مارينا ماجد تكتب : 'الأحلام"

-ناس كتير لما بتيجي قدامها كلمة "أحلام" دي، معظمهم بيجي فى بالهم أنهم يجيبوا مجموع فى الثانوية العامة مثلاً أو أنهم يدخلوا الكلية اللي نفسهم فيها وينجحوا، وفي ناس بتحلم أنها تكون معاها فلوس كتيييييييير، وفى ناس تانية بتحلم أنها تعيش مرتاحة البال....
- كل دى أحلام وحلو أن الواحد يكون عنده أحلام أو حاجات بيحبها ونفسه جدا يحققها، بس للأسف أوقات كتير عمر ما بيجى فى بالنا "الأحلام التافهة"، إيه ده معقول فى حاجة إسمها "أحلام تافهة"!
- مرة كنت بتكلم مع واحد قريبي، وبقولوا أنا نفسي أوى أتعلم أزاي أحط "ميك آب" وأخد كورس في المجال ده، قام قالي إيه كورس ميك آب ده، بدل ما تفكري إنك تاخدي كورس "إنجليش" ينفعك، قولتلوا ماشى أنا كده كده هأخد كورس "انجليش" بس فيها إيه يعني إني أتعلم الميك آب، انا حابة الموضوع جداً، لقيته قام بصلى بإستغراب وبتفاهة شديدة!
بصراحة أنا ساعتها إتغاظت جدا، وجبت فيديوهات من على ال"يوتيوب" وإتعلمت أزاي أعمل ميك آب، وفعلا الموضوع ده فرق معايا وبيبسطني جدا كمان!
- كل واحد فينا عنده حلم سواء كان صغير أو كبير، حلم عارف إنه لو حققه هيغير فى حياته كتير، كلنا عندنا الجاجة دي تقريبا، حاجة ملزمانا فى كل حتة، حاجة بنفكر فيها طول الوقت، وللأسف واقفين لسبب ما أحنا منعرفوش، جايز خايفين أننا نحاول ونفشل، جايز مجاتش فرصة، أو يمكن فاكرين نفسنا ضغفا ومش قد الموضوع.
- في كتاب أسمه "القلب الواعى" لأوسم وصفي، كان بيقول فيه حاجة حلوة أوى بمناسبة إنك تحقق هدفك (حلمك) :
الشخص الإيجابى ليه هدف بيبص له دايما ويتحرك ناحيته، لو مثلا كنت بأجري بسرعة علشان الحق الأتوبيس، إذا شفت صندوق كبير فى الطريق حانط بسرعة من عليه علشان أوصل للأتوبيس، علشان قلبي متعلق بالهدف (الاتوبيس) رجلى حاتنط من فوق الصندوق بسهولة، لكن لو مافيش أتوبيس عايز أوصل له، هاقف قدام الصندوق وأشتكى وأتذمر وأتخانق وأزهق، اللى عنده هدف مخه بيدور على طول على الحل أكتر ما بيقف قدام المشكلة.
- متوقفش حلمك على حد، ومتنتظرش أن حد هيقوم يخدك من إيدك و يقولك تعالى نحقق حلمك.
حلمك إنت اللى هتحققه مش حد غيرك، إبتدي من دلوقتي مش بعدين، وبطل تأجل حلمك، لأنك لو فضلت تأجل فا عمرك ما هتحققه، ومش عيب أن حلمك يتاخر وإنك تفضل تسعى علشان توصل لحاجة ومتوصلش، لا، مسيرك فى يوم هتوصل للى أنت عايزه وتحقق حلمك، بس أفضل مستمر ومتزهقش وأمسك فى حلمك مهما كان هو إيه، حتى لو هيتقالك إيه التفاهة دي!
_ فى وسط زحمة الناس والأفكار والروتين اليومي اللى أحنا عايشين فى كل يوم ده، محتاجين "مخدر" ويمكن يكون المخدر ده هو حلمك التافهة مش اللي نفسك تحققه بقى لا، اللى نفسك تعيشه.
_ ولو فى ناس شافت الموضوع وقعدت تفكر وملقتش أن عندها حاجة بتحبها ونفسها تحققها، دى فرصة حلوة أوى علشان تفكر وتشوف هى عايشة ليه و بتعمل إيه وإيه هدفها، ومن الوقت ده تركز وأكيد هتعرف إيه الحاجة اللى نفسها تعيشها.
إمسك فى حلمك التافهة وأسعى إنك تعيشه فى كل يوم من حياتك، ولو إنت فضلت متمسك بيه هيجيلك يوم وهتعيشه، صدقني هتعيشه بس حاول و متيأسش!