العناية المركزة بمستشفى عزبة البرج بدمياط مغلقة لغياب الأطباء

مازال مسلسل الإهمال فى خدمات المواطنين مستمر بمستشفيات محافظة دمياط، مستشفى مركزى ضخم بمدينة عزبة البرج تعدت تكلفة تطويره ملايين الجنيهات ليخدم مئات الآلاف من مواطنى مدينة عزبة البرج، فوجئ أهالى المدينة بأن قسم العناية المركزة بالمستشفى المركزى مغلق والسبب عدم وجود أطباء للقسم.
يقول محمد .ع، من أهالى عزبة البرج، وعدنا وكيل وزارة الصحة من قبل بانتداب أطباء من الوحده الصحية الموجودة بمنطقة الملقا لسد العجز بالمستشفى المركزى وللاستفادة منهم فى فترة المساء لتشغيل العيادات الخارجية للمستشفى وهو مالم يحدث ولم يوف الرجل بوعده ولا بعهده معنا ، ليساهم فى إهدار ملايين الجنيهات تبرع بها أهل الخير لتطوير المستشفى وتجديدة ليستفيد منه أبناء المدينة .
ويضيف مدينة بحجم عزبة البرج وأهميتها، فهى تعتبر واحدة من أهم مدن المحافظة لأنها الرافد الأساسى للأسماك بدمياط وعدة محافظات كون معظم أهالى المدينة يعملون فى الصيد ويملكون أكبر أسطول صيد فى المنطقة ومع ذلك دائما حقوقنا مهدرة حتى الأساسيات ،صحة المواطن ،عندنامستشفى مركزى على مساحه رائعة ومجهز بطريقة ممتازة وللأسف الشديد اللى يحتاج عناية مركزة يروح على أى مستشفى تانى فى مدينة دمياط لأن اللى عندنا أغلقوها لأن مفيش أطباء ،هو ده كلام يعقل.
خالد صادق، يقول "المستشفى تقع فى مكان جيد ومجهزة بطريقة جيدة لكن للأسف تفتقر للأطباء، ومن يحضر منهم يكون هدفه هو تحويل المرضى إلى عيادته الخاصة، متسائلًا أن القادر يدفع تمن الكشف، ولكن ماذا يفعل الفقير ويذهب لمن، لافتًا لوجود أطباء بالمستشفى تحاسب المرضى على الكشف وكأنها فى عيادتها من غير رقيب ولا حسيب، والمستشفى مغلق بعد الضهر، عيادات خارجية متكلفة واللى يتعب بالليل ميلاقيش حد ينقذة مين يرضى بالكلام ده ،وإمتى بقى الحكومة هتاخد بالها من الناس الغلابة اللى متقدرتش تدفع كشف دكتور خارجى ومضطرة تروح تكشف بالمجان اللى معتش مجان أصلا ،الغلابة هينفجروا ومحدش هيعرف يوقف فى وشهم ياحكومة إلحقى الناس دى لأن الكيل طفح .
أما شريف على طالب فيقول إن تعطيل قسم مهم مثل العناية المركزة لعدم وجود أطباء يعتبر إهدار للمال العام ،لأن المستشفى تكلف ملايين فى إنشاؤة وتجهيزة ،حتى يؤدى دور فى خدمة أهالى المدينة ،ولكن إذا أغلق وإضطر الناس للذهاب إلى مستشفيات مدينة دمياط بالرغم من وجود مستشفى مركزى هو إهدار واضح وصريح للمال العام وعدم الإستفاده منه .
وربما لم تكن الشكاوى من مستشفى عزبة البرج المركزى فقط ولكن أيضا هناك شكاوى عدة من مواطنين من مستشفى الأعصر التخصصى إحدى أكبر مستشفيات دمياط العامة ،حيث تقول ،ز.م.كنت مرافقة لوالدتى فى قسم النساء بالمستشفى التخصصى وما عانيناه هناك لا يدل إلا على أن الإنسان ليس له قيمه فى هذا البلد ،أولا الحمام مشترك بين قسم الرجال وقسم النساء ،وتضيف ،أبقى واخدة والدتى لدورة المياه ألاقى راجل طالع من الحمام أو العكس هو ده يرضى مين لما يبقى مستشفى زى ده وبالحجم ده ومفيش فيه دورة ميه خاصة بالنساء ،والمصيبة الكبرى إن الممرضات بتعامل المرضى أسوء معامله وده بيحصل معانا ،كل ممرضة معها ترمومتر واحد تقيس به درجة حرارة العنبركله بدون تعقيم ،وأقسم بالله ده اللى بيحصل ترمومتر واحد للكل تاخد حرارة دى ومنها للأخرى دون تعقيم ولما بسألها هو ينفع كدا قالت لى هو إنتى هتعرفينى شغلى ،أنا من خوفى على والدتى روحت إشتريت شريط بتاع الحرارة من الصيدلية ولكن الممرضة تعاند وترفض تماما إستخدامه وكل الممرضات يجاملوا بعض ويرفضوا يستخدموا الشريط اللى إشتريته طيب ليه ،هو خلاص الغلابه ملهومش قيمة فى بلدهم طيب يروحوا فين يعنى ،اللى ممعهوش يتعالج فى مستشفى خاص ولا إستثمارى يموت وخلاص ،هنقول إيه بس غير حسنا الله ونعم الوكيل.