العبقري الصغير من شرم الشيخ : مشاركتي شرف

رغم أن ملامحه بسيطة، وتبدو عليه علامات براءة الأطفال إلا انه نابغة عصره .. لقب بالطفل المعجزة والعبقري الصغير.. حصل علي 5 شهادات عالمية وهو أحد أصغر المبرمجين في العالم .. حصل علي دعوة من رئاسة الجمهورية للمشاركة في المنتدي العالمي للشباب بشرم الشيخ .. هو الطالب محمود وائل:
● ما هي رؤيتك عن المنتدي؟
أنا شايف ان المنتدي له هدف واضح واقامة مؤتمر مهم زي ده في مصر للشباب خطوة مهمة جدًا ومفيدة مش بس للشباب، بس كمان لمصر كدولة،أنا أتمني ان أفكار الشباب والنقاشات اللي هتطلع من المؤتمر تتنفذ فعلًا وتأخذ في الاعتبار ومتبقاش مجرد أفكار علي ورق. أتمني كمان ان الشباب يستفيد بالتجربة وبالتعامل مع الثقافات والعقليات المختلفة اللي موجودة في المنتدي.. فمشاركتي في المنتدي وسام شرف وفرصة جيدة لتبادل الخبرات والثقافات مع شباب العالم.
● وماذا عن مشاركة شخصيات هامة من مختلف دول العالم؟
أكيد حابب ان الشخصيات الهامة اللي حاضرة المؤتمر تدّي فرصة للشباب يوضحّوا وجهة نظرهم وأفكارهم ومشاريعهم للبلد. حابب ان المؤتمر يحقق كل أهدافه واننا لو لقينا مشاريع من جنسيات مختلفة، نتقبلها وننفذها كمان، وهو ده المطلوب أكيد من المؤتمر.
● بما أنك تمتلك موهبة .. كيف تري أصحاب المواهب في المنتدي؟
أكيد تبني المواهب موضوع هام جدا في مختلف المجالات اللي جاية تحضر المؤتمر، مثلًا في مواهب في مجال الرياضة وفي مجالات تانية، أنا عن نفسي حضرت كأصغر مبرمج ومصمم شبكات انترنت في العالم، وأتمني اني أضيف للمؤتمر والمؤتمر برضو يكون اضافة ليّا ولغيري من الحاضرين.
● وماذا عن إعداد قيادات شابة في المستقبل؟
أتمني أن المؤتمر يكون خطوة لتحضير الشباب للقيادة في المستقبل وما يقوم به الرئيس يعد إعداداِ قويا للشباب فهو أول رئيس جمهورية يقوم بذلك ويتبني الشباب.
● وهل يستفيد الشباب المصري من شباب العالم؟
بالتأكيد لابد من الاستفادة من خبرات الحاضرين من الشباب ومن أصحاب المناصب كمان، كما أتمني إتاحة فرص للشباب المؤهلة سواء داخل أو خارج مصر عشان يقدروا يقوموا بدورهم في قيادة المستقبل.