أبو الريش

تحكي سيدة أنه كان معها مبلغ بسيط نويت التبرع به لمستشفي أبو الريش، تقول: عندما وصلت باب المستشفي، شاهدت طفلا متكفنا لا يتعدي عمره أربع أو خمس سنوات من طوله علي إيد والده، واحد مستنيه بموتوسيكل ومامته بتجري وراه ومعاها واحدة بيقولوا لو ملقناش ميكروباص هنتصرف ونيجي وفضلوا يجروا في الشارع ورا الموتوسيكل اللي هو مفيش تاكسي ياخدوا ابنهم فيه مش معاهم فلوس وانا اتسمرت مش فاهمة حاجة وفهمت بعدها من طفلة كانت واقفة جنبي يجي 12 سنة قالتلي ده كان داخل علي رجله واتوفي، مامته كانت بتقول كده وهي بتصرخ، لهجتها صعيدية قالتلي أنا من أسوان بس لينا قرايبنا قاعدين عندهم جه أخوها يجي تلات سنين لاقيت في إيده كانولة يا حبيبي وواقف جنبها الولد حافي، أي وقت بالليل تعدي جنب سور المستشفي هتلاقي ناس نايمة في الشارع دول أهل الأطفال اللي جوه مش معاهم إمكانيات يأجروا مكان يباتوا فيه، بيناموا في الشارع وكمان ساعات يندهوا علي أهل الطفل محتاجين لبن محتاجين دواء يعني مأساة.
دخلت للمدير الإداري الراجل رحب بينا وجاب لنا مدير الخدمة الاجتماعية طلعنا مكتبه جاب فايل فيه حالات أطفال محتاجة علب لبن ومفيش إمكانية يعني ممكن يموتوا عشان مفيش لبن، طفلة عندها 80 يوم عاوزة أنبوبة أكسجين ومفيش إمكانية أهلها بيلفوا يدورا علي حد يسلفهم ، طفل محتاج دوا بألف جنيه وحالته خطيرة وحالات كتير مش قادرة أوصفها بس دول اللي فاكرينهم، المستشفي فيها أورام وقلب مفتوح وفشل كلوي، قلت للمدير ليه مش عاملين دعايا قال احنا مش معانا نصرف علي الدعاية.
التبرع للمستشفي صدقة جارية، ساهم في علاج حالة أو تحمل تكلفة روشتة علاج طفل فقير، إبدأ بنفسك وساعد غيرك، مستشفي أبو الريش للأطفال فيه أطفال بتموت عشان أهلهم لا يملكون تكاليف علاجهم، روح بنفسك أو تبرع في حسابهم في بنك ناصر الاجتماعي حساب رقم 3/4667 أو عن طريق (فوري) ربنا يتقبل. المستشفي لا يقدر علي تكاليف الدعاية زي المستشفيات أو الجمعيات الأخري!.
دعاء : اللّهُمَّ إِنّي أَعوذُ بِكَ مِنَ الْكُفر، وَالفَقْر، وَأَعوذُ بِكَ مِنْ عَذابِ القَبْر، لا إلهَ إلاّ أَنْتَ.