راحت فين؟!

راحت فين الكلمة الحلوة اللي من غير فلوس اللي ممكن تغير حال من حال في لحظة , راحت فين المجاملة اللي مش هتكلفك حاجة خالص وهتطيب بيها خاطر حد او تراضيه , راحت فين القلوب النقية اللي بتتمني الخير لكل اللي حواليها من غير حقد ولا كره ولا لوع , القلوب البيضاء المليانة خير و حب وبس , راحت فين الابتسامة الصافية اللي بتطلع من القلب و بتسعد باقي القلوب اللي حواليها , راحت فين الرحمة اللي المفروض تكون بتجري في دمنا علي طول من غير مانحس , راحت فين الانسانية بين البشر ,راحت فين الجدعنة بين البعيد قبل القريب وبين الاصدقاء و الجيران والزمايل , راح فين التسامح , راحت فين المودة , راحت فين الحنية راحت فين المشاعر النبيلة بين البشر ,راح فين حسن النية اللي مابقالوش وجود ,راحت فين القيم والمبادئ , راحت فين كل الحجات دى راحت فين يااااااااااناس .....حد يرد و يقولي......؟؟؟؟
حد يقوللي ليه بقينا كده ...؟ ليه الكلام اللي بيطلع مننا بقي رصاص حي يقتل اي مشاعر..ليه المجاملة بقت بتتقال بالعكس , الكلام رخيص ومافيهوش مجهود ده حتي بيقولوا الكلمة الطيبة مفتاح للقلوب المغلقة , ليه كل واحد بقي متحفز للتاني ومستني له علي غلطة وعايز يتخانق عشان يطلع غلبه و ضيقته علي التاني , ليه مابقناش نتمني الخير لغيرنا وقلبنا بقي مليان سواد و بس , كل واحد همه يوقع التاني ويشوفه فاشل وخسران في حين انه ممكن يستغل الوقت ده في نجاحه هو , ليه بقينا نبص علي اللي في ايد غيرنا مع اننا ممكن نحمد ربنا علي اللي في ادينا , ليه بقت المصلحة هي الهدف الحقيقي لاي علاقة ولاي قرب , ليه وشوشنا بقت علي طول مشمئزة ومكشرة من غير سبب , مافيش صير و لا تسامح ولا رحمة , ليه الصداقة اختفت من حياتنا وبقينا نخاف لو لقينا حد طيب و شهم و جدع , الايه اتقلبت ليه ؟؟ العيب فينا ولا في الزمن..؟؟؟
لاء..العيب فينا لو كل واحد صفي نيته لله ولو كل واحد رضي عن حاله ولو كل واحد يحمد ربنا و يشكره علي نعمه الكنيرة ولو كل واحد بقي عنده يقين في ربنا انه كاتبله الاحسن والخير ولو كل واحد قرب لربنا بطريقته صدقوني ربنا كمان هيقربله وما اجمل قرب الله من عبده....تخيل كده معايا هتبقي حياتنا اذاي اجمل....