نوارة نجم: "فين الفلوس بتاعة الكفالات"

دشنت الناشطة السياسية نوارة نجم، مع مجموعة من النشطاء، هاشتاج بعنوان "فين الفلوس بتاعة الكفالات"، وذلك عقب قرار النائب العام بإخلاء سبيل الإعلامي باسم يوسف بكفالة 15 ألف جنيه، بعد التحقيق معه بتهمة إزدراء الأديان وإهانة الرئيس.
وقالت "نوارة" في تغريدات لها على موقع التواصل الاجتماعي "تويتر": "ألّا صحيح بقى، دول بقالهم تمن شهور يقبضوا على الناس، ويطلعوهم بكفالات خيالية.. فين الفلوس؟ مش كفاية الناس بتتثبت على الدائري؟ كمان النيابة العامة بتثبتنا؟ لما يخلصوا على الفلوس حيطلعونا بكفالة الموبايلات".
وأضافت نوارة ساخرة: "أتاريهم ما عملوليش ضبط واحضار، عشان عارفين إني كحيانة، ومش حادفع الكفالة وحاكلفهم فلوس استضافتي في السجن".
وانتشرت التدوينات الساخرة من النشطاء تعليقا على قرار الكفالة: "المصدر الرئيسي للدخل القومي بعد قناه السويس"، " لما وعدنا بأنه هيجيب 100 مليار, كان يقصد أنه هايحبس النشطاء والإعلاميين ويخرجهم بكفالة تجمع 100 مليار"، " صناديق الكفالات دى كفيله إنها تحل أزمه مصر، بدل من قرض صندوق النقد"، " واضح أن قرض قنديل فكس خلاص وهيلموا ال4 مليار من الإعلاميين ورجال الأعمال وكله بما يرضي الله"، " أنا قررت افتح مكتب تحقيق واشتغل فيه نائب عام"، " زمان كانت مصر بلد الكفاءات، في عصر النهبة بقت بلد كفالات"، " فلوس الكفالات دى رمز من رموز سيادة القانون قانون ساكسونيا"، "الاخوان جايين يقلبونا مش يحكمونا".
أخبار مصر-البديل