اللمة الحلوة

بقالك أد ايه ماتجمعتش مع أهلك اللي يتحبهم وبيحبوك من غير مصالح ولا أهداف,,,؟؟ إبن خالتك أو إبن عمك اللي اتربيت معاه وبينكم أنقي و أجمل الذكريات ,,اللي ياما عملتوا مصايب مع بعض,,وياما داريتوا علي بعض,,,وكتير اتخانقتوا و ضربتوا بعض بس بترجعوا تتصالحوا في دقايق ,,,طيب فاكر لما كنتوا بتلعبوا لعبة و تتقمصوا فيها شخصيات تانية ؟ فاكر اسمك اللي كنت دايما بتسمي نفسك بيه في اللعبة ؟ طيب فاكر أول حب في حياتك لما جريت عليه تحكيله هو أول واحد وفضل ينصحك تعمل ايه ويخطط لك هتقولها إيه ؟ وفاكر لما كنت بتتحرم من المصروف كان هو بيعمل إيه يطلب من مامته مصروف زيادة بحجة كتب أو دروس عشان يجري يديلك فلوس..حب حقيقي بيجري في دمك بالاجبار واحساسه مريح اوي..
والله كمان علي لمة العيلة زمان في شم النسيم ولا العيد ,اللي بيحب الفسيخ و الرنجة في جنب والباقي في جنب تاني وهاتك يا تريقة علي الريحة والبصل و طول الوقت تريقة و ضحك ولعب والضحكة بتطلع مباشرة من القلب تهز المكان من وضوحها ونقائها,,حتي في المواقف الصعبه سواء مرض او موت أو أزمة كله في دقايق يبقي تحت رجلك وعايز يشيلك من علي الارض شيل,,إحساس العيلة مافيش حد حواليك يقدر يعوضه,,والا ماكانش ربنا سبحانه و تعالي في أكتر من آيه يحثنا علي صله الرحم في قوله تعالي : " وآت ذا القربي حقه"
وفي أيه أخري :" فهل عسيتم إن توليتم أن تفسدوا في الارض و تقطعوا أرحامكم أولئك الذين لعنهم الله فأصمهم وأعمي أبصارهم "..صدق الله العظيم
ولو حد فينا الدنيا أخدته وبعدته عن أهله و ناسه وأرحامه,,حالا كلمهم وطيب خاطرهم وجمعهم واتلموا تاني في أحضان بعض,,رجعوا ذكرياتكم الجميلة إفتكروا أحلي أيام واضحكوا من قلبكم ,,,لمه الأهل ما تتعوضش صدقوني,,,