رقصني «كيكي» يا سي السيد !

- فيه إيه يا أمينة مالك سايقة العوج معايا اليومين دول
.. شيلي السماعات إللي في ودانك دي يا ولية واتعدلي احسن ومقام سيدنا الحسين أروح أتجوز عليكي.
- تتجوز عليا إيه يا سي السيد ده انت يا دوبك يا خويا مستني الدقيقة تسعين هو انت مش بتبص لنفسك في المراية انت خلاص بتلعب في الوقت الضايع يعني بينك وبين صفارة الحكم يا دوب حاجة بسيطة!
- أولا اسمه الوقت بدل الضايع يا جاهلة ثم يعني أنا غلطان إللي طفحت دم قلبي علشان أعملك وصلة وخليتك تتفرجي علي المونديال؟ عموما لو علي كده بقي أديكي شوفتي كل اللي سجل جوان جابها في الدقيقة تسعين والحدق يفهم يا أمينة.
- لا بقي لو علي الحداقة يبقي انت إللي لازم تفهم إنه زي ما فيه ناس بتسجل في الدقيقة تسعين فيه يا خويا ناس كتير بتخيب وتتغلب وتنهار في الدقيقة تسعين وفيه كمان إللي بيتغلب من أول دقيقة في الماتش واللاعب هو إللي بيختار يا سي السيد!
- طول عمرك زي القطط يا أمينة تاكلي وتنكري؟
- حسرة عليا اللي عمري ما شبعت علي طبليتك يا سي السيد عموما لو كنت كدابة خاصية »الفار»‬ موجودة وكله متسجل صوت وصورة!
- فار لما يلهفك يا شيخة ويريحني منك؟
- ههههه الله يحظك يا سي السيد اسمه فار يا سي السيد مش الفار الماوس.. حد يا راجل في العالم كله النهاردة ما يعرفش تقنية الفار إللي هي يعني لما نختلف علي حاجة نرجع نتفرج علي الفيديو بتاعها وهو يحكم ما بينا.
- محسساني أني باتكلم مع محمد لطيف ولا ميمي الشربيني أكونش دخلت ستديو التحليل مش بيتي؟
- شربيني ولطيف إيه ده انت قديم أوي يا سي السيد طب قول عصام الشوالي ولا حفيظ دراجي.
- ما تغيريش الموضوع.. هي حصلت بتسجليلي يا ولية؟
- مش أحسن ما تتبلي عليا يا سي السيد علشان تغرمني ضربة جزاء؟
- والله عال يا أمينة وكمان بقيتي خبيرة في الكورة وعلي كده مال وشك متشلفط وإيدك مربوطة ليه كفي الله الشر؟
- أصلي بصراحة كنت راكبة سوارس يا سي السيد وطقت في دماغي أعمل كيكي!
- مليون مرة أقولك تدخلي الحمام قبل ما تنزلي من البيت.
- هههههه الله يحفظ مقامك يا سي السيد حمام إيه، كيكي دي رقصة عالمية يا خويا بيرقصوها لما تكون العربية ماشية تنزل منها وتترقص شوية وترجع تركب تاني لكن منها لله السوارس جابتني تحتها زي مانت شايف كده.. ما تيجي نسافر جزر المالديف نصيف يا خويا وأهو بالمرة أعلمك الكيكي كيكي.
- اللهم طولك يا روح، يا أمينة خلي يومك يعدي علي خير ولا اقولك أنا رايح أسهر عند زبيدة!
- براحتك بس ابقي سيب فلوس فواتير الكهربا والغاز واللحمة والطبيخ يا سي السيد.
- انتي قولتيلي عايزة تسافري المالديف إمتي بالظبط؟