مي عبد الهادي تكتب: الشاويش عطية

مش عارفة اللي هقوله ده هيرفع ضغطك كأم ولا؟ ???? بس والله أنا نيتي خير إذ ربما تراجعي نفسك.
كلنا كأمهات شايفين نفسنا عاملين اللي علينا تجاه أولادنا بنتضايق اوي إنه النتيجة وجع قلب برضو ومفيش سمعان كلام غير بطلوع الروح، دايما مستهلكة وطاقتك خلصانة في مناهدة ومحايلة وصويت وتشنجات علشان بديهيات المفروض الطفل يعملها من تلقاء نفسه أساسا وتبصي كده على البرامج الأجنبي تتحسري هو العيال إزاي بيسمعوا الكلام كده ومعتمدين على نفسهم أوي كده، الموضوع كبير على فكرة، مبدئيا كده هل فكرتي وجهة نظر ابنك فيكي إيه؟ أيوة متستغربيش هل فكرتي هو شايفك ازاي؟؟
ابنك شايفك "أشكيف وهلاكو والشاويش عطية كمان" وصويتك وصريخك خد منهم مناعة فهو عايش في أمان مع نفسه، صوتي للصبح ولا حياة لمن تنادي، إنتي بالنسبة له الوش اللي بيبوز في وشه طول اليوم وبينغزه يفوقه من أحلى نومة علشان ينزل على ملا وشه يروح مدرسة عبارة عن مكان عقيم لحشو معلومات وقبل ما ينزل تقوليله: "بلكنة تهديدية عارف لو مخلصتش سندوتشاتك؟ عارف لو مركزتش مع المس بتاعتك؟ عارف لو ضيعت أقلامك؟عارف لو ضربت أصحابك؟ والله لاوريك ايام سودا"، وبعدين تلطعيه بوسة وانتي مدية نفس البوز، يرجع من المدرسة يلاقيكي في وشه بنفس البوز اياه: "اتفضل غير هدومك خلصني ساعة بقى علشان تغير يا ابني بلاش مناهدة يا ابني يلا خلصني هو انا مقطوعالك طول اليوم؟".
ولو فكر يعترض على أكلة، تبدأي بقى تلاقي مبرر للانفجار في وشه: "إنت عارف أنا تعبت نفسي أد إيه علشان اعملك الأكل ده؟ عارف لو الطبق مخلصش؟ عارف لو مسمعتش الكلام؟ مالها المسعقة مش فاهمة ده البتنجان كله حديد"، تخلي الطفل يطلع من هدومه وعلشان يريحك يروح يبلعلك مسامرين علشان فيهم حديد مفيد لجسمه.. والغريب إنك وانتي في سنه كنتي مطلعة عين مامتك في الأكل برضو.
نيجي بقى لفقرة الهوم ورك وده بقى بيبقى شو أوبرالي، غالبا الجيران بيتدخلوا في الآخر من كتر الصويت والتشجنات اللي بتحصل منك علشان ابنك يعمل واجب عقيم.
بعدها فقرة النادي والتمرين، تلاقي الطفل مامته سحلاه من إيده ويلا معاد التمرين: "خلاااااااااااصني الكابتن هيزعق يلا اجري اسرع خلينا نلحق يلا يازفت يلا يا نيلة، اللهم طولك يا روح".
ولو الطفل في وسط الروتين المأساوي ده فكر يفك عن نفسه ويلعب شوية مع صحابه بعد التمرين يلاقيكي برضو بتصوتي: "يلا يا زفت يلا يا ابني هتسمع صوتي للناس يلا خلصني علشان تلحق تنام ورانا مدرسة بكره".
فقرة ما قبل النوم بقى: "نااااااااااام خلصني يلا عندك مدرسة ما هو لازم تطلع روحي في الصحيان خلللللصصصصننننننني، طيب بالله عليكي فين علاقتك بابنك، فين استمتاعك بفكرة الأمومة؟؟ فين لعبك معاهم وحواديت قبل النوم فين استمتاعهم بطفولتهم؟".
الكلام له بقية