اختراق

عمروالليثى : مساء الخير مازلنا مع ملف حصاد برنامج اختراق فى عام 2009 واليوم سنستعرض سويا ملف مشروع عملاق حماية مصر من مخاطر الجفاف مشروع تكاتف الشعب المصرى من أجل إقامته حتى تحقق له ما أراد إنه السد العالى ذهبنا إلى هناك لنرى عظمة وشموخ السد وهو واقف يحتجز قلبه بحيرة ناصر التى ترمى لمصرالمياة وقمنا بالتسجيل مع العمال والمهندسين الذين شاركوا فى بناء السد ليرووا لنا تفاصيل ملحمة بناء هذا المشروع العملاق فتعالوا معا نعيش بالصوت والصورة ملحمة بناء السد العالى
فاصل
عبارة عن جزء من قصيدة السد العالى للشاعر عبد الرحمن الأبنودى
عمروالليثى : احتشد أكثرمن 34 ألف عامل ومهندس وفنى يواصلون العمل ليل نهارلتحقيق حلم شعب بأكمله ليس فقط فى بناء مشروع عملاق ولكن لإثبات القدرة والعزيمة المصرية لمواجهة تحدى الغرب كله 34 ألف عامل اشتغلوا 10 سنوات متواصلة حتى تحقق لهم ما أرادوا وبنوا السد العالى فى ملحمة إنسانية ساهم فيها كل فرد من أبناء الشعب المصرى فمن لم يساهم بيده وأمواله ساهم بأحلامة وأمنياتة فى هذا الحدث
م/ محمود أبو زيد : كان في آلاف العمال كانوا فى إنشاء السد نفسه كان في أكثر من عمل بيتم فى نفس الوقت يحتاج لعدد كبيرجدا من العمال وبالتالى عدد العمال فى وقت من الأوقات أصبح 20 ألف عامل
م/ زكريا عبد البارى : احنا لما رحنا بقى السد العالى ده عبارة عن سلسلة من الجبال والوديان ولا طرق ولاأى حاجة يعنى كنا احنا نعمل جزء من الطريق ونتحرك ونعمل الجزء اللى بعده فسووا لنا بعد كده طرح كمناقصة فتحت المظاريف ولذلك نجح عثمان أحمد عثمان لإنها أرخص9 مليون جنيه عبد الناصر فى ذلك الوقت لما نجح عثمان قال لى إن مش معقول إن السد العالى بعد ما حاربنا عليه نديه لواحد من القطاع الخاص يبنيه فلازم القطاع العام يبنى السد العالى جه الريس برضه خايف لإن المشروع كبيرفدخل شركة مصر للأسمنت المسلح معاه فى المشروع وابتدينا نشتغل
فاصل
وصف للحفل الذى أقامه مهندسون جامعة القاهرة بمناسبة البدء فى تنفيذ مشروع السد العالى
م/حسب الله الكفراوى : فكان القرارالعظيم والحكيم بتاع الرئيس هوبناء السد العالى
م/حلمى السيد : وكان صدقى سليمان ده إدا له صلاحيات كبيرة يعنى صدقى سليمان ده كان بيعرف أسماء المهندسين بالإسم ويقول السلام عليكم إزيك يا فلان دى كانت بتبقى نوع من التغطية فى المرحلة دى
عمروالليثى : المرحلة الأولى دى كانت عبارة عن إيه؟
م/حلمى السيد : المرحلة الأولى قفل مجرى النيل الرئيسى وتحليله عن طريق 6أنفاق وقناة أمامية وقناة خلفية
م/ زكريا عبد البارى : قعدنا نشتغل فى البتاعة دى كان فيها حوالى 12 ألف و 11 مليون مترصخر ، قعدنا نشتغل فيها حوالى يمكن 3 سنين
م/ حسب الله الكفراوى : جه جمال عبد الناصرفى نفس اليوم وجه خوروشوف وفتتحوا المرحلة الأولى للسد العالى
فاصل
عبارة عن وصف افتتاح المرحلة الأولى للسد العالى
م/إسماعيل فهمى : المرحلة التانية كانت بناء السد العالى وكانت العملية اللى بتفصل بين السد والحاجة التالتة اللى أكتر أهمية بقى الأنفاق تركيب بقى الأجهزة الخاصة بها
عمرو الليثى : كلمة السر فى إنجاز حلم آلاف العمال والفنيين جائوا إلى أسوان من كل مكان جائوا للعثورعلى دورومكان فى رسم صورة مصرالجديدة الرائعة تاركين أهليهم وذوويهم وكله يهون فى سبيل بناء السد العالى اللى أصبح مسألة كرامة وتحدى مع الغرب ويكفى دليلا على إخراج السد العالى أن بعضهم لم يرجع إلى بلده وبقى فى أسوان
فاصل غنائى
أحد المواطنين : لما دخلت السد العالى كانت مرحلة الناس ما تعرفش بعضها لا الأخ يعرف أخوه ولا والواد عم يعرف واد عمه لإن السد العالى ده كان عبارة عن مجمع الحلم
مواطن آخر : اتعيننا مع عثمان حجارة إيه الحجارة دى نتربط بالاحبال ونقعد واحد فوق من ورا ماسكه وانت تنزل بالعتلة تعلق الحجارة السايبة عشان ما تقعش على الكراكة تحت ولا تقعد على بلدوزر ولا تقعد على حد من الجماعة اللى هم يعنى
مواطن ثالث : كنا احنا أول ناس سكنا فى السد العالى فالزعيم جمال عبد الناصر أمرإن احنا يتبنى لنا مساكن فاتبنت المستعمرات
أ/ أحمد السيد النجار: كان يعنى الناس زى النمل يعنى ناس لا حصرلها
فاصل
عبارة عن جزء آخر من قصيدة الشاعر عبد الرحمن الأبنودى السد العالى
أ/عبد الرحمن الأبنودى : كلهم أصدقائى هم بناة السد هم والآخرين رحت ولقيت عالم ممتع تاجرمعرفش له خبرة فى الزراعة لقيته والجرارات والبتاع والديناميت يولعوا ديناميت ويجروا اللى يفرقع واللى يعمل يعنى دخل فى حالة من الحركة والالتحام فى هذا العمل المتقدم يعنى تغيروا وفعلا السد العالى له أثركبيرفى تغيير مصر
فاصل غنائى
أ/ أحمد السيد النجار : أول سد فى العالم يستخدم فيه الطرق الملبدة بالماء اللى هى فعلا فى وقت السداللى هى تحول أرايل حتى 8 ونص على 10
عمروالليثى : يبلغ الطول الكلى لمجرى السد 1952 متر ويوجد بها 6 أمتار كما يبلغ مجموع طول البوابات 20 ألف طن ومحطة الكهرباء التى تتكون من 12 طوربينه قوة كل طوربينة 180 ألف كيلو واط بينما يبلغ مجموعها 765 طن بينما تبلغ قوة كل مولد كهربائى 175 كيلو واط ومجموع وزن المحطة 30 ألف طن ويمكن الحصول على طاقة كهربائية سنويا من محطة كهرباء السد العالى 10 آلاف مليون كيلو واط فى الساعة
م/ إسماعيل فهمى : كنت أنا جاى مع أول طوربينة هتركب فى محطة السد العالى أول طوربينة جاية من الأقصر كان وزنها 200 طن فكلفت إن أنا أمد هذه الطوربينة من اسكندرية لغاية السد العالى وكان ده احتفال كبيرجدا كنا مدورينها ولا العروسة كانوا عاملين أعلام وبتاع وذبحوا ذبائح يعنى كان احتفال أنا ما شفتش زيه يعنى كان قيمة كبيرة قوى قوى كان يمثل من60 إلى 70 % من الكهرباء اللى موجودة فى مصركلها وكان فى وقتها مشكلة أن هذه الكهرباء الضخمة إلى القاهرة وإلى شمال الدلتا استطعنا إن احنا نحل هذه المشكلة وننقل الكهرباء كاملا إلى القاهرة وفى شمالها
أحد المواطنين : اعترف الانجليز أن السد العالى هو مشروع القرن على مستوى العالم
فاصل غنائى
أ/ صلاح الدين سليم : حماية مصرمن القحط وحمايتها من الفيضان لايتحقق إلا بالسد العالى التوسع الذى تم فى الأراضى الزراعية ، الحفاظ على معدل المقنن طبقا لاتفاقيات خاصة بمياه النيل مع دول حوض النهرأصبحت إنجازإنتاج الكهرباء الذى أتاح بعد ذلك التوسع الصناعى فى مصرإقامة مجتمعات جديدة من التطور الذى حدث فى أسوان ، الفرص المتاحة لإستغلال أكبربحيرة صناعية أقيمت فى العالم وهى بحيرة ناصر
د/محمود أبو زيد : لما أقارن هذه السلبيات بالإنجازات الضخمة هى الحصول على مياه نهر النيل فهى لا تساوى شئ
فاصل غنائى
عمروالليثى : استعرضنا ملف بناء السد العالى ولكننا لم ننس ضحايا بناء السدهم أبناء النوبة ففتحنا هذا الملف ذهبنا إلى هناك والتقينا مع أهل النوبة الذين عاصروا التهجيروتعرفنا على معاناتهم واستعرضنا مشاكلهم فى منتهى الحياد ية والشفافية فتعالوا معا نتعرف على ما حدث أثناء تهجيرأبناء النوبة
فاصل تقريرى
أميمة إبراهيم : يعيش أهل النوبة معاناة مستمرة مع التهجير منذ أكثرمن 100 عام هاجروا خلال هذه الفترة أراضيهم بداية من تهجيرهم فى المرة الأولى فى عام 1902 عندما تم بناء خزان أسوان وتهجيرهم للمرة الثانية فى عام 1912عند تعلية الخزان ومرة ثالثة عند التعلية الثانية فى عام 1933 وآخرعملية تهجيرشهدتها النوبة مع بناء السد العالى بأسوان
فاصل غنائى
عمروالليثى : نوع آخر من الآثار السلبية لبناء السد العالى ولكن بصورة غير مباشرة لأن السد نفسه برئ من ذنبهم ولكن الحق على اللى بنوا السد ونزلوا على بيوتهم علشان يبتدوا حياتهم دون أن يدفعوا الثمن ماديا ومعنويا حتى لا يضع أصحاب الحق عن طيب خاطر التضحية من أجل السد هذه المقدمة كانت لازمة قبل أن أتحدث عن الهجرة للنوبيين كأثرمن الآثار السلبية لبناء السد العالى الذى غمرت بحيرته قرى متكاملة وتم تهجيرهم إلى بيوت أخرى فى الصحراء فى مدن محافظات مصر المختلفة
فاصل غنائى
أحد أهالى النوبة : المنطقة النوبية كانت 44 قرية على ضفاف النيل شرق وغرب ممتدة ما بين أسوان وبين الشلالات وما بين اسوان لغاية الحدود المصرية
أحد أهالى النوبة 2 : المجتمع ده مجتمع زى ما يكون مجتمع نقى
نوبى آخر : البيئة شوف إلى أى مدى العريس والعروسة يحطوا إيديهم فى النيل ويغسلوا وشهم تبركا بالنيل ، الرضيع لما بيتولد بياخدوه يحموه فى النيل تبركا به
فاصل غنائى
مواطن آخر : مشكلة النوبيين بدأت لما بنوا خزان أسوان سنة 1902 دية طبعا لتوسيع أبراج رأتها الحكومات
مستشار/ حسن سيف النصر: الحكومات اللى كانت موجودة فى الوقت ده يعنى كانوا شبه متعمدين أوشبه معاملتهم لنا معاملة شبه غيرإنسانية أبدا يعنى مثلا يروحوا فاتحين المية أومعليين المية بدون ما يخطروا الناس وبالتالى المية راحت مغرقة كل البيوت لدرجة إن فيه ناس كانت بتعوم وراء حاجتها عشان يجيبوها من المية ده فى التعليات التلاتة وكانت الطامة الكبرى هى السد العالى
فاصل موسيقى
عمروالليثى : 45 قرية هى مجموعة القرى النوبية التى اختفت تحت بحيرة السد العالى كان يعيش فيها آلاف الأسرالنوبية التى هجرت بيوتها مجبرة صحيح أنه كان هناك تعويض مادى كان بشكل أو بآخرإلى أنه من وجهة نظرهم لم يكن كافيا ولم يعوضهم عن الحياة التى خسروها مهما كانت متواضعة خاصة أن الحكومات المتتالية اكتفت بالتعويض المادى ولم تنظرإلى مشاعرهم وتاريخهم لدرجة أن تضحيتهم من أجل مصركلها لم تكتب فى التاريخ ولم يذكرها أحد
السيد/ جمعة على مهدى : سنة 1958 بالضبط تم تشكيل لجنة المقترحة لبناء السد العالى وما تبعها من خلاف أهل النوبة وما تبعه من تهجيرشامل أوالقرارات التى صدرت لتهجير النوبيين هجرة شاملة إلى منطقة كوم أمبو
فاصل غنائى
أحد المواطنين : احنا مبدئيا رفضنا الهجرة للسودان لأننا نحمل الجنسية المصرية ونفخر بإن احنا مصريين قبل أن نكون نوبيين الورق انتشرعبد الناصر فى إنه راح يزور النوبة عشان يشوف هيعمل إيه معاهم
فاصل
زيارة عبد اللطيف البغدادى وجمال عبد الناصرللمناطق التى سيتم تهجيرأهلها
الفنان / محمد منير : أنا بحب عبد الناصر القائد الثورى وكل حاجة بس أنا موضوع السد العالى محدش عاجبه ما يتحبش خالص كان ناسى كده إن النوبة دى فيها سكان ما كانش فيه رؤية بعيدة يعنى حسب تصورى الشخصى رؤية أمن قومى
المستشار/ حسن سيف النصر : جمال عبد الناصر بنفسه جه عندنا فى المنطقة وقال الأرض بالأرض والبيت بالبيت ولكن ولا حاجة من دى أنا واحد من الناس مغترب مثلا وقسموا الناس فى الوقت ده إلى مقيم ومغترب المهم بيرجع للناس وبعدين تهجير فيعنى خدوهم فى مراكب كبيرة كدة مع حيواناتهم الحيوانات معاهم والبنى آدمين
أ/ فاروق منير : فى 18أكتوبر 63 كنت سعيد الحظ إن أنا أحضرتهجير قومى ففوجئت بالباخرة اتحركت بنا دفوف وزغاريد وناس وحالة أنا حكيت اللى شفته ده لجدتى شفت منظرالناس طبعا مش عارفين هم بيسيبوا وطن مش هيرجعوا له تانى
عمروالليثى : كانوا بيزغردوا ليه؟
أ/ فاروق منير : الإعلام كان بيذيع زمان هتلاقى مية هتلاقى روح هتلاقى مواصلات هتلاقى هتلاقى كل حاجة
الفنان/ محمد منير : هجرة غير إنسانية هجرة تساوى فيها البنى آدم والحيوان مع بعض كانوا كلهم فى مركبة واحدة بص يا عمروالنوبى عمره ما عيش حيوان فى بيته ده معروف فى القاعدة العامة يعنى دايما الحيوان عنده حظيرة خاصة به لكن مش مشاركه العيشة ما كانش فيه نظرة مدروسة سليمة للتركيبة الاجتماعية للمجتمع ده
فاصل غنائى
عمروالليثى : بعض النوبيين بيؤكدوا أن التعويضات التى تم تقديرها لهم فى عام 1964 رغم أنها كانت مقحفة للغاية ولا تتناسب مع الثمن الحقيقى للبيوت والممتلكات لدرجة أن الأسعار تراوحت ما بين ال3 جنيهات إلى 60 جنيها على أقصى حد
السيد/ حسين مختار : التقديرات اللى طبقت فى تهجيرالنوبيين فى سنة 64 هى نفس الأرقام اللى تم تطبيقها سنة 33 فى إثرتعليات الخزان البيت اللى الدولة بتديه ب 1000 جنيه إديتنى فيه 50 جنيه أو70 جنيه حسب مساحة البيت
الفنان/ محمد منير : أنا شابف إن الموسيقى النوبية خلصت بهجرة النوبيين أصبحت بوابتنا الأفريقية منعدمة ويعنى هو فى طريقه للإندثار واللغة دى ما أعتقدش إن فيه طريق من حفظها فى أغانى
السيد/ حسين مختار : ده التجربة احنا عاصرناها بأمانة وبنقلها بكل الجيل بتاعى لمصركلها عشان يبقوا عارفين إننا عانينا معاناة كانت قاسية جدا
فاصل غنائى
عمروالليثى : مع كل ذلك كان لابد أن يكون هناك حل يرضى أهل النوبة ويعوضهم عن تضحيتهم الكبيرة ويمحى المرارة التى يشعرون منذ عشرات السنين حتى الآن مطالبهم الحالية بسيطة وربما أقل من ذلك ولكن مطلوب حد يطبطب عليهم ويؤكد لهم أن باقى المصريين لا ينكروا ما قدموا.
م/ حسن سيف الدين : في بعض الناس بيتهمونا بالعنصرية بيتهمونا إن احنا عايزين نعمل دولة كلام يعنى لا يخطر على بال أى نوبى دولة إيه اللى هنعملها
الفنان/ محمد منير : لا دى يعنى خزعبلات وأى مجتمع ممكن تلاقى ناس مهمشة تتكلم عن أى شئ عبيط مفيش عند وجدان أى نوبى أنا واثق من الطفل إلى الشيخ الإحساس ده
عبد الرحمن الأبنودى : أنا ما أظنش النوبيين ده هم المصريين
فاصل غنائى
د/ محمود أبو زيد : لما كنت مع سيادة الريس فى افتتاح بعض المشروعات فى أسوان أكد بنفسه على أهمية توفير المسكن الملائم لأهل النوبة
الرئيس مبارك : أهل النوبة دول أهلنا إدوهم كل حاجة ، إدوهم أرض زراعية دول شعب مصر ما تقدرش نستغنى عنهم دول لهم حسابات أخرى
فاصل تقريرى
أميمة إبراهيم : هذه التصريحات الواضحة للرئيس مبارك تؤكد أن الدولة عازمة على إنهاء خلاف أهالى النوبة سواء بتوفير المسكن الملائم أوتوفيرالأراضى الزراعية لتنمية المنطقة إن المثول بتوجيه قضية أهل النوبة ما هى إلا أداة ومحاولة جديدة للهجوم على مصرمن الجهات الخارجية بحجة الدفاع عن الغربة التى هى بالفعل هى جزء لا يتجزأ من أرض مصروسوف تأخذ حقها كاملا
عمروالليثى : ما زلنا مع حصاد اختراق لعام 2009 والآن سوف نقوم باستعراض واحد من أهم الملفات لا هو ملف وفاة الزعيم الراحل جمال عبد الناصر والتى كثرت حوله الأقاويل والشائعات فكان لزاما علينا أن نستعرض التاريخ المرضى للرئيس جمال عبد الناصر وتعرفنا على الساعات الأخيرة فى حياته وانفردنا باستضافة الدكتور الصاوى حبيب طبيب جمال عبد الناصر الذى حضرالوفاة فتعالوا معا نتذكر ما جاء فى هذا الملف
فاصل
صور ولقطات للزعيم الخالد جمال عبد الناصر
السيدة/ هدى عبد الناصر:يوم الرحيل دخل علينا وقال اتغدوا انتوا دخل علينا بعد اجتماعه وبعد ما وصل أميرالكويت تعبان هو من عادته إن هو يرجع بعد اللقاءات دية تعبان
السيدة /منى عبد الناصر : دخل لقيته دخل من برة قال أنا تعبان هو دخل جوة يستريح وبعدين نده لى دخلت له وبعدين قال أنا تعبان إندهوا ابعتوا للدكتور
د/ الصاوى حبيب : لقيت السيدة تحية قالت لى هو جاى من برة تعبان إديته كباية عصيرشربها ، دخلت لقيته متمدد فى الفراش لقيته منتبه تماما لكن كان فيه عرق ويبدو بالنظرإن أطرافه باردة ، برودة الأطراف دية مع الصدمة القلبية دى علامة من علامات خطورة الموقف والنبض كان سريع جدا
عمروالليثى : ترتيب حضور القيادات والمسئولين كان إزاى؟
السيدة/ منى عبد الناصر : الدكتور الصاوى بلغهم كلهم
أ/ مصطفى بكرى : هو بلغ جميع القيادات ؛ محمد فوزى ومحمد أحمد والباقيين الكل جاى يشوف الريس
عمروالليثى : هل شخصت الحالة؟
د/ الصاوى حبيب : أزمة قلبية لأن انسداد الشريان التاجى سبب أزمة قلبية
فاصل
السيدة/ منى عبد الناصر : اللى فهمت ماما وقالت لنا روحوا إقرأوا قرآن
د/ الصاوى حبيب : حالته إتحسنت شوية
أ/ مصطفى بكرى : عبد الناصر فتح الراديو بنفسه وكانت إذاعة البى بى سى بتذيع نبأ تواجد الأسطول السادس فى البحر المتوسط وبيقوم بمناورات فقال عبد الناصر هو ريتشارد نيكسون واخد النشرة لحسابه
السيدة / منى عبد الناصر : هو كان بيطمنى لإنى كنت بعيط ومش فاهمة حاجة
د/ الصاوى حبيب : بقول له سيادتك مرتاح يا فندم فقال لى أنا استريحت يا صاوى
عمرو الليثى : وتوفى؟
د / الصاوى حبيب: آه وتوفى وقعدنا نعمل له تنفس صناعى
عمروالليثى : تدليك فى القلب؟
د/ حمدى السيد : لما بتحصل أزمات قلبية بيبقى فيه طبيب موجود على طول الطبيب ده كان معاه جهاز للنبضات الكهربائية وكان واقف مستنى على الباب اللخبطة اللى حصلت بعد الوفاة خلاهم نسيوا يستدعواالطبيب ده ما انتبهناش له غير بعد ما حصلت الوفاة
د/ الصاوى حبيب : هو التشخيص كان كده ، معروف إن مريض السكرالمصاب بالشريات التاجى معاناته بتصل إلى 4 أضعاف الشخص العادى لإن بيبقى عضلة القلب غيرقادرة على عملها
عمرو الليثى : إدوا له حقنة مورفين؟
د/ أحمد السعيد يونس : ما كانش المفروض يدوا له حقنة المورفين وهو عنده السكر المفروض إن أنزل السكرالأول وبعدين لو ما استجابش أدى له حاجة زى دى وما أعملوش أزمة قلبية
عمروالليثى : هل صحيح إن كان فيه خطأ فى إعطاء حقنة المورفين الأول؟
د/ الصاوى حبيب : طبعا لا ، الريس كان وشه كله مليان عرق وغيركده كمان عشان تدى العلاج يبقى لازم تكون متابع حالة المريض من أولها وده مش مريض عادى ده رئيس الجمهورية وأنا ما شفتش حاجة بعينى
د/ حمدى السيد : كتب شهادة الوفاة الدكاترة اللى كانوا موجودين كلهم
فاصل
عمروالليثى : هل كان فيه رقابة على مطبخ الريس؟
السيدة/ منى عبد الناصر : آه طبعا كان واقف واحد مخبر
السيدة/ هدى عبد الناصر : آه كان فيه عمليات كثيرة لمحاولة اغتيال الريس
عمروالليثى : محاولات الاغتيال كان بياكل برة البيت وللا فى البيت؟
السيدة/ هدى عبد الناصر : لا كان كل أكله فى البيت وهو الأكل اللى احنا بناكل منه
عمروالليثى : يقال إن هو أكل تفاح من اللى أحضره الوفد اللبنانى لمصر ومن ساعتها حصل له اللى حصل؟
السيدة/ منى عبد الناصر : لو كان فيه صندوق تفاح ما احنا أكلنا منه كان جرا لنا حاجة
عمروالليثى : هل تعتقدى إن ممكن يكون الريس جمال مات مقتولا؟
السيدة / هدى عبد الناصر : ده هاجس انتابنى وسيطرعلى شعورغريب لفترة طويلة بعد الوفاة لغاية ما بقيتش أفكرفى الموضوع ده
عمروالليثى : هل هذا الشعور كان موجود فى الأسرة وإتكلمتوا فيه؟
السيدة/ هدى عبد الناصر : لا عمرنا ما فكرنا ولا اتكلمنا فى حاجة زى دى
عمروالليثى : لماذا نشر إن السادات كان يتقاضى مبالغ مالية شهريا من المخابرات الأمريكية وكلف باغتيال جمال عبد الناصر؟
السيدة/ رقية السادات : والله الكلام ده كلام فارغ ومش مضبوط
السيدة/ جيهان السادات : لا أتصور إن السادات يكون له علاقة أبدا بهذا الموضوع
السيدة/ هدى عبد الناصر : ما أقدرش أقول كدة لإن ما عنديش دليل فى إيدى
عمروالليثى : إذا صحت إن السادات كان بيتقاضى مبالغ مالية من أمريكا يبقى إيه؟
السيدة/ هدى عبد الناصر : هو اللى يكون عملها ومالوش شريك
عمروالليثى : ما هو ردك على اتهام السيدة هدى عبد الناصر بإن السادات حط السم لأبوها أثناء اجتماع القمة ؟
السيدة/ رقية السادات : أولا الاجتماع كان معلن والمفروض ما تلقيش الاتهامات على الناس جزافا كده الحظ ما حالفهاش فى الموضوع ده أمال أنا أقول إيه اللى السادات أغتيل أمام العالم كله
فاصل
مذيع : أيها السادة السيد أنور السادات نائب رئيس الجمهورية سوف يتحدث إليكم
أنورالسادات : فقدت الجمهورية العربية المتحدة ، وفقدت الأمة العربية كلها رجلا من أشجع الرجال ، رجلا من أغنى الرجال ، رجلا من أغلى الرجال ومن أخلص الرجال هو الرئيس جمال عبد الناصر
فاصل
مشاهد لجنازة الرئيس جمال عبد الناصر
عمروالليثى : عزيزى المشاهد قدمنا لكم كشف حساب لما قدمناه على مدارالعام الماضى وقمنا بتوثيق المعلومات بحيادية تامة وعرضنا كل وجهات النظردون التحيزلأحد وبمنتهى الشفافية وبحيادية تامة وانفردنا بتقديم شهود العيان الذين لم يظهروا على شاشات التليفزيون المصرى ولا الشاشات العربية الأخرى ونعدكم بتقديم الجديد كما عهدناكم دائما فتابعونا فى الحلقات القادمة بإذن الله