رسائل النشطاء للمشير فى عيد ميلاده: “كل سنة وإنت طيب و بالمناسبة دي سلم السلطة عشان نفتكرك بالخير”

* ناشط :”عشان كده عاملين يوم اسمه يوم في حب مصر”.. وآخر: ” ليكون طمعان في الهدية اللي كان مجهزها المخلوع لجمال”
* ”المفروض يذيعوا فيلم الناصر صلاح الدين والاهرام تخرج بكرة تقول ولدت مصر يوم ولدت”
كتبت- سارة جمال:
أرسل عشرات النشطاء على الفيس بوك وتويتر رسائل معايدات للمشير محمد حسين طنطاوي بمناسبة عيد مولده، وسط انتقادات من قبل البعض للإعلان عن الموضوع تخوفا من أن يصبح مقدمة لتمجيد يوم ميلاد الحاكم كما حدث أيام مبارك .
وهنأ عدد من رواد المواقع الاجتماعية المشير بمولده ، فيما تداول الجانب الاكبر منهم رسائل تحمل مطالبهم سواء بتخلي المجلس العسكري عن السلطة أو وقف المحاكمات العسكرية ، ولم تخل تعليقاتهم مما اعتاده المصريين سخرية وطرافة ، وكان منها :
-هابي بيرث داى سيادة المشير و السنة الجاية تبقي فى بيتكوا بالكتير ...!
- يا ريت لو هيحتفل يحتفل هو و مراته وعياله، و ميعملناش أوبريت علي القناة الأولي
- السنة الجاية تكون برة الحكم ان شاء الله
- اخترناه اخترناه .. يوم ما ضرب الثورة بالجزمة واحنا معاها
- عشان كده عاملين يوم اسمه يوم في حب مصر وبيرفعوا العلم في كل المحافظات
- يا ترى هيعمل عيد ميلاده فين؟على العموم لو ما عزمناش برده هنعمل بأصلنا و نقوله كل سنة هيحصل فيها ظلم هنعمل ثورة.
- اوعي ليكون طمعان في الهدية اللي كان مجهزها المخلوع لجمال .
- كل سنة و انت طيب و بالمناسبة دي سلم السلطة بقي عشان نبقي نفتكرك بالخير
- المفروض يذيعوا فيلم الناصر صلاح الدين والاهرام تخرج بكرة تقول ولدت مصر يوم ولدت .
- عنده 79 يعنى المفروض طلع معاش من 19 سنه بس لسه فى مكانه بامر من حسنى صديقه الانتيم وعاوزينه يحاكمه ده يبقى قليل الاصل