بلال فضل للعسكري: العار لكم ولوزرائكم.. وما حدث بالتحرير “جريمة ومؤامرة” يتحمل مسئوليتها المشير

* مصابو الثورة اتسحلوا بدون ذنب.. ومالك مصطفى اللي عينه راحت كان بيناضل ضد التوريث لما كنتوا بتعظموا لمبارك
كتب محمد كساب:
حمل الكاتب الصحفي بلال فضل المشير حسين طنطاوي مسئولية ما وصفه ب”الجريمة” في إشارة لما يجري في التحرير واشتباكات المن المركزي مع المتظاهرين.
وقال بلال فضل بحسابه الشخصي على تويتر: القضية النهارده واضحة وضوح الشمس: اللي حصل جريمة يتحمل مسئوليتها شخص واحد هو المشير طنطاوي واللي يقول غير كده بيكدب على نفسه.
وتابع في تدوينات أخري: اللي بيحصل مؤامرة مكشوفة لو كان المجلس خايف على استقرار البلد ما كانش فض الاعتصام بالعنف ده لو سابوه كان كمل في هدوء.. جريمة بكل المقاييس.
وأشار فضل إلى أن ” المجلس مش غبي هو عارف إن القضية مش قضية إخلاء شوارع وميادين القضية قضية إشعال صراع يبرر بقاءه في السلطة العار لكم ولوزرائكم ولمن يساندكم”.
واستنكر فضل ردود فعل البعض تجاه تكسير سيارة الأمن، قائلا: ماحدش يتكلم عن ردود الفعل بتاعة حرق عربية الأمن من غير ما يبذل مجهود إنه يفهم اللي حصل من الأول ويشوف إزاي الاعتصام إتفض خلوا عندكو ضمير”.
وتابع : مالك مصطفى اللي عينه راحت وأحمد عبد الفتاح اللي عينه إتصابت ما أعرفهمش شخصيا بس لما كانوا بيناضلوا ضد الفساد والتوريث كنتو بتعظموا لمبارك.. كل اللي حصل ممكن تبرروه بالكذب والتدليس لكن إننا نشوف ناس لابسين مدني ملتفين حوالين شاب أعزل بيضربوا فيه دي جريمة لازم تتحاسبوا كلكو عليها.. ولما لما كانت القوى الثورية بتخطئ في قرار غير محسوب ناس كتير كانت بتنتقد عشان البلد ماتولعش النهارده اللي بيولع في البلد هو المجلس العسكري فقط.
وكتب فضل تعليقا على فض اعتصام مصابى الثورة: لا في حد راح وزارة الدفاع ولا سفارة دول ناس مصابين سلميين إتسحلوا بكل وحشية عشان تتنفذ مؤامرة لتكرار سيناريو 54 وملعون أبو اللي يسكت على ده.