ما بين العند و الكبرياء ....لابد ان يضيع الحب!!!

الحب هو اجمل حاجة في الدنيا حاجة كده عاملة زي المياه والهواء متقدرش تعيش من غيره ومش هبالغ لو قلت عليه انه من ضروريات الحياة الحب مسئولية لو حبيت بجد هتحس بده هتحس ان حبيبك ده مسئول منك مسئولية كاملة وان انت كمان مسئول منه يعني لو جيت تخطي في حاجة غلط هتفكر مليون مرة قبلها ولو الحاجة دي هتضرك مش هتقبل تعملها لانك مش هتقبل تجرح حبيبك او تضايقه و تزعله عليك لو جرى لك حاجة بعد الشر وحشة لو بتحب بجد هتحس ان حبيبك معاك في كل لحظة وكل ثانية معاك فين ما تروح فاستحالة هتعمل حاجة تزعله لانك هتقدره في غيابه قبل وجوده
بجد استحالة الانسان يعيش بدون حب حتى اللي مش عايش قصة حب بيتمنى يحب بجد او ممكن يكون عايش قصة في خياله لحد ما ربنا يسهلها وتبقى واقع!!
العند اوحش حاجة في الدنيا وممكن اوي يزعل الناس من بعض لان اصرارك على رأيك حتى لو كان غلط هيخسرك اكتر ما هيكسبك ثم ان ديننا بيقول"امركم شورى بينكم" و استحالة ان يكون انت صح طول الوقت وكل اللي حواليك غلط اعتقد انك مش هتخسر حاجة لما تراجع قرارتك قبل ما تصر عليها خصوصا لو لقيت ناس كتير شايفة انك غلط احنا مش ملائكة احنا بشر ومش عيب اننا نغلط لكن عيب اننا نصر على الغلط ونكرره كذا مرة ومش نتعلم منه
تفتكروا بقى اجمل حاجة في الدنيا"الحب" ممكن تجتمع مع اوحش حاجة في الدنيا "العند"؟؟!!
من وجهة نظري عمره ما ينفع ولا يكون...ازاي هيتجمع ملاك مع شياطن!!حاجة بتهدف للخير مع حاجة بتهدف للخراب!!!
الحب مفيهوش عند لان العند هيهدم اي حاجة حلوة ازاي تبقى بتحب حد وتعمل حاجة ممكن تفرقكم عن بعض؟؟ اللي بتحبه ده المفروض انه شريك حياتك يعني بيشركك في كل حاجة تخصك فمش ينفع تكون انت المتحكم الاول و الاخير في العلاقة بينكم...ممكن في شباب كتير ترفض انها تسمع او تاخد حتى رأي البنت اللي بتحبها يعني بيطبقوا مبدأ" مش همشي ورا كلام واحدة وانا الراجل واللي عاجبني وفي مزاجي هعمله"مع ان ده غلط انت لو عملت كده يبقى بتلغي وجودها من حياتك لكن لو خليتها تشاركك في قرارتك هتحسسها انها فعلا مهمة ولها قيمة في حياتك فعلا شريكة حياتك بمعنى الكلمة ياعم راجل على عينا و راسنا بس محدش معصوم من الغلط وبعدين لما تقعدوا تتكلموا مع بعض حتى لو خلاص واخد قرار ممكن تطلع بفكرة جديدة احسن من اللي في بالك ثم لما تقعد تتكلم مع حد بتحبه في موضوع كأنك بتفكر بصوت عالي ده احسن بكتير على الاقل ممكن حبيبتك دي تنبهك لغلطة كنت هتقع فيها وبعد ما تتكلموا مع بعض تتفقوا على الصح واللي لازم يتعمل و تنفذوه ونفس الكلام للبنات برضك
حتى لو هتعند مع الكل مش لازم تعند مع اللي بتحبه لازم تسمع رأيه وتعرف انه اكتر حد بيحبك و بيخاف عليك ويهمه مصلحتك و لو اخترت العند يبقى انسى الحب والعكس صحيح!!
لان استحالة الحب والعند هيتجمعوا مع بعض في علاقة واحدة لازم واحد فيهم هيقضي على التاني...وطبعا بتمنى انتصار الحب على العند ولا رأيكم ايه؟؟؟
وكمان وده شىء مهم جدا لازم مش تفرق بين كرامتك وكرامته ياعنى مش كل حاجه نقول كرامتي فوق الحب انا اتحدى حد حب بجد ولم يتنزل ويسامح ويعفو حتى لو كان هو مش غلطان الحب اقوى من كل شىء مفيش كرامه بين الاحباب.... كرامه الاحباب كرامه واحده فمش معقول حد هيرضى يهين كرامته لابد ان يكون حبيبين عايشين بروح واحده مش يكون كل حد عايز يعاند ويثبت انه هو اللى هايمشى رايه ولزم يحس ان حبيبه زى مابنقول خاتم فى صباعه .. الحب تضحيه وعطاء مش عند ابدا وكبرياء .. لامانع ابدا ان يتعصب عليا حبيبى مثلا وانا مش غلطان واتحمله واقدر اسيطر عليه بابتسامه وامتص غضبه والعكس عندما اكون فى وضعه يتحملنى ويمتص غضبى بالبلدى زى مابنقولها دايما لو هو شد انا ارخى ولو انا شدت هو يرخى .. هو ده الحب لايختلط الحب بالعند كما لايختلط الزيت بالماء .. لان عندما يدخل العناد ضاع الحب وتفرقت الاحباب .. فاتمسك عزيزى يامن تحب بالحب وتنزل عن الكبرياء والعند فالحب جوهره ثمينه فى هذا الزمان فاذا وجدت حب حقيقى وضيعته فانتا ضيعت كنز ثمين ساتندم عليه طول حياتك فلا اريد ان اقول مستحيل تحب تانى فالله قادر على فعل كل شىء ولكن اقول صعب جدا تعوض حب حقيقى فى هذا الزمن.. تنازل صديقى عن العناد حتى لاتسير انت وحبيبك فى طريق البعاد.. تنزل عن الكبرياء فهو مرض والحب الدواء. فان ضاع حبيبك فأين ساتجد الوفاء ؟؟
نصيحة لو لقيت حب حقيقي اتمسك به ومش تفرط فيه ابدا واتنازل عن كل شئ هيهدم الحب ده.
للاعلان عبر موقعنا برجاء مراسلتنا على الايميل التالي:
elgomaaservices@yahoo.com
انتظروا قريبا على موقع الجمعة قسم الخدمات الالكترونية ( سوق السيارات – سوق العقارات – مطلوب عروسة- تفسير احلام – فتاوى دينية – العاب بنات – العاب طبخ – العاب فلاش – العاب سيارات – العاب باربي )