محمد رمضان عن إساءته ل «إسماعيل ياسين»: التصريح مستفز وعمر ما كان ده رأيي

قام الفنان محمد رمضان بنشر فيديو عبر صفحته على موقع التواصل الاجتماعي "فيس بوك"، يوضح فيه حقيقة تصريحه عن الفنان الراحل اسماعيل ياسين، بأن أفلامه تسئ للجيش والجمدي المصري.
وقال محمد رمضان خلال الفيديو الذي نشره "كل سنة وانتم طيبين وعيد سعيد عليكم وعلى الشعب المصري والوطن العربي جميعًا.. بالنسبة للتصريح اللى نزل النهارده، على إن أفلام الأستاذ إسماعيل ياسين تسئ للجندى المصرى .. حق التوضيح إسماعيل ياسين ده أكتر ممثل يضحكنى فى الدنيا وأغانيه كلها حافظها .. ويشهد على كلامي الأستاذ أيمن بهجت قمر .. وقد ايه بنقعد نراجع حفظنا لأغانى الأستاذ إسماعيل ياسين من "ماتستغربش" و"السعادة" .. وكل المونولوجات العظيمة اللي عملها .. وكل اللى يعرفونى عن قرب عارفين مدى حبى للنجم الكبير الأستاذ إسماعيل ياسين".
وأضاف: "ولكن السؤال كان هل فى مخططى أنى أعمل فيلم عن الجندى المصرى؟ .. فقلت : لأ الأفلام دي اتعملت .. وأنا حابب إنى أعمل أفلام تبين هيبة الجندى المصرى ومدى انضباطه ومدى التزامه ومدى انتمائه للجيش ومدى انتمائه للبلد .. ده كان ردي، إن أنا مش عاوز أعمل العسكرى اللى اللبس واسع عليه و"الآيش معووج"، واللي فهمه بطىء، لأ أنا عايز أعمل الجندى المصرى كما ينبغى أن يكون، فالرد طبعا أو التصريح مستفز جدًا وملوش علاقة بشخصيتى، وعمر ما كان ده رأيي في الأستاذ اسماعيل ياسين، ده نجم كبير جدا ومن أهم رموزنا كمصريين، وبس ده توضيح وأرجو أن أسرة النجم الكبير الاستاذ إسماعيل ياسين يوصل لها حق الرد بتاعي وتوضيحي على التصريح اللي اتكتب".
واختتم قائلًا "ده تصريح فقط لكى يشد القارئ وحضراتكم كلكم لازم ما نخدش بالعنوان من بره ونحاول نوصل لرؤية الشخص في الجملة اللي اتاخدت، وكامل احترامى للنجم إسماعيل ياسين وكل رموزنا الفنية القديمة والموجودة دلوقتي كلهم نجوم كبار وأنا أتعلم منهم من أقدم واحد لأحدث واحد فيهم".