مبارك:أوباما اتصل بى بعد 25 يناير وطلب تسليم البلد للبرادعى وعدد من السياسيين ..فقلت له لا أتلقى أوامر إلا من الشعب المصرى

قال الرئيس السابق حسنى مبارك معلقا على أحداث ثورة 25 يناير التي استمرت 18 يوما " مش فاكر اليوم بالضبط.. كانت المظاهرات مستمرة فى ميدان التحرير.. اتصل بى الرئيس الأمريكى باراك أوباما.. اتصل مرتين أو تلاتة (ثلاثة).. وبصراحة ما رضتش أرد عليه.."
وأضاف قائلا فى تسجيلات تواصل نشرها الزميلة الوطن :"فى الآخر رديت.. فسألنى: إيه الموقف عندك الآن؟!.. وقبل أن أرد.. بادرنى أوباما: أنا رأيى تسلم البلد لمجموعة من السياسيين منهم محمد البرادعى.. فقلت له: الكلام ده انت اللى بتقوله؟!.. فقال: نعم.، فقلت له اسمع يا أوباما أنا أفهم الشعب المصرى أكثر منك وأنت تفهم الشعب الأمريكى أكثر منى ، وأنا لا آخذ أوامر فيما يخص الشعب المصرى، أنا آخذ أوامرى من الشعب المصرى وحده ، لو النس عايزانى أمشى ، أمشى فورا، وأنا دورى إنى أنبه الشعب لخطورة الوضع اللى هوه فيه .. وبعدها انتهى الاتصال بيننا.
الإخوان والدولة
وسأل المصدر الرئيس السابق عن رأيه فى أداء الإخوان فى الحكم ، فأجاب :
شوف ،كل الى حكمو مصر يعرفوا الاخوان كويس يعنى جمال عبد الناصر وانور السادات وانا نعرف عنهم كل حاجه ..ده بحكم موقعنا والتقارير والمعلومات التى كانت تصل الينا ...علشان كده كان عبد الناصر يتعامل معهم بطريقه تحافظ على البلد ،لانهم كانو عايزين ينقلبوا عليه اكثر من مره..والسادات غلط لما فتح لهم الابواب ،هوه بصراحه كان راجل عظيم وكان عاوز ينفتح على الكل ...بس هما طول عمرهم عايزين السلطه والحكم ...والمشكله انهم مش متعودين على العمل فى النور ...طول عمرهم بيشتغلو فى السر ...والدوله مش ممكن تدار فى السر ...دى دوله ....ودولة كبيرة وقديمة وعندها شعب كبير ومتنوع ...وفيه تعدديه لازم نحافظ عليها .هما مش فاهمين الكلام ده ...عندهم مشكله مع العصر الحديث ..لكن احنا بحكم موقعنا كنا عارفين اسرار لا يعرفها الشعب ،علشان كده انا التمس للناس العزر لما اختارتهم ...لانهم مجربوش الناس دول قبل كده .
يصمت مبارك قليلا ويضيف، أنا بصراحة متفاجئ
أنا بصراحة متفاجئ من أدائهم.. كنت فاكرهم أفضل من كده بكتير.. هما مش فاهمين مثلا فى الاقتصاد.زبيشتغلوا فيه بطريقة «التاجر».. وده غلط.. وكمان عندهم شك على طول فى كل الناس .. طيب إزاي هنشتغل ونرفع البلد ونحل الأزمات وإحنا عندنا شك فى الشعب والمعارضة!!
أنا وهيكل
◄ سيادتك.. هل تتابع التلفزيون والبرامج والصحف؟!
- طبعا.. بس الجرايد بتيجي لي ساعات وساعات لأ.. وبحاول أتابع التلفزيون والأخبار بقدر الإمكان..وكمان بتوصلني الأخبار لما تيجي لى زيارات بصراحة الأوضاع صعبة، ونفسي الأمور تستقرفى البلد.
◄ طيب.. هل تابعت الاستاذ محمد حسنين هيكل وما يقوله عن عهدك..وإيه سر موقفه منك؟
- مش متابع قوي.. بس هيكل له حكاية معايا.. فأول ما توليت الحكم.. جاءني أسامة الباز وقال لي: أيه رأيك في هيكل يكتب خطبك السياسية؟ّ.. ففكرت قليلا وقلت له: هيكل كان بيشتغل مع عبد الناصر.. وبعد كده استبعده السادات.. والمشكلة إنه هيحط لى فى الخطبة رأيه.. ولما أغير حاجة أو متعجبنيش حاجة.. هيزعل.. اسمع يا أسامة الراجل دا كان بيكتب لعبد الناصر معقولة هيكتب لي الخطب.. لأ ميصحش.. وهربت منه كده.
ويضيف مبارك هيكل بيحط أفكاره هوه.. وعايزني أقرأ وبس.. وأنا مش لعبة في إيد حد.. أنا أفكر وأقول للي يكتب لى الخطبة اكتب كذا وكذا وكذا.. أنا أقول لك أنا عايز أتكلم فى كيت وكيت حتى مرة موسي صبري كان بيكتب لى الخطبة ودا كان أول ما تعينت وقال لى موسي : لازم ندى أمل الناس : وقولت له : لا ماينفعش تضحك على الناس : الناس لازم تعرف الحقيقة : أنا مش هضحك على الناس .. على فكرة أنا أول ماتعينت كانت البلد تعبانه قوي .. بس مش بالفوضى الحالية
ويستطرد" مبارك دول حتى بينسبوا كل لنفسهم . دا حتى مشروع قناة السويس إحنا اللى عاملينه..إحنا عملنا مصانع هناك وأعطينا الصين مساحات وشيدنا مباني ..ومن كام يوم شهدت مرسي والحكومة والأخوان عاملين قصة عن المشروع دا وكأنه إنجازتهم
وتحدث "مبارك "فى أجزاء مختلفة عن شخصيات محدودة على الساحة الأن .. فحين سئل عن ما يقوله دكتور مصطفى الفقى فى حلقات برنامجة عن فترة حكمه ؟..أجاب : مصطفى الفقي ساب الرئاسة من زمان .. بس الواحد بيعرف الرجال فى الصعاب ، مصطفى الفقى بيكتب فى الجرايد ويطلع فى التلفزيونات عشان ياخد فلوس
واستطرد مبارك ، أنا كمان بشوف إبراهيم عيسى.. الراجل ده محترم وبيقول الحق، ورغم إنه كان بيعارضنى إلا أنه بيعجبنى لأنه ما بيخافش ، وحين سئل عن مرتضى منصور ، علق ضاحكا : ده مدفع.. مدفع