ما هي غلسة وتستاهل/ وحاضر يا حبيبتي) بس.. وبيتكرروا".
وأضاف: " كنت بشاور لأولادي.. وفهموني.. وما اضطريتش ازعق في البيت.. والدنيا كانت ماشية.. معناه إن لو القانون إن بابا مش بيزعق هايترتب على القانون ده إن كلنا هانسمع الكلام من غير زعيق الصمت محتاج صبر.. وعدم التعبير بالكلام محتاج بلاغة.. مش في إنك تعرف تشاور.. لأ.. محتاج بلاغة في اختيار الكلمة اللي هاتشاور بيها عشان تلخص كل كلامك والناس تفهم".