اتكلمنا فى المقال اللى فات عن أهمية العقل.. وعلى فكرة ناس كتير بتقول على العقل البشرى أنه (مصباح علاء الدين) اللى مع كل واحد فينا.. واللى بيوفرلنا أسباب التعاسة أو السعادة وكل ده بناء على قرارنا احنا. طيب أزاى بقى نشغل مخنا حسب رغبتنا وأزاى نخليه يساعدنا فى حياتنا؟ عشان نجاوب سؤال زى ده هقول تشبيه بسيط عشان نتخيل الحكاية اكتر.. تخيل معايا كدة الكمبيوتر اللى عندك فى البيت هتلاقى انه بيتكون من (هاردوير+سوفت وير) يعنى مينفعش الكمبيوتر يشتغل من غير سوفت وير وإلا يعتبر قطعة من الحديد لا فائدة منها.. تعالوا بقى لكل شخص فينا هنلاقى نفس القصة.. كل انسان مكون من مجموعة أعضاء ومخنا هو اللى بداخله السوفت وير اللى بيبعت إشارات للاعضاء دى عشان تشتغل. يعنى لما تقرر إنك تحرك دراعك.. هتلاقى مخك بالبرمجة الربانية بداخله بيدى الإشارات عشان دراعك يتحرك.. طيب وبالنسبة لتصرفاتنا فى الحياة؟ هنلاقى مخك برضه هو اللى بيحلل ويفكر ويقرر.. طيب برضه التحليل والتفكير ده بيكون بناء على إيه؟ الاجابة بكل بساطة هى البرمجة.. كل انسان مننا هنلاقى انه بيتولد خام أو زى الهارديسك الفاضى ويبتدى اهله فى الاول يبرمجوه او يعطوه معتقداتهم عن الحياة.. مثل (الدنيا صعبة - الجواز عاوز فلوس كتيير - اللى يضربك اضربه - كل المتزوجين قرفانين فى عيشتهم) ده غير طبعا المشاكل اللى بيشوفها بين والده ووالدته وبناء عليه بيعرف فعلا أن المتزوجين دايما عايشين فى مشاكل.. وهنلاقى حديث شريف لسيدنا محمد بيقول فيه: "كلُّ مَوْلُودٍ يُولَدُ عَلَى الْفِطْرَةِ فَأَبَوَاهُ يُهَوِّدَانِهِ أَوْ يُنَصِّرَانِهِ أَوْ يُمَجِّسَانِهِ".. يعنى ابواه هما اللى بيعطوه معتقداتهم وبناء عليه يفكر على أساسها. بعد كدة الطفل بيروح المدرسة ويقابل اطفال ومعلمين ويبتدى يستمد برمجته منهم وهو لا يفرق أن كانت برمجة خاطئة أو صالحة.. وفى سن السابعة أو أكثر بقليل نجد الطفل وقد امتلأت ملفات عقله تماما بالمعتقدات عن الحياة اللى هيتصرف بيها بقية حياته.. إن لم يقرر هو شخصيا انه يغيرها.. وبقولها تانى تغيير المعتقدات والافكار بيكون بقرار شخصى يعنى لو زوجة فاكرة انها هتغير زوجها فى المستقبل فدى تبقى غلطانة.. لازم تتقبليه كما هو بمميزاته وعيوبه.. لأن محدش بيغير حد حتى الخالق نفسه مش هيغيره الا لو هو قرر وهنلاقى الاية الكريمة بتقول: (إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ). كتير بقى من العلماء بيقولوا إن 50% من حل المشكلة انك تعرف اساسا إنك عندك مشكلة.. يعنى لو عرفت ان عندك معتقدات غلط بخصوص الزواج - المال- الصحة.. أو أى مشكلة بحياتك عموما، هتبقى المشكلة دى اتحلت بنسبة النصف تقريبا.. وبعد كدة الحل بيكمل بشوية خطوات بسيطة. تمرين النهاردة بقى: لو مشكلة معينة بتقابلك وهنفترض مثلا انها عن الزواج، هتجيب ورقة وقلم وتكتب كلمة الزواج، وتكتب تحتها كل المعتقدات اللى بداخلك عن الزواج سواء حلوة أو وحشة، وبعدين تبتدى تحذف المعتقدات السلبية وتحل محلها بالمعتقدات الإيجابية.
