احم احم !

- فيه إيه في التليفزيون يا سي السيد شاغلك كده يا خويا من ساعة مادخلت وانت ماسك الريموت؟
- انتي مش دريانة يا ولية باللي بيحصل في العالم مش اقليم كردستان عايز ينفصل خلاص عن العراق والدنيا مقلوبة بقالها كام يوم؟
- كله إلا الكردان يا سي السيد .
- كلام إيه ده يا أمينة، باقولك كردستان تقوليلي كردان؟
- أيوه مانا فاهمة حركاتك دي كويس عايز تبيعني الكردان الحيلة إللي ورثته من امي زي ما بيعتني كل سيغتي حرام عليك يا راجل هو كل ما الدنيا تغلي تاخد دهبي تبيعه؟
- اللهم طولك يا روح، انا باقول إنك تمشي من قصادي دلوقتي خليني أشوف العالم الخربان ده وعشان تفهمي بقي مش بس كردستان اللي عايزة تنفصل لا ده حتي إقليم كتالونيا كمان عايز ينفصل عن إسبانيا.
- فكرتني صحيح ألا فين يا سي السيد قزازة الكالونيا إللي وعدتني تجيبهالي في عيد ميلادي؟
- يا أمينة حرام عليكي إيه المادية دي إللي بقيتي فيها هو انتي متعرفيش من الدنيا غير الدهب والكالونيا، أقولك الدنيا خربانة بره وكل حد عايز ينفصل عن التاني وانتي ليكي نفس تحتفلي بعيد ميلادك؟
- ما ينفصلوا يا خويا ولا يولعوا احنا مالنا.
- مالنا إزاي يا جاهلة ما هو أي حاجة بتحصل في أي مكان في العالم حتما ولابد بتأثر فينا فما بالك بقي ببلدين حيتقسموا خلاص؟
- منها لله ثورة يناير بقي !
- مال ثورة يناير بانفصال كردستان وكتالونيا يا ولية؟
- ما هي المدعوقة دي سبب كل بلاوي الدنيا يا سي السيد آه وحياتك أنا باسمع بيقولوا كده في برامج التوك شوز.
- هههههه الله يحظك يا أمينة اسمها التوك شو لكن الشوز دي حاجة تانية خالص.
- تانية ولا تالتة ملناش فيه وكفاية علينا إللي إحنا فيه، ما تشوفلنا حاجة تفرح بدال الأخبار النكد دي؟
- تفرح إيه بقي ده حتي الأهلي اللي بيفرحنا إتغلب أهو من النجم الساحلي.
- فكرتني صحيح هو انت امتي حتتعطف عليا وتوديني الساحل الشمالي ولو يوم قبل ماموت يا سي السيد؟
- مالك يا أمينة جرالك إيه النهاردة ليكي نفس تروحي الساحل والأهلي مغلوب وكمان كردستان وكتالونيا عايزين ينفصلوا؟
- ألا يعني يه ينفصلوا يا سي السيد حايتطلقوا يعني؟
- مش طلاق طلاق لكن زي ما تقولي كده عايزين يستقلوا وياخدوا حكم ذاتي الأكراد بالذات مصممين.
- فكرتني علي سيرة الاكرات دول يا خويا حتكلمني إزاي بعد ماكروت الشحن غليت؟
- حاجيبلك جوزين حمام زاجل يا أمينة!
- يا ريت وأنا اعملهولك بالفريك تاكل صوابعك وراهم!
- بصي يا أمينة أنتي تلمي هدومك وتطلعي علي أمك.
- بس اعمل حسابك لو مشيت من هنا مش راجعة تاني
- معناته إيه كلامك ده يا أمينة؟
- يعني ننفصل وتديني استقلالي الذاتي يا سي السيد!
- ده آخرك يا أمينة؟
- أيوه يا خويا ننفصل بالمعروف.. مش أحسن ما نبقي زي كتالونيا وكردستان؟