إحتفالات دمياط بقناة السويس الجديدة بين التأييد والإتهام بالتهويل

من المؤكد أن الشعب المصرى كله يطوق لمشاريع كبيرة يعود النفع منها على المواطن البسيط، ليشعر بتحسن فى مستوى معيشته ورعاية الدولة له ،بتوفير الدعم اللازم لإستمرار الحياة ،ولمساعدتة فى التغلب على متطلبات الحياه اليوميه ،ولأن الكل يعلم أن الدولة يلزمها دخل قومى كبير وثابت من مشاريع كبيرة تعمل على نقل الإقتصاد المصرى نقلة نوعية فى إتجاه رفع الدخل القومى لوقف نزيف الإستدانه التى ترهق ميزانية الدولة ولا يدفع ثمنها إلا المواطن البسيط الذى يتضرر من تخفيض قيمة الدعم وضعف الخدمات المقدمه له ورعاية الدولة له.
ومن أجل ذلك أظهرت شرائح كثيرة من الشعب المصرى فرحها الشديد بما يطلق عليه قناة السويس الجديدة إيمانا منهم بأن المشروع سيحدث نقلة نوعية فى الإقتصاد بزيادة الدخل الوارد من القناة على إعتبار أنها قناة جديدة كما تروج وسائل الإعلام المحسوبة على النظام .
وكان لمحافظة دمياط نصيب فى التجهيز لعمل إحتفالات تعم المحافظة إحتفالا وإبتهاجا بإفتتاح القناه الجديدة على حد زعم وسائل الإعلام ،فتزينت المحافظة ومبنى ديوانها بالأنوار وصور رئيس الجمهورية ،وتزينت الشوارع والميادين ،وتقام يوميا منذ الجمعة الماضية الحفلات الغنائية بحضور السيد محافظ دمياط وكبار رجال المحافظة والعديد من المواطنين .
ولأن الأمر يخص المواطنين إستطلعت البديل أراء عدد من مواطنى المحافظة حول ما يحدث من إحتفالات وزينة أنفق عليها الكثير وأيضا حفلات سينفق عليها الكثير هل من ورائها طائل وهل هى مناسبة للظرف الإقتصادى الذى تمر به البلاد أم لا؟
محمد خالد سعد موظف يقول ،أكيد لازم نفرح لما يبقى فيه مشروع كبير هيتم إفتتاحه ويزود الدخل القومى للبلاد ،ويعود بالنفع على المواطنين الغلابه ،ويزيد الدعم المقدم لهم ،وطبعا اللى ما يفرحش لكدا يبقى مش بيحب البلد ،لكن هو اللى بيحصل اليومين دول معناه إيه وليه ،هما بيقولوا إفتتاح قناة السويس الجديده ،والسؤال على أى أساس اطلقوا عليها قناة سويس جديده .يعنى هى واصله بين البحرين الأبيض المتوسط والبحر الأحمر وماشية بالتوازى مع القناة القديمه ؟ وطبعا الإجابة لأ .هى مجرد تفريعه ،زيها زى ست تفريعات إتعملت فى القناه قبل كدا فى كل العصور ومتعملش لهم الضجة اللى معمولة دى ،ربما تكون التفريعه مهمه للقناة ،ولكن ميصحش يقولوا عليها قناة سويس جديدة لأن قناة السويس اللى العالم كله يعرفها طولها 193كيلو من فتحتة البحر الأبيض المتوسط فى بورسعيد حتى البحر الاحمر فى السويس مرورا بالإسماعيلية ،والتفريعه الجديدة طولها 35كيلو يبقى إزاى نقول عليها قناه جديده ،ميصحش مفروض نعطى لكل شئ قدره علشان منوهمش الناس بحاجه مش هتحصل ،وللأسف الناس نسيت الضجة اللى عملها الإعلام أيام مبارك على موضوع مشروع توشكى ،والجرايد والمنشطات لسه موجودة وهى نفس المنشطات ونفس الكلام الكبير أوى ،يعنى أنا عاوز حد يفهمنى إزاى قناة السويس دخلها السنوى حوالى 5مليار دولار وييجى واحد يقولى التفريعه الجديده هيبقى دخلها 100مليار دولار ،طبعا كلام مش منطقى وغير مقبول وأحلام او ضحك على الناس وتخديرهم وبس .
أما عامر سعيد موظف أيضا فيخالف محمد الرأى ويرى أن القناة الجديدة هى مشروع قومى عملاق ،إستطاعت الدولة أن تنجزه فى وقت قياسى بالنسبة لحجمة ويرى أيضا أنها ستكون سببا فى عمل نقله نوعيه كبيرة فى الدخل القومى للبلاد مع زيادة السفن التى ستعبر القناة بعد إفتتاحها .
طلعت عبد الحليم يرى الموضوع من منظور آخر ويقول ،حتى لو أنه تم بالفعل عمل قناه جديده كما يقال ،ما يحدث الآن من إنفاق على الزينة والإحتفالات وتعطيل الناس عن أعمالهم و الوهم الكبير الذى يصدر للناس هو خطأ بلا شك ، يعنى مثلا الزينة اللى على مبنى المحافظة مصروف عليها منين وكل يوم حفلات وأغانى وسهر بحضور المسؤلين ،وللأسف البلد فيها حاجات كتير ناقصه محتاجة متابعة المسؤلين علشان البلد تتقدم ،لانها مش هتتقدم بالحفلات والأغانى ولكن بالعمل والمتابعة ومحاسبة المخطأ ،وكمان فيه ناس كتير أولى بالفلوس اللى بتتصرف على الزينة وعلى الحفلات وبعدين لما القناه أو التفريعه تشتغل وتجيب دخل فعلا نبقى نحتفل من دخلها مش نستدين ونطلب من الشعب يتبرع علشان نعمل حفلة ،دى حاجه مش فى وقتها خالص ،يعنى بصراحة التكلفة اللى بتتصرف على الحفل حرام فى الظروف الل بتشوفها البلد ،يعنى مفيش مفيش ،ونلاقى مصروفات مهولة على حفل إفتتاح كانوا يأجلوا الكلام ده لما القناه تجيب فلوس بس.
وفى رده على الإنفاق على الزينة والحفلات قال الدكتور اسماعيل عبد الحميد طه محافظ دمياط فى تصريح خاص للبديل أن جميع المصروفات التى أنفقت على تزيين مبنى ديوان عام المحافظة هى تبرعات من رجال أعمال وليست من خزينة المحافظة ،وكذلك الحفلات التى تنظم هى أيضا من تنظيم رجال أعمال على نفقتهم الخاصة ولم تنفق المحافظة عليها مليما واحدا من خزينتها .
وأكد المحافظ أن المشروع من الأهمية بمكان ويعتبر أحد أهم المشاريع القومية فى الوقت الراهن ،ويراهن على أن المشروع سيزيد من دخل قناة السويس وسيحدث نقلة فى الدخل القومى للبلاد .