!هل أصبحت ال »1/6« ماركة مسجلة للفضائح؟

الفراعنة »اتحنطوا« في بابا يارا! »مومياء« المنتخب تظهر في كوماسي.. لا دفاع ولا هجوم.. ووسط لا يصلح إلا ل »هز الوسط«

حسام غالى لم يظهر بمستواه المعهود سواء على مستوى الدفاع أو الهجوم
من اول دقيقة في المباراة الكارثية.. يستطيع المشاهد متخصص او هاوي او »ملوش في الكورة« ادراك حجم الفضيحة التي يمكن ان تقع.. الاقدام مرتعشة »والخضة« بادية علي الوجوه.. والصراعات الفردية بين لاعب مصري ولاعب غاني لصالح الأخير دائما.. وخط الدفاع ربما يصلح ان تشاهده في قناة »النيل كوميدي« فقرات كوميدية متواصلة من الثنائي محمد نجيب ووائل جمعة ومعهما احمد فتحي وشديد قناوي اللذين لم يكنا لا شديد ولا قناوي من ابناء الصعيد الاشداء.
لم ندافع ولم نهاجم ولم نمسك الوسط.. لم نفعل شيئا وكأننا كنا نمسك الهواء.. النجوم السوداء كانت حرة الحركة لا يمسكها احد في كل نقطة في الملعب.. ربع ساعة اولي ليس لها علاقة بكرة القدم ولا يظهر فيها الا انوار واضواء النجوم السوداء.. بينما برادلي يقف صامتا علي الخط الا من بعض »التمتمات« غير المفهومة.. يتمتم كأنما يقرأ الفاتحة بينما الاهداف الغانية تتسرب الي مرمانا نسرب الماء في ارض »شراقي« عطشانة عطش ارض سويلم في فيلم الارض.
ومع كل هدف غاني تتسع اعين المصريين دهشة وتسأل بعفوية وتلقائية.. فين يا جماعة محمد صلاح الفرعون الذي كسر الاعلام ادمغتنا مدحا فيه.. فين يا جماعة امير القلوب موهوب القرن محمد ابوتريكة.. طيب فين يا جماعة وليد بيه سليمان الفلتة الذي قتله الحزن مرة عندما استبعده الخواجة الرومانسي برادلي.
هذا عن الهجوم.. ادخل في الدفاع وقل ماشئت المسمار حسام عاشور اتخلع قبل ان يدقه احد في اي نجمة سودا.. النني يانيني ابوه وامه عليه بيلعب بالفيومي مش بالسويسري.. وحسام غالي كان غالي علينا صحيح بس غلاوته راحت فين.. وكله كوم والجدع محمد نجيب.. والله ده مش نجيب في اي حاجة خالص.. كان زي الفرخة المدبوحة عمال »يرفس« شمال ويمين وكريم قوي مع الغانيين وكله كوم والصخرة كوم.. وائل جمعة مش عارف يمسك مين وفين وليه.. العجز وحش يا جدعان لما يلعب مع ليوبارد والقطن والحرير غير لما يلعب مع محترفين بحق وحقيقي.. قلنا »90« مليون مرة بعدد سكان مصر ان يا جماعة لازم نزود الاحتراف علشان بلدنا.. شوفوا الفارق في الماتش بين ناس بتلعب وناس بتهرج.
وللانصاف لابد من ترتيب المسئولية.. وانا مسئول عن منح المركز الاول للاعبين.. لانهم لو لعبوا مع البرازيل وهم »سكرانين« مش هينهزموا ستة.. وبالمناسبة 1/6 دي هل هي ماركة مسجلة للفضايح.. بدأها الاهلي مع الزمالك وانتشرت انتشار النار في الحطب في العالم كله.. كان ممكن تبقي 5/صفر او 6/صفر او 1/7 او اي حاجة.. نرجع تاني للكوميديا السوداء مع النجوم السوداء.. اللاعبون تركوا القاهرة ونسيوا فيها الكورة.. كل الاهداف الغانية تقريبا من اخطاء في كل حاجة لها علاقة بالكورة.. لا ضغط ولا رقابة ولا دماغ بتفكر ولما شريف اكرامي زهق ولقي نفسه هيشيل الشيلة لواحده قال آه يا رجلي.. فيه فارق سرعة وقوة ومهارة لا تخطئها العين.. وبعد ربع ساعة المنتخب لم نفسه شوية والمفروض لما ينهزم يبقي 1/3 او 1/4.. لكن الفارق ظل في نوعية اللاعب عندنا وعندهم.
من اجل ذلك يا حضرات.. سوف يحصل برادلي علي المركز الثاني في المسئولية لانه لم يكن مسئولا عن ايسيان العجيب الذي راوغ دفاعنا »بالجوز« بالريموت كونترول ياخدهم شمال وياخدهم يمين ويخليهم يحطوا في نفسهم الجون.. المنظر كان بالضبط يا جماعة »مومياء« لمنتخب الفراعنة.. اتحنطوا في كوماسي.. كنا بنتفرج علي مومياء من 7 آلاف سنة.. علشان كده مش عجيبة ولا مدهشة انه ينهزم ستة محلصتش معانا من يوم ما عرفنا الكورة.. احنا كنا »متحف« في كوماسي.