سخرية على تويتر من إعلان فودافون “شكرا”.. ونشطاء: شكرا على قطع الاتصالات وكل شهيد مات قبل ما يكلم أهله

* أحب أشكر فودافون على إني يوم جمعة الغضب ما قدرتش أعرف أخويا عايش ولا ميت بعد موقعة قصر النيل
* شكرا فودافون انكم حتى لما كنتوا شغالين في مصر كلها يوم 25 بالليل، قطعتوا الشبكة عن مربع التحرير
* طبعاً الموظف العبقرى صاحب فكرة الحمله زمانه دلوقتي مربوط فى مخزن الشركه وبيكهربوه فى .. ودانه
كتب – إسلام الكلحي :
آثار إعلان “شكراً ” الخاص بشركة فودافون، حفيظة النشطاء على موقع التواصل الاجتماعي تويتر، الذين قاموا بعمل “هاش تاج” بعنوان فودافون شكرا “#vodafoneshokran ” للسخرية من الإعلان والتنديد بقيام الشركة بقطع الاتصالات على المواطنين يوم 28 يناير، إبان الثورة وحرمانهم من الاطمئنان على بعضهم البعض .
من جانبه قال أحد النشطاء لفودافون '' شكرا لأنكم ساهمتم في الثورة بشكل كبير بأنكم قطعتوا الاتصالات فالناس نزلت الشارع أكتر ” فيما قال آخر ” شكراً على قتل إخواتنا يوم 28 يناير'' فيما قال الناشط محمد عادل المتحدث الاعلامي لحركة شباب 6 أبريل “شكرا فودافون، لما قطعتم الخدمة عن موبيلي يوم25يناير فيه أكتر من 200 واحد إتقبض عيهم بسببكم “
وجاءت باقي رسائل الشكر الموجهة من النشطاء ل ''فودافون '' على النحو التالي :
بجد أشكر فريق التسويق لشركتكم أثبتوا إن المصريين ما نسيوش يوم 28 يناير .
أحب أشكر فودافون على إني يوم جمعة الغضب ما قدرتش أعرف أخويا عايش ولا ميت بعد موقعة قصر النيل وعشت أصعب ساعات في عمري .
شكرا فودافون شبكة واحدة فرقتنا كلنا وقطعت الاتصالات عننا .
شكرا علي كل شهيد مات قبل ما يكلم امه و ابوه .
شكرا لأنكم ساهمتم في الثورة بشكل كبير بأنكم قطعتوا الاتصالات فالناس نزلت الشارع أكتر .
اشكر فودافون عشان لما أفرج عني ف 28 يناير ما عرفتش أوصل لأمي وأبويا ولأهلي .
شكرا فودافون انكم حتى لما كنتوا شغالين في مصر كلها يوم 25 بالليل، قطعتوا الشبكة عن مربع التحرير.
شكرا بجد بسبب قطعكم للاتصالات اكتشفنا اننا ممكن نعيش من غير موبيلات. . وكانت احلي ايام فالعمر كمان .
كان ممكن اي حد من عندكوا يطلع يعتذر لأهالي الشهدا ويقدم تعويض مادي بدل ما مانتوا بتعملوا إعلانات تافهه.
طبعاً الموظف العبقرى صاحب فكرة الحمله زمانه مربوط فى مخزن الشركه وبيكهربوه فى .. ودانه