محمد زايد: أفهم بأه ..أرحل بأه .. سقط الطاغوط

بداية الكلام كانت مع يوم 25 يناير 2012 نزلنا الميدان واخدنها مشي من الجيزة لحد ما قبلنا المسيرة اللي كانت جايه من المهندسين وفضلنا ماشيين ونهتف ونزعق ونصرخ وطلعنا طاقة جوانا محبوسة بقالها كتير وكان أهم هتاف موجود اليوم ده كان دي ثورة ..دي مش حفلة, إحساس غريب لما تسمع صوتك مبحوح من كتر الهتاف لكن الأغرب هو إحساسك بناس عاوزه حقها ودلوقتي ....
مش هبقى كداب وأقول أني على طول الخط وجهة نظري واحدة ...لأ , أنا كتير رأي ووجهة نظري بتتغير أن مثلا : مش ممكن نهدى شويه نشوف البرلمان هيعمل ايه ؟ بس بسرعة بيجي الرد مش هيعمل حاجة ولا عمل وأول القصيدة كفر , طيب مش ممكن نستنى شويه على حكومة الجنزوري ده قال أن له صلاحيات؟ بنفس السرعة مالوش أي صلاحيات وضعيف الشخصية ورخ أكتر من اللي قبله, طيب إحنا نضغط علىهم بمظاهرات كل جمعة وبلاش إعتصام والضغط ده هيخليهم يعجلوا ويسلموا السلطة في شهر 6 فعلا وممكن كمان يبقى في قرارات وإجراءات حازمة وصارمة تشد الإقتصاد المدعو بالمنهار وترجع الأمن المسلوب عمداً لبلد الأمن والأمان؟ برضه لأ مفيش فايدة هسرق كل يوم بنك وخطف كل يوم عيل وهسرق كل ساعة عربية وآخرتها هقتل 75 شاب أنضف و أطهر ما أنجبت بلدك ..تقولي ليه كل ده ..أقولك والله ما أعرف .
معرفش يعني ايه أقضي على حياة بنآدم لمجرد أني أوصل لحاجة أي كانت ايه هي بأه سلطة فلوس نفوذ منصب ..مش مهم , المهم إزاي تذهق روح لأ دول أرواح ..شباب وأطفال وكبار وصغيرين ..ليه ؟
عارف أن أحنا شعب قعدنا 60 سنة ولا أكتر بنعاني من جهل حاكم عسكري وأن التعليم أدمر والصحة والتخطيط والوعي وأصبحنا مجتمع بلا عقول لكن الكلام ده كل أنتج شباب زي ما بيقولوا كده – فلتة – حر وطاهر القلب واعي الفكر دمه حامي وخرج بينادي بحاجة واحدة عاوز حرية ..مش طالب أكتر من كده حرية يا ناس ..حرية يا بشر لكن لأ تسكت وتخرس ولو فتحت بؤك هنسحلك ونعريك ونعميك ولو منفعش معاك كل ده هنموتك هتقولي ليه هقولك والله ما أعرف ليه ؟
هو الكرسي حلو أوي كده, غرور المنصب والمركز ممكن يدفعوا بنآدم موحد بالله أنه يكفر بكل آيات ربنا وكل الرسائل السماوية وكل حاجة موجودة أصلا في غريزته من رحمة وايمان, ممكن يعني تحوله لبنآدم سادي بالشكل ده .
امشوا...ارحلوا .. خلاص كفاية الناس قالتها وهيفضلوا يقولوها عاوزين كام شهيد وتمشوا وتسيبوها ؟ طيب عاوز كام فلوس ؟ طيب عاوز كام عين تعميها ؟ قولنا عشان أحنا والله العظيم ما هنسيبكوا ....والله ما هنسيب حقنا ..حقنا هيرجع وهنرجعوا كلنا ومن دلوقتي ودي أكبر فايدة جاتلنا من وراكوا الشعب ده كل هيبقى واحدة وبكرة نفكركوا كل الشعب ده هيبقى أيد واحدة من جديد أخوان وسلفيين وليبرالين وإشتراكيين ومحدش هيخون حد ومحدش هيقول يلا نفسي تاني .
ساعتها هنيجي ونشيلكوا من على الكراسي ونجيبكوا من سرايركوا وفي ميدان التحرير وفي المشنقة هتتشنقوا وهتتصوروا وهتترسموا وهنسجل اللحظة دي بكل الطرق وللأجيال الجاية هيكون ده أول درس قبل حتى ما يتعلموا الحروف هنعلم العيال اللي لسه بتحبي أن ده جزاء الظالم والقاتل والكافر .
كلمات الألتراس هي الباقية ...
قولنها زمان للمستبد
الحرية جاية لابد
Liberta كانت مكتوبة
يا حكومة بكرة هتعرفى
بأدين الشعب هتنضفى
والايه الليلة مقلوبة
قالوا الشغب فى دمنا
و ازاى بنطلب حقنا
يا نظام غبى افهم بقى مطلبى
حرية.. حرية.. حرية
مالموت خلاص مبقتش اخاف
وسط ارهابك قلبى شاف
الشمس هتطلع من جديد
اسرق امان خرب بيوت
دا كان زمان وقت السكوت
الحلم خلاص مش بعيد
قال النظام ايه العمل
كده النهاية بتكتمل
افهم بقى ارحل بقى سقط الطاغوط
حرية.. حرية.. حرية