مقاطعة اللحوم بدمياط تأتى بنتيجة عكسية وغليان بأسعار الدواجن والأسماك

دعوات أطلقها العديد من المواطنين لمقاطعة شراء اللحوم الحمراء فى أماكن عدة منها مدينة دمياط،وذلك أملا فى أن يستجيب الجزارون ويتم تخفيض الأسعار بما يناسب دخل المواطنين حتى يتمكن الناس من شراء اللحوم الحمراء كما كان يحدث فى الماضى .
ولكن بعكس ما كان متوقعا من الحملة المدشنة منذ ما يقرب من إسبوع ،تظل أسعار اللحوم الحمراء كما هى 85جنيه للكيلو ،ولم يتراجع الجزارون عن الأسعار الحالية وحجتهم أن الزيادة من تجار المواشى ومن المربيين بسبب إرتفاع أسعار الأعلاف وبالتالى هو غير مسؤل عن أى زيادات فى أسعار اللحوم لأنه يشترى بأسعار مرتفعه،أيضا ولأن الكثير من المواطنين لم يتحمسوا للحملة ولم يشاركوا فيها فظل الوضع كما هو بالنسبة للحوم الحمراء ،ولكن كان لدعوات المقاطعة نتائج عكسية على اللحوم البيضاء والأسماك التى إرتفعت أسعارها عقب إنطلاق تلك الدعوات بإعتبار أنها البديل الأساسى للحوم الحمراء، أيضا جاءت تلك الدعوات فى صالح اللحوم الحمراء المجمده التى شهدت إنتعاش وإقبال ملحوظ من الكثير من المواطنين فرفع بائعوها أسعارها أيضا .
محمد عرفى سائق يقول ،سمعنا عن دعوات مقاطعة اللحوم ،ولكن إحنا فعلا مقاطعين طبيعى يعنى لأن مش أى حد هيقدر يشترى كليولحمة ب85أو 90 جنيه واللى عنده أربع أولاد أكيد مش هيجيب أقل من كيلو ونص ،يعنى بنتكلم فى حوالى 130جنيه دا غير باقى تكاليف الأكله ،وبنتكلم برده عن أكله واحده فى يوم واحد ،بصراحه كتير جدا بيعتمد على اللحوم المجمده وأهى بتمشى لكن المشكله إن لما قالوا مقاطعة اللحوم البلدى الكل توقع إن يبقى فيه إقبال كبير على المجمد فرفعوا سعرها هى كمان بعد ما كنا بنشتريها ب32جنيه من سنه تقريبا النهارده بقت ب42و45جنيه ،وبرده يفضل اللى بيشترى لحمة بلدى من عند الجزار بيشترى زى ما هو ومتأثرش بحاجه ،يبقى بدل كل شوية ما يقولوا مقاطعة ويغلوا لنا الحاجات التانيه يشوفوا حل حقيقى للموضوع لأن الغلابة بجد نفسهم ياكلوا لحمة ويحسوا إنهم بنى آدميين .
وتضيف سعاد مقلد ربة منزل ،إحنا مش بنشترى لحمة من عند الجزار من زمان أوى وبنعتمد على المجمد لو حبينا ناكل لحمة ولكن معظم أكلنا من اللحوم فراخ وسمك وللأسف هما قالوا مقاطعة لحوم من هنا وكل حاجه غلت من هنا الفراخ البيضا بقينا نجبها ب26جنيه للكيلو بعد ما كانت ب21جنيه والسمك كمان أسعارة زادت جدا لأن الإقبال زاد عليه شوية ،كليو البلطى من 12جنيه بقى ب18جنيه وحسب الحجم والبورى برده من 16جنية اللى هو الصغير بقى ب22جنيه وبرده حسب الحجم ،واللحوم المجمده سعرها زاد هى كمان وبقت ب42أو 45جنيه ،يعنى إحنا مستفدناش حاجه من دعوات مقاطعة اللحوم ،لأن أسعارها زى ما هى وإحنا اصلا مش بنشتريها والله وزودوا علينا اللى كنا بناكله .
أما على .م.خ.صاحب محل مجمدات بدمياط ،يقول عقب الدعوات لمقاطعة اللحوم شعرنا بإقبال نسبى على اللحوم المجمده والفراخ وكان من الطبيعى أن يرفع التاجر الأسعار فتم رفعها ،ومن جهة نظرى ،والكلام لعلى ،أن المستفيد الوحيد من هذه الدعوات منافذ البيع التابعة للقوات المسلحة والتى تبيع لحوم مجمده ولكن يشتريها المواطن على أنها بلدية والناس تثق فى المكان ولكن من خلال عملى لم ألاحظ أن زار المحل لشراء اللحوم الحمراء المجمده إلا زبائنى المعروفون لدى المحل ويظل من يشترى من عندالجزار كما هو يشترى و لا يتأثر بأسعار لأن حالة أفضل من غيرة بكثير .