أعربت سلمى صباحي عن تأييدها لموقف المطرب محمد محيي، إزاء الموقف الذي اتخذه عقب تعرُّضه ل"مقلب" برنامج "رامز قرش البحر"، مستنكرة موقف الفنانة آثار الحكيم، قائلة: "فرق كبير بين اللي عملو محيي واللي عملته آثار الحكيم، الموضوع مش فلوس"، كما طالبت سلمى صباحي، رامز جلال بعدم عرض حلقة "محيي"، متابعة: "بعد الكلام اللي كتبه محيي ده لو رامز جلال فعلًا بيحبه أعتقد أقل اعتذار ممكن يقدِّمه أن الحلقة دي ما تتعرضش أساسًا".

ووجهت سلمى صباحي، رسالة لرامز جلال، قائلة: "يا رامز مش أي حد يتقبل المقالب دي، وعلى فكرة هي مش مقالب دي ترويع، وترويع الناس حرام، بجد.. محمد محيي انت إنسان محترم".

وكان محمد محيي عبَّر عن غضبه من مشاركته في برنامج "رامز قرش البحر" كاتبًا عبر صفحته الشخصية على موقع التواصل الاجتماعي "فيس بوك": "أصعب شيء لما تكون شغَّال مع حد قريب منك وشبه يعرفك ولكنه لا يفهمك ولا يحاول غير ادعاء فهمك وراحتك يعتقد أن ما حدث في موضوع رامز جلال قرش البحر حاجة جميلة وشهرة ونسبة مشاهدة وفرحة للناس رغم إني مش من محبي الشهرة بالذات الفارغة من المضمون وأقسم بالله العلي العظيم إني في حياتي ما حزنت على نفسي إلا في هذا اليوم المشؤوم اللي صادف عيد ميلادي صحيح أنا غلط لما قبلت برنامج بيتكلِّم عن المونديال وكأس العالم، وكنت بقول ليهم ليه متجبوش نجوم الكرة".

وتابع: "وسألت طب وأنا مالي لكن سرعان ما أقنعني الصديق وأقنعتني نفسي وطمعها أن حاجتي للمال قد تبرر لنفسي وجودي، خصوصًا وأنا كروي وبحب الكرة، بس طلعت قروي وحدث وجودي في برنامج تاني أصعب وأهيف وقال إيه مقلب وخفة دم وكده ويطلع أخونا النجم فرحان أنه عمل كده فيك وقال بيحبَّك وكده ومتزعلش وعايز إيه نعملهولك نعتذر لك !، لا دي إهانة وقلة قيمة وخديعة لشخص مالوش في هزارك ولا خفة دمك يا رامز ولا هو صاحبك ولا هيكون ولا يحب مشاهدة هذه النوعية من البرامج سواء كانت لشخصية عامة أو شخصية عادية من الأصل وطبعًا الكاميرات شغَّالة عشان يشوفوا رد فعلك ويتمنوا تشتم أو تضرب أو حتى ترفع قضية تزيد الدراما الكوميدية قال !!".

وقال محيي: "معملتش حاجة من فضل ربي وكتمت إحساسي احترامًا للناس ولأني متعودتش أهين أو أكسف حد قصاد ناسه ومش هعمل حاجة لا قضية ولا صحافة ولا برامج نضيَّع بيها وقت الناس لأسباب كتيرة أولًا إحساس الخديعة والإهانة ميسوش ملايين ولا مليارات الوجود واللي قريب مني وحتى البعيد يعرف إني أبعد الأشخاص وأزهدهم في الأشياء المادية رغم الحاجة إليها أحيانًا، ثانيًا عشان محدِّش يقول ده عايز فلوس كمان وحاش لله أن أتاجر بكرامتي وإحساسي غانيك عن إني لم أشغل قضاءنا بتوافه الأمور".

كما وجَّه محمد محيي، رسالة إلى الفنانة آثار الحكيم: "أستاذتي آثار الحكيم أشعر بكل إحساس ليكي مهما كان اختلاف الناس أو اتفاقهم معك فهم لم يمرّوا بما مررنا به واعتذر لكي ولي ولكل جمهور لا يحب أن يضحك على خديعة غيره وحسن نيته أما الجمهور اللي بيحب ده فاضحكو من قلوبكم أستغفر الله لي ولكم وعن نفسي أدبت نفسي وعن قريب هتعرفوا.. آسف للإطالة الحمد لله على كل شيء وهنسى إن شاء الله الموقف السخيف وأكمل شغلي، والله على ما أقول شهيد في صدق الكلام والنية وف الآخر غلطة واتعلِّمت لا أثق غير فيمن هم محل وأهل للثقة".