وجه رسالته الي المتشائمين والمحبطين

وائل غنيم: نعم حققنا إنجازات ولكن الثورة لا تزال مستمرة

وجه الناشط السياسي وائل غنيم رسالة الي ما اسماهم المتشائمين والمحبطين من المستقبل الذي ينتظر مصر مطالبا اياهم بالعودة الي الوراء 13شهرا من الان والمقارنة بين حال مصر وقتئذ والان مؤكدا ان الثورة نجحت في تحقيق انجازات عديدة ابرزها القضاء علي التوريث والتخلص من النظام الفاسد وحل الحزب الوطني واجراء انتخابات نزيهة لاول مرة بدون تزوير عبرت عن اختيار المصريين. كما انها جعلت الشباب يلتف حول علم بلاده ومستعد لبذل كل غالي ونفيس من اجل وطنه مشيرا الي انه رغم هذه الانجازات الا ان الثورة لا تزالي مستمرة ولم يستطيع الاحباط واليأس ان ينل من الحلم المصري ..
وكتب غنيم علي صفحته علي الفيس بوك " ارجع بذاكرتك 13 شهر من دلوقتي .. لو حد كان قال لك إن المصريين هينزلوا بالملايين في الميادين .. ومش هيسيبوها إلا لما يحققوا مطلبهم .. ومبارك هيتخلع وابنه مش هيورث مكانه .. وجمال وعلاء والعادلي وزكريا وفتحي وصفوت هيبقوا في طره .. وهيصدر قرار بحل الحزب الوطني والبرلمان والمحليات والشوري .. وهيتم انتخاب رؤساء الجامعات وعمداءها وأعضاء مجالس إدارة النقابات واتحادات العمال .. وأمن الدولة هيتحل بأمر من الشعب .. ومصر هتشهد انتخابات يشارك فيها 30 مليون وصوتهم مش هيتزور لأول مرة من ستين سنة ومش بس كده وهيخسروا كل الفلول اللي أفسدوا الحياة السياسية في مصر .. وإن شباب مصر اللي كانت كل علاقته بالعلم المصري تنتهي بعد ماتشات الكورة بقه دلوقتي مستعد يموت في سبيل حلم تغيير بلده .. لو قال لك كل ده كنت هتفتكره عاقل؟ ... صحيح نقدر نكتب عن كل التحديات اللي بتواجهنا بس لازم مننساش الانجازات اللي بنحققها .. والهدف مش إننا نضحك علي نفسنا بإن الثورة نجحت وخلاص .. الثورة مستمرة .. بس التغيير مش هيحصل علي ايد المحبطين .. التغيير هيحصل علي ايد المتفائلين المُصرّين .. احنا اللي هنحبط الاحباط .. احنا اللي هنكمل ثورتنا".