علياء في رسالة طمأنة لأصدقائها: «أنا عايشة.... أنا تمام»: مفيش كهرباء والفندق شغل المولد.. ولما الديزل يخلص مش هعرف أكلمكم.. ما تقلقوش كل يومين ييجى مسلحين يهجموا على الاوتيل .. والناس اللى قاعدين هنا برضه مسلحين بيشتبكوا معهم.. بس متخافوش أنا صغيرة وبستخبى عادى الخارجية بتقول لنا نروح عمان أو السعودية.. يعنى نمشى 700 كيلو جوا اليمن. ويقابلنا حوثيين وإيرانيين وقاعدة.. وطبعا ما أقولش إن أنا مصريه علياء تختم رسائلها: أنا مش قلقانة و لا زعلانة.. أنا بحمد ربنا كل يوم إن أنا اللي في الموقف دا مش واحده تانيه غيري
انتقدت علياء محمد جابر، مواطنة مصرية عالقة في اليمن، تقاعس الحكومة المصرية في إجلاء جاليتها، وقالت في رسالة نشرتها على صفحتها على موقع التواصل الاجتماعي الفيس بوك تحت عنوان: «أنا عايشة.. أنا كويسة.. أنا تمام»، إن مسلحين يهاجمون الفندق الذي تقيم فيه كل يومين، وتقع اشتباكات بينهم وبين الموجودين بالفندق. وأضافت علياء في رسالتها: الحكومة المصرية تريد منا أن نسير 700 كيلو في قلب اليمن للوصول إلى السعودية أو عمان، في حين أن الأسطول المصري قريب منا، وكل الدول أرسلت قطع بحرية لإجلاء رعاياها بما فيها السعودية.. وإلى نص الرسالة:
أنا عايشه .. أنا كويسه .. أنا تمام كل الموضوع بس ان انا فى بلد فيها حرب .. عادى يعنى قاعده فى مكان فيه تفجيرات فى كل حته و عايشه مع ناس بيقتلوا بعض علشان حرب شمال و جنوب و فى برضه حاجه حلوه , ان كل يومين كدا ييجى ناس مسلحين يهجموا على الاوتيل .. ف الناس اللى قاعدين هنا اللى برضه مسلحين يشتبكوا معاهم بس متخافوش عليا .. انا صغيره و بستخبى عادى
و كمان بما ان هنا كل الناس معاها سلاح ألى و ار بى جى .. ف هما الحمد لله بيعلمونى اشيل سلاح برضه زى مانتوا شايفين
و الجديد بقى .. ان محطه الكهربا اتقصفت و جزء من المدينه بقى مفيش فيه كهربا .. ف احنا هنا فى الاوتيل مشغلين الجنيراتور اللى لما الديزيل هيخلص منه هنبقى هنا من غير كهربا .. يعنى من غير انترنت .. من غير تليفونات .. من غير نور .. من غير داعى
ف ياريت محدش يقلق لما يلاقى ان التليفونات مقفوله و انا مش موجوده .. انا عارفه طبعا ان فى سؤال حضرتك بتسأله بقالك كتير .. أنا ماتنيلتش رجعت ليه ؟ أرد عليك و اقولك المطار أتقفل من 9 أيام و كل الرحلات أتلغت و المطار أصلا اتدمر هتقولى امال المفروض تمشى ازاى ؟ أقولك الوزاره بتقول ان احنا نروح عمان أو السعوديه ( أيوه نروح لوحدنا ) يعنى نمشى طريق 700 كيلو على الأقل جوا اليمن .. اللى هو تقابل و انت ماشى عصابات مسلحه على شويه حوثيين و ايرانيين على تنظيم قاعده و داعش ( و طبعا ماقولش ان انا مصريه علشان هتقتل ) .. دا غير بقى قوات التحالف اللى بتضرب من فوق .. بس انا عارفه ان هما هيحسوا ان فى مصريه معديه تحت و مش هيضربوا فى الوقت اللى بعدى فيه .. و انشاء الله نوصل
بس الصراحه بتبسط و انا شايفه كل يوم كدا دوله تبعت البحريه بتاعتها تاخد الناس بتوعها زى السعوديه و باكستان و الهند و تركيا و الصين .. أه و الله الصين .. شوف الصين فين و اليمن فين ؟؟ بس بعتوا برضه.........
وأتبعت علياء رسالتها بتعقيب آخر قائلة: بصوا .. انا مستحمله أى حاجه .. بس مش هستحمل قلق الناس عليا و ان انا عامله مشاكل للناس .. ابوس ايديكوا ماتقلقوش علشان انا فى ايد ربنا و هو موجود فى كل مكان مصر او يمن او غيره و اى حاجه مكتوب انها تحصلى هتحصل ف هدوا نفسكم كدا و متحسسونيش ان انا سبب فى قلق و زعل حد علشان أنا مش قلقانه و لا زعلانه .. بالعكس انا بحمد ربنا كل يوم ان انا اللى فى الموقف دا مش واحده تانيه غيرى