حديث المدينة

مفيد فوزى :دخلت عش الدبابير برجليا دخلتة دفاعا عن قوت ولقمة عيش 100 الف صياد فى بحيرة المنزلة أكبر بحيرات مصر على الاطلاق والمورد الاول لثروتنا السمكية التى كانت بقول التى كانت ليه لاسباب مختلفة تحت سمع وبصر الدولة ويبدو ان فى البحيرة سمك قرش آدامى
طبعا بيستطيع انه يأكل الاسماك الصغيره اللى هما الصيادين الغلابة سمك قرش ده يعنى سواء من
الصيادين او من اصحاب النفوذ اللى الحس الشعبى فى مصر يقول اللى ايديهم طايلة واللى يعترض او يكشف بلاوى البحيرة من ردم او تعديات او حفارات تشتغل من نصف الليل للفجر وفى النهار تختفى تماما اللى يكشف ده ثمنه عيار يعنى رصاصة وسمعت عشرات الحكايات الدامية الموضوع حساس ودقيق ويحتاج ليس فقط لتصرف وزارة البيئة مع الاحترام لكل اللى بتعملة ولكن يحتاج لاكثر من جهة يحتاج لتعاون شديد يمكن ان يحل هذه الازمة ويفك الضفائر المشتركة بين اطراف ثلاثة هما وزارة البيئة ووزارة الزراعة ووزارة السكان يعنى ووزارة السكان اكثر من جهة مسئولة عن بحيرة المنزلة الغلابة من الصيادين معندهمش غير الشكوى انا واجهت انهاردة شئ غريب عمرى ما واجهتة فى حياتى واجهت صراخ من الناس يبدو ان المسالة بتحتاج الى اصغاء حقيقى من اذن الدولة التحقيق فى بحيرة المنزلة صوت وصورة فى حديث المدينة
فاصل
صياد :هيجيبوا اية دول قسما باللة ما يجوا خمسة كيلو
مفيد فوزى :استاذ احمد معوض محدش يقف يسمع الصيادين وهى بتتكلم عشان يبقى عندهم حرية فى الكلام عبد الكريم شيخ الصيادين
عبد الكريم :ايوها يا بيه
مفيد فوزى :ايه مشكلة الصيادين
عبد الكريم :مشكلة الصيادين تعديات وتطهير البواغيز يا بيه تطهير البواغير البواغير الطمى
مفيد فوزى : حاجة حاجة التعديات دى يعنى ايه
عبد الكريم :التعديات الناس داخل البحيرة المشكلة الاساسية سعت البواغيز
مفيد فوزى :لتعديات داخل البحيرة
عبد الكريم :ايوها يا بية
مفيد فوزى : من مين من الصيادين
عبد الكريم :من ا لصيادين
مفيد فوزى :يعنى هما بيعملوا التعديات على الارض بيردموها
عبد الكريم :دى اقلية يا بيه
مفيد فوزى :اقلية يردموها
عبد الكريم :ويمنع صياد غلبان من الصيد فيها
مفيد فوزى :مين اللى بيمنع
عبد الكريم :اقلية
مفيد فوزى : الصيادين الاقلية
عبد الكريم :اه
مفيد فوزى : يعنى فيه صيادين بتعمل بتجيب حفارات وتردم
عبد الكريم :يوا يا باشا
مفيد فوزى : يعنى ده جزء من اخطاء الصيادين
عبد الكريم : ماشى تحت امرك يا باشا
مفيد فوزى :مش ده حقيقة
عبد الكريم :اه
مفيد فوزى :ايه كمان
عبد الكريم :المشكلة الكبيرة بتعتنا يا بيه تنظيف البواغيزوالصرف الصحى والزراعى والصناعى سعت البواغيز
مفيد فوزى :البواغيز
عبد الكريم : اه
مفيد فوزى :البوغاز بيحصل له ايه ؟
عبد الكريم : البوغاز منسوب المية العالية من الصرف الصحى عوزين تطهير البواغيز بيكون بشفاط
مفيد فوزى :الشفاط ده غالى بيقولوا
عبد الكريم : ب 90 مليون جنية
مفيد فوزى :90 مليون جنية وا لا 90 مليون يورو
عبد الكريم : 90 مليون جنية
مفيد فوزى : 90 مليون جنية
عبد الكريم :ايوها يا باشا
مفيد فوزى :طب ما تخدوا من القوات المسلحة تديكم عن طريق وزير البيئة
عبد الكريم :احنا بنطالب الهيئة المسئولة وزارة الزراعة
مفيد فوزى :الشفط ده يعمل ا يه
عبد الكريم : يشفط كل حاجة ويخلى المية الحدقة تيجى تخلى كل البحيرة تقضى على ورد النيل
وتقضى على التعديات
مفيد فوزى :ورد النيل خطورتة ايه
عبد الكريم : بيعلى منسوب الميه وتجيب الامراض للصيادين الكى والكبد والكلام ده سعت
مفيد فوزى : يعنى الصيادين بيصابوا بفشل كلوى وايه
عبد الكريم : بدى وبلهارسيا
مفيد فوزى :من ورا ورد النيل
عبد الكريم : من ورا ورد النيل لكن الميه حلوه لكن لما المية حدقة ميكنش عندنا اصابة ويتم القضاء نهائيا على التعديات داخل البحيرة من حوش ودود وورد النيل
مفيد فوزى :حوش اللى هى ايه
عبد الكريم : كل واحد مستقطع حتة من ا لبحيرة
مفيد فوزى :من الصيادين وعمل عليها مزرعة والحفارات الاهلية واحنا بنطالب بمصادرة الحفارات الاهلية ويجى الصياد ما يمنفعش يشتغل بحوشة انما ايه مستولى على الارض
مفيد فوزى :ايه مشكلة الصيادين فى البحيرة
صياد :المشكلة ان واضعين اليد فى البحيرة
مفيد فوزى :مين واضعين اليد دول ؟
صياد : ناس بلطجية قاعدين فيها
مفيد فوزى :اه مين صيادين
صياد : صيادين من المنزلة ومن النسيمة من الشلول ومن المطرية
مفيد فوزى :دول صيادين بيشتغلوا صيادين
صياد : لآ واضعين يد عاملين حوش عاملين مزارع
مفيد فوزى : حوش يعنى ايه
صياد : يعنى جايبين حفارات وعاملين زى مزارع سمكية كدة فى البحيرة مزارع صناعية فبيربوا فيها السمك الصغير بيفضل فيها بيفضل سنه وبعدين بيبعوها ب 10000 جنية كل اللى بيجبوه بيحطة فيها والسمك دوت
مفيد فوزى : وده اسمه الزريعة ؟
صياد :الزريعه الصغيره
مفيد فوزى : الزريعة الصغيره
صياد :البلطى
مفيد فوزى :علشان يكبر
صياد : علشان يكبربيبيعة لمصلحتة الشخصية فقط
مفيد فوزى :يعنى ايه لمصلحتة الشخصية مش جوا جمعية او اى حاجة
صياد : لأ ده بيبيعة فى اى مكان بيبيعة فى مصر فى اسماعيلية
مفيد فوزى : الحكومه بتقول ان السمك اللى انتوا بتخدوة من البحيرة غالبا مسموم لانه من التلوث مسموم
صياد :اه فيه هنا هوت ترعة بحر البقر بترمى عندنا فيه قنال كدة ملوث فا بيجى على البوغاز على المية الملحة تيجى المية الملحة لو البوغاز تطهر وجت ميه
مفيد فوزى : بتكلم على السمك يا راجل
صياد :لأ السمك حلو احنا بنكلة مجراش لنا حاجة
مفيد فوزى :امال الحكومة بتقول انه سمك مسموم لية
صياد :والله ياريت احنا مش لاقين نأكلة ده حلوسمك جميل وحلو بيقولوا مسموم انا باسمع فى الجرايد بس هو سمك حلو بنكلة مجراش لنا حاجة
فاصل
صياد : السلام عليكم ايوها يا استاذ مفيد
مفيد فوزى : ايه مشكلة الصيادين انتوا فى الرزق يعنى
صياد : اه
مفيد فوزى : ايه
صياد :الرزق دلوقتى عاد ضيق علينا خالص بالنسبة للبسلين والعلاوى والناس اللى هما
مسكين العلاوى دول ومعاهم سلاح وبيتهجموا الصياد الغلبان اللى عاوز يجيب له 5 جنية فى بيته مفيش عشان يصرف مفيش مفيش مصدر رزق
مفيد فوزى : سبب ده ايه
صياد : سبب دوه الناس دلوقتى كل اللى له حته جنب البحر كده عاوز ياخذ البحر كله لحسابة
مفيد فوزى : مين الناس دول
صياد : الناس دول ناس فى البحر وناس وضع يد هما صيادين هما صيادين صيادين بس ايه صيادين زى ما تقول ايه سمك كبير وسمك ضغيف هما السمك الكبير هما الحيتان
صياد :غلابه
مفيد فوزى :انتوا صيادين وهما سمك القرش ؟
صياد :هما سمك القرس
مفيد فوزى :وانتوا غلابة
صياد : واحنا غلابة
مفيد فوزى :انت بتكسب كام فى اليوم
صياد :بكسب من غير رزق خالص 15 جنية يوم ما اتنطت خالص
مفيد فوزى : وقبل كده كت بتكسب كام
صياد :قبل كدة كان بسم الله مشاء الله كان مكسب كويس باقدر اعيش وباقدر افتح بيت وااكل عيال دلوقتى اوريك الصيده بتعتنا اهى يعنى صيدة بتاعت 7 اسر 7 اسر ان جينا نحسبهم مش هيجى للراجل 5 جنية قسما بالله ما يجى للراجل 5 جنية
مفيد فوزى :امال انت بتبيع والا بتاكل منه
صياد :لأ انا بأبيع وبطلع لمؤاخذة حاجة للعيال الصغيره يكلوا منه
مفيد فوزى :اه
صياد : ده ل 7 رجالة 7 رجالة فتحين بيوت هيجيبوا ايه دول احنا 7 رجالة كل اسرة فيها 7 انفار
ايوها يا استاذ مفيد احنا 7 رجالة موجودين كل واحد عندة 6 عيال ميأكلوش عيش حاف ومنعرفش نعمل ايه نسرق والا ننهب والا نعمل ايه البحر دلوقتى البحيرة ماتت خالص وكل واحد من الناس دى بيريح نفسة بيقول انا هسافر اروح ليبيا واروح هنا واروح هنا ويلف ويرجع البحيرة برضه لية
مفيد فوزى :من مين من الصيادين ؟
صياد :من الاهالى
مفيد فوزى : اهالى مين ؟
صياد : الناس بتلف البحر مهماش مسموعين فى البلد بنقول تعبانين تعبانين احنا لسه داخلين اهو لما بنطلع بنطلع تعبانين وبنيجى تعبانين من الشغل اللى احنا بنشتغلة محنش قادرين ده كله قافل على بعضة اهو كل واحد بيخلص نفسة محدش بيدور على البلددلوقتى اى واحد بيشتغل فى البلد بييقول لك هعمل واعمل ويجى ساعة لما يكون موجود ما بيعملش حاجة للناس واللى موجود محدش بيسأل عن حد كل واحد بدور على نفسة بس مسئولية مين
صياد : ادى صيد الرجالة اهو ما يجبش عيش حاف دول يعملوا ايه ما يعملوش حاجة
مفيد فوزى :ايه اخطاء الصيادين
صياد :اخطاء الصيادين الميه يا حاج
مفيد فوزى :بقولك اخطاء يا راجل
صياد :الاخطاء اللى هو ورد النيل
مفيد فوزى :علاقة الصيادين ايه بورد النيل
صياد : بيقفل علينا البحيرة
مفيد فوزى : ايه
صياد : بيقفل البحيرة علينا وبيحوش الناس تمشى فى البحر المسطحات تمشى فى البحر بالليل
مفيد فوزى :دى دى دى يعنى من اخلاق الغلط للصيادين
صياد : من غلط الصيادين ورد النيل
مفيد فوزى :وانت صياد
صياد :وانا صياد
مفيد فوزى : وانت صياد وبتعترف بكدة
صياد : ايوه بعترف وصاحب سلايب ومش عاوز حد عاوز الميه الحدقة تيجى تقضى على دى ودى
مفيد فوزى : طب والصيادين اذا كان لقمة عشهم من هنا بيعملوا المخالفات دى ليه
صياد : هو اللى بيجى ورد النيل مخالفة غصب عنا بيتعمل غصبا عنا بنعملة هو بيجى لو ماحشنهش هو بيقفل عندنا
مفيد فوزى : السمك اللى هنا ملوث
صياد : لأ مفيش تلويث هو معدش الا الشبار والقرموط -
مفيد فوزى :مالة
صياد : هو الموجود فى بحيرتنا
مفيد فوزى : وغيره
صياد : مفيش مفيش سمك ابيض خالص معدش بيجى هنا
مفيد فوزى :ليه
صياد :مفيش مية ملحة بتيجى لو فيه ميه ملحة بتيجى هيجى
مفيد فوزى :الحكومة بتقول ان ده السمك ده ملوث
صياد : مفيش تلويث فى الحاجات دى الصرف الصحى اتحول ومفيش تلويث فى بحيرتنا خالص
احسن سمك بتاع بحيرة المنزلة بس ناقصنا ان اية المية الملحة تجيب الكبار وتجيب الحناجر وتجيب والقلاقل وتجيب الحاجات دى
مفيد فوزى : ايه مشكلة الصيادين فى بحيرة المنزلة ؟
صياد : مشك الصيادين فى بحيرة المنزلة ورد النيل احنا هنا فى بحيرة المنزلة بنقول عليه البشنين اللى هو ورد النيل دى جاى من الصرف الصحى بتاع مصر بيصب عندنا فى البحيرة احنا عايزين نمنع الصرف الصحى بتاع القاهرة من البحيرة ونطهر البواغيز
مفيد فوزى : مسئولية مين؟
صياد :مسئولية الامن هنا ومسئولية الثروة السمكية
مفيد فوزى : يعنى مفروض تمنع الصرف الصحى المفروض الصرف الصحى ده يروح فين
صياد :المفروض يرموة فى اى حتة احنا مش ذنبنا بقى
مفيد فوزى : قول لى افتراح لان انا لازم افهم
صياد : ممكن يترمى فى سيما هو جنب سيما خالص
مفيد فوزى :فى الجبل الاصفر؟
صياد : فى الجبل الاصفرفى الجبل لااحمر فى اى مكان ويتطهر البواغيز تيجى المية الحدقة ورد النيل ده والزرع ده كلة يتمسح
مفيد فوزى : اول ما تيجى المية الحدقة
صياد : اول ما تيجى المية الحدقة ويكثر الخير فى البحيرة لان بيجينا من ناحية الغرب مية حلوة
ومن ناحية المالح البحر الابيض مية حدقة فا بيخلط الاثنين فا المية بتبقى ميه دلعه كده فا بيجيب من احلى انواع السمك فى العالم
مفيد فوزى : السمك بتعكم مسموم زى ما بتقول الحكومة
صياد : مش مسموم ولا حاجة اللى هو فى المكان اللى فيه الصرف الصحى
مفيد فوزى : المسموم اللى هو فى المكان اللى فيه الصرف الصحى فين حتة الاماكن دى
صياد : الاماكن دى مسكة دلوقتى البحيرة كلها
مفيد فوزى : اذن السمك الموجود فى البحيرة ملوث
صياد :السمك دلوقتى الموجود فى البحيرة ملوث من الميه دى
مفيد فوزى : حقيقة
صياد : حقيقة ملوث
مفيد فوزى : يعنى انت انت راجل كبير فا مش هتكذب
صياد : لأ
مفيد فوزى :ولا هتجمل الصورة
صياد :بمارس مهنة الصيد من 50 سنه وانا باشتغل صياد فى المطرية معنديش شغلة الا هى دلوقتى جيت على جنب معنتش باسرح ولا اروح الناس اللى اخذوا البحيرة لو اى واحد صياد غلبان مشى ينضرب بالنار
مفيد فوزى : يعنى ايه ينضرب بالنار
صياد : ينضرب بالى معاهم الى
مفيد فوزى : مين ؟
صياد :اللى معاهم رشاشا ت الناس اللى اخذه البحيرة
مفيد فوزى : مين دول
صياد : الاقطاعيين اللى اخذين البحيرة دلوقتى الفدان فى البحيرة ب 100 الف جنية ميتنا ميتنا دى بتاعتنا احنا يا صيادين يا غلابة راحت واساسة ورد النيل بيجى يعشش عليه ويعمل مزارع داخلة
ويبيع انهاردة بحيرة المنزلة مفيهاش خمس عائلات من المطرية وكلة جاى من البلاد الثانية من المنزلة والجمالية ورسا الجمالية والعجيرة والطوابرة والبلاد دى كلها باعوا الاراضى الزراعية فى البلد ويجوا يشتروا فى بحيرتنا هنا لان الفدان بيجيب 100 الف جنية فى الاسبوع
مفيد فوزى :قصدك بيردموا فى البحيرة
صياد : بيلفوة
مفيد فوزى :بيلفوة يعنى ا يه
صياد : بيلفوة بالفحارات بيلفوها يعملوا رديم عليه ويجيبوا رديم
مفيد فوزى :الفحارات دى بتشتغل بالليل
صياد :بتشتغل بالليل وبالنهار وكل ساعة
مفيد فوزى : المسطحات بتشوفها فين
صياد :شرطة المسطحات بيقولوا احنا ممنوعين من المشى بالليل
مفيد فوزى : بتقول لى الجمعية مش هتقول لك الحقيقة
صياد :مش هتقول لك الحقيقة لان الجمعية مع المسطحات مع هيئة الثروةالسمكية متوفقين على ان البحيرة دى كلها كان 750 الف فدان اصبحت البحيرة حوالى 120 الف فدان طرق يمشوا منها طرق للصياد يمشى منها بس لكن ممنوع يصطاد فى البحيرة
مفيد فوزى : ليه؟
صياد : لان فى هناك بلطجية اخذين حوش واخذين سدود واخذين حاجة وقفلين البحيرة ومفيش حد بيستطيع يتكلم مع الناس دى
مفيد فوزى : والبحيرة اية اللى خلى مساحتها بعد ما كانت 750 الف فدان بقت 119
صياد :اتجففت من الناس البلطجية والطريقة اللى اتعملت فيها وبور سعيد بنت فيها مساكن والطريق الدائرى الطريق اللى رايح بورسعيد
مفيد فوزى : ده بعين الدولة وشيفاه وعرفاه
صياد : بعين الدولة وشيفاه وعرفاة الدولة شيفاه وعرفاه
مفيد فوزى :ايه المشاكل اللى بتواجة الصيادين فى الرزق
صياد : المشكلة اللى بتواجة الصيادين الصياد ده لو طلع يصطاد فى اى سده من السدود يضربوا عليه بالنار
فاصل
مفيد فوزى : اكثر من مره طوال هذا التحقيق اسمع كلمة الصياد اللى يرفع صوته والا يحتج والا يكشفعن حاجة بيأخذ له عيار نارى ما بقتش عارف اجاوب وبعدين قابلت فى السكة سيدتان فقدوا اخوهم فى عملية من هذه العمليات كان صياد وحاول يتطاول على احد واخذ له عيار نارى
اتحدث مع محافظ احترمة فهو محافظ بخلفية امنية سيادة المحافظ سمير سلام هل قانون العيار النارى هو الحاكم الان فى بحيرة المنزلة
سمير سلام: ابدا ده كلام غير حقيقى ما اقدرش اقول ان انا سمعت عنه لان انا موجود هنا فى المحافظة بقالى سنة تقريبا وقضية ان البحيرة فيها صياد صغير وصياد كبير وريس صيادين ده مجتمع فيه الصغير فية الكبير فيه كذا فيه كذا لكن هناك امن قائم برسالتة مضبوط وانا شخصيا رحت هناك فى هذه البحيرة واستقليت لنش ولفيت بيه البحيرة كلها وكان معايا السادة اعضاء مجلس الشعب والوحدات المحلية كلهم لم نجد اى شئ من هذا الكلام وشفت بعينى شرطة لمسطحات المائية كم المضبوطات اللى موجود هناك يعنى سيادتك كنت موجود هناك واكيد شفته كم المراكب والغزل والادوات اللى بتستخدم فى التعديات على البحيرة يفوق الخيال يعنى هناك اللى هى وحدة المسطحات المائية كادت تكون مفيهاش مكان للتحفظ على المضبوطات اللى بتضبط يوميا فاين هذا الكلام
مفيد فوزى : نعم
سمير سلام: بقول لسيادتك انا اجتمعت مع الصيادين كلهم
مفيد فوزى : هل ارضتك حالتهم
سمير سلام: الناس دى مجتمع بسيط فيه الكبير وفيه الصغير لكنهم لهم سمة تميزة ان هما كلهم ارزقية يعنى ناس بيطلعوا على باب الله اللى بيطلع على باب الله ده مش عارف رزقة انهاردة ايه يطلع يصطاد سمك فى البحيرة وبيرجع بالسروح بتاعة يطرحة فى الاسواق وبيشتغل اليوم بيومة
مفيد فوزى : هسأل سيادتك هل السمك فى هذه البحيرة ملوث
سمير سلام: ابدا وانا عندى تقرير اجيبة لسيادتك الان حالاموجود فيه ان الاسماك التى تخرج من هذه البحيرة ليس بها اى نسبة تلوث
مفيد فوزى : اى تقرير يا افندم
سمير سلام:التقرير من معامل الصحة المركزية موجودا حاليا ده من مديرية الصحة
مفيد فوزى : المعمل الالكتلوجى بالمنصورة بيقول انه الاسماك ده تقرير ثانى
سمير سلام: اه وده تقرير ثانى ا هو
مفيد فوزى :بتاعة المنزلة صالحة للاستهلاك الادمى ومعمل السموم فى المنصورة بيقول صالحة للاستهلاك الادامى والمعامل المركزيه
سمير سلام: ايوها دى مهمة
مفيد فوزى :اه فى القاهرة قالت انها صالحة للاستهلاك الادمى ومعامل الرصد بتقول صالحة للاستهلاك الادمى وبعدين المعمل البترولوجى ثانى فى 15/3/ قال انها صالحة للاستهلاك ا لادمى ومعامل معمل السموم فى المنصورة ثانى بيؤكد انها صالحة للاستهلاك الادمى
سمير سلام: واهمهم طبعا المعمل المركزى فى القاهرة اللى هو
مفيد فوزى : تسمح لى اقول لك ملاحظة
سمير سلام: ايوه
مفيد فوزى : تحسبا انا مش هاكل سمك من بحيرة المنزلة
سمير سلام:اه
مفيد فوزى : تحسبا
سمير سلام: بس انا هأكلك انهاردة سمك من بحيرة المنزلة
مفيد فوزى : تحسبا مش هاكل سمك
سمير سلام: هههههه ليه بس
مفيد فوزى : تحسبا
سمير سلام: اه
مفيد فوزى :تحسبا رغم كل هذا
سمير سلام:انا عندى تقرير ثانى اهو
مفيد فوزى :بيقول ايه يا افندم التقرير ا لثانى
سمير سلام: برضه التقرير ا لثانى بيتكلم على انواع السمك كلها يعنى بيتكلم فى انواع السمك البلطى والقراميط والبلطى سيادتك القراميط دى من الاسماك اللى بتعيش فى الارض
مفيد فوزى :سيادة المحافظ يا خوفى من التقارير
سمير سلام: ابدا
مفيد فوزى : معلش انا حساس عندى ارتكارية منها
سمير سلام:احنا ما بنشككش فى التقارير اطلاقا
مفيد فوزى :انا لا اشكك ولكنى اعترف
سمير سلام: المقوله اهى من المعامل المركزية من وزارة الصحة مش من عندنا
مفيد فوزى :اه
سمير سلام: وانا عايز اقول لسيادتك حاجة من اجود انواع الاسماك بحيرة المنزلة
مفيد فوزى :انا هاكل سمك بناءا على قرار السيد المحافظ اذا جت لى مشكلة هبلغة وسأعلن فى الصحف ا ن ده اسماك بحيرة المنزلة وما جرى لى منها
فاصل
صياد : هيجيبوا ايه دول قسما بالله ما يجيبوا خمسة جنية ما يأكلوش عيش حاف
فاصل
مفيد فوزى : ايه عذبات الصيادين
صياد : حضرتك احنا عايزين كلمتين بس مفيدين
مفيد فوزى : اتفضل
صياد : تحويل الصرف الصحى اللى بيجيب الفشل الكلوى للصيادين وعاوزين الميه الحدقة اللى تقضى على ورد النيل واى حاجة خطرة وعاوزين تزويد كراكات
مفيد فوزى : كراكات يعملوا ايه ؟
صياد :يطهروا حضرتك
مفيد فوزى : منين
صياد :من الثروة السمكية والمسطحات مسئوليتهم
مفيد فوزى :الثروة السمكية بتعمل ايه
صياد : دلوقتى بتكسر بيتعمل تانىيوم وراهم دلوقتى بتكسر
مفيد فوزى : بيتعمل ايه من وراهم ؟
صياد : الاهالى اللى هما واضعين يدهم على البحيرة بالسلاح والعافية والنفوذ ووووو حضرتك دلوقتى كله راح ليبيا واللى راح السعودية اللى راح البحر الاحمر والمركب بيهم غرق لان مش عارف يأكل اولاده اربع طلبات واحد اثنين ثلاثة تحويل الصرف الصحى اللى جاب الفشل الكلوى
مفيد فوزى : غيره
صياد :الميه الحدقة
مفيد فوزى : غيره
صياد : الكراكات عربيه تنزل بحيرة المنزلة
مفيد فوزى : ايه مشكلة الصيادين ؟
صياد : مشكلة الصيادين مشكلة كبيرة بقلها 40 سنه
مفيد فوزى : انت كنت على وشك تقول مشكلة الشياطين
صياد : لأ الصيادين
مفيد فوزى : وهما الصيادين برضه جزء منهم
صياد : اللسان اللى عجز
مفيد فوزى : ايوها ايوها اللسان اللى عجزالصيادين برضه منهم شياطين
صياد : تمام تمام
مفيد فوزى : بيعملوا ايه الشياطين دول
صياد : الصيادين دول بيتعركوا بقلهم 40 سنه
مفيد فوزى :الصيادين
صياد : الصيادين بيتعركوا على بحيرة المنزلة بقلهم 40 سنه المشكلة دى مشكلة كبيرة
مفيد فوزى : طب فهمنى يا حاج يعنى انا جاة قاطع 290كيلو 300 كيلو من مصر وماشى فى طرق متربة ومتعذب وصاحى الساعة 5 الصبح عشان اجى المكان ورجلتى معانا بتدور ومنحاز للصيادين تطلع تقولى ان الصيادين هم سبب المشكلة
صياد : الصيادين انهم
مفيد فوزى : فهمنى انتوا 30 الف صياد
صياد : الصيادين بينقسموا لقسمين
مفيد فوزى : اتفضل
صياد : قسم مفترى على البحيرة وقسم غلبان
مفيد فوزى : قسم معتدى على البحيرة وقسم غلبان الغلبنين دول اد ايه
صياد : اغلبنين دول ثلاثة ارباع الصيادين
مفيد فوزى : والربع معتدى
صياد : والر بع معتدى
مفيد فوزى : ادام الحكومه
صياد : ايوه
مفيد فوزى : اه
صياد : لكن فى الاونه الاخيرة احنا عندنا المسئولين الحقيقة يعنى قاموا بحملة كبيرة وطهروا البحيرة وعلى رأسهم السيد المحافظ
مفيد فوزى : مليش دعوة بالمحافظ الناس بتشتغل ده دورها ما تشكرليش حد على الهوا
صياد : بيشتغلوا
مفيد فوزى :اه بيشتغلوا
صياد : اه
مفيد فوزى : لكن لسة امامهم مشوار طويل
صياد : تمام
مفيد فوزى : امال الناس اللى طلعوا امامى سمك وقالو ا ما يجبش لقمة عيش حاف
صياد : هقول لسعادتك على حاجة المشكلة دى كلها كلها كلها برمتها كده الاربعين سنه حلها فى حاجتين
مفيد فوزى : اتفضل
صياد : وتتحل من غير فلوس
مفيد فوزى : اتفضل للللل
صياد : وببلاش البوغيز حوالى 200حفار اهلى بيشتغلوا هما دول المعتادين دول يطلعوا من البحيرة البواغيز الميه الحدقة تيجى تطير اللى انت حضرتك شايفة ده كله ببلاش
مفيد فوزى : وبعدين
صياد : وبعدين عايزين شفاط ب 150 الف جنية هو ده حل المشكلة
مفيد فوزى : بس
صياد : اه
مفيد فوزى : الشفاط فى ايد البيئة وزارةالبيئة
صياد : ما اقدرش احدد اختصاص معرفش مين اللى يجيبة لكن هو فى ايد الدولة
مفيد فوزى :استاذ ابو بكر الشهاوى انت مسؤل البيئة ومن اختصاصاتك بحيرة المنزلة ارجو ان تحدد فى اقصر نقاط محددة شوف بقولك تحدد فى اقصر نقاط محددة اخطاء الصيادين ده السؤال الاول
ابو بكر الشهاوى : السؤال الاول ان فيه بعض الصيادين بتعمل بوص وهيش والسمك بيتجمع تحتية فالصيادين دول بيمنعوا الصيادين الصغيرين ان هما يصطادوا
مفيد فوزى : اثنين اخبار التعديات الكبيرة ايه
ابو بكر الشهاوى : التعديات فية تعديات من الاهالى وفيه تعديات منفعة عامة لانشاء الطريق الدولى
مفيد فوزى : سيبك من المنفعة العامة البيئة عملت اية للناس اللى عملوا تعديات وردموا وعملوا مزارع سمكية خاصة وحواليها احواش البيئة بتعمل ايه فى الحالات دى هل ايدكم مش طايلة
ابو بكر الشهاوى :لأ احنا بنعمل شغل مع شرطة المسطحات وعملنا حملة موسعة
مفيد فوزى : ايه رأيك ان الحملة دى بتشتغل فى النهار ايه رأيك ان كل الحفارات بتشغل بالليل وانت عارف كده
ابو بكر الشهاوى :ما هى دى الحفارات لازم تشتغل ولازم الحملة تشتغل
مفيد فوزى :حفارات بتاعت الناس اللى بيتعدوا بيشتغلوا بالليل بعيد عن عيون المسطحات
ابو بكر الشهاوى : احنا بنشيل الهيش اللى هو السمك بيتربى تحتية
مفيد فوزى : مين انتوا؟
ابو بكر الشهاوى :احنا مع شرطة المسطحات
مفيد فوزى : انا باكلمك على حفارات خاصة بتاعت المتعدين
ابو بكر الشهاوى :فيه حملات من شرطة المسطحات المفروض انها بتضبط الحالات دى
مفيد فوزى : بتشتغل بالنهار
ابو بكر الشهاوى : بتشتغل وساعات بتعمل حملات بالليل ولو انضبط احد بيتصادر
مفيد فوزى : هل صادرتوا؟
ابو بكر الشهاوى :مسطحات المياه صادرت
مفيد فوزى : البيئة هل ليها شرطة
ابو بكر الشهاوى :شرطة البيئة والمسطحات معانا
مفيد فوزى :لأ ا لبيئة نفسها لها شرطة
ابو بكر الشهاوى :البيئة احنا التغطية القضائية
مفيد فوزى : هل التغطية القضائية بتستطيع انها تبقى فعالة ؟
ابو بكر الشهاوى :بالضبط اكيد اكيد
مفيد فوزى : ايه المشكلة امال فى بحيرة المنزلة؟
ابو بكر الشهاوى :ان الميه اللى بيحصل ارتفع منسوبها عن البحر كان الاول ميه البحر بتنزل على البحيرة بتموت كل الاخضر
مفيد فوزى :الناس اللى هتشوفك على التليفزيون تقول ايه مادام بيكلم مسئول البيئة هيقول لنا خبر مهم يحل الضائقة اللى عند الناس قول لهم حاجة
ابو بكر الشهاوى :فية محطة كبيرة جدا عملاقة بتتعمل فى بور سعيد
مفيد فوزى : تخلص امتى
ابو بكر الشهاوى : المفروض نهاية السنة دى
مفيد فوزى : محطة ايه
ابو بكر الشهاوى : محطة معالجة للصرف الصناعى لان فيه بعض المصانع بترمى صرف صناعى
مفيد فوزى : ما بتقولش ليه ما تقولى
ابو بكر الشهاوى :بقول لحضرتك بنعمل محطة معالجة
مفيد فوزى : قولى مشاكل الصرف اللى البيئة مهتمة بيها واحد
ابو بكر الشهاوى :الصرف الصحى والصرف الصناعى والصرف الزراعى
مفيد فوزى : دول هتعملوا فيهم ايه
ابو بكر الشهاوى :بالنسبة للصرف الصناعى فيه محطة عمالقة بتتم فى بورسعيد حاليا
مفيد فوزى :بالنسبة للصرف الزراعى
ابو بكر الشهاوى : اهم حاجة المزارعين مفروض ان هما يعملوا عملية ترشيد الموبيدات اللى بتنزل
مفيد فوزى : حد فهمهم
ابو بكر الشهاوى : المفروض ان كلية الزراعة
مفيد فوزى :لأ سيبك ما تستخدمش كلمة المفروض المشاهد اللى بيشوفنا مفتح ويفهم يقولك عمال يقول المفروض المفروض ده كلام غلط
ابو بكر الشهاوى :هو الصرف الزراعى مفيش فيه مشكلة ذى ما الناس متخيلة
مفيد فوزى :بيقولك الصرف ده كله الافضل انه يترمى فى الجبل الاصفر
ابو بكر الشهاوى : ده الصرف الزراعى ده يعتبر حاجة بتطهر البحيرة لانه ده صرف زراعى كمية كبيرة بتنزل ويعتبر نوع من انواع الخفيف لو لا قدر الله ووصل لها اى ملوثات
مفيد فوزى : امال الناس الصيادين اللى اصواتهم وصلة لنا دول متعذبين من ايه
ابو بكر الشهاوى :متعذبين من ان هما مبيعرفوش يصطادوا
مفيد فوزى : ليه ؟
ابو بكر الشهاوى : لان فية ناس اللى هى بتعمل الحوش دين السمك بيتربى تحتيها دايما اللى هما بيشتكوا لنا ودول اللى بيخلونا نشتغل عشنهم الحملات اللى احنا بنعملها باستمرا ر الحملات اللى احنا بنعملها بصفة مستمرة على طول احنا عملنا حملة موسعة والحملة مستمرة لغاية دلوقتى لتسع لوادر ونشيل اللى هى الهيش دون عشان نعطى فرصه لصغار الصيادين
مفيد فوزى : هل هما حاسين بجهد الحكومة
ابو بكر الشهاوى :اكيد اكيد الناس حاسة على فكرة مية البحيرة نفسها اتحسنت تحسن حلو
مفيد فوزى : السمك كل الصيادين اللى هما 60 - 70 سنه مش هيكذبوا عليا قالوا السمك ملوث اوعى تدافع السمك ملوث والا لأ
ابو بكر الشهاوى : لو ملوث بيصطادوه ليه
مفيد فوزى : الله ايوه
ابو بكر الشهاوى : بيصطادوه ليه بيكلوة ليه انا باكل سمك من البحيرة هل انا اكل سمك وهو ملوث دى اشعة بتتقال من كبار الصيادين علشان صغار الصيادين ما يصطادوش
مفيد فوزى : ايه الازمه فى حياة الصياد فى المنزلة انت راجل صياد
صياد :ايوها راجل شيخ صيادين جمبرية
مفيد فوزى : اه
صياد : الازمه دهيت حقنة واحدة بس ا للى هتأخذها البحيرة
مفيد فوزى : ايه هى؟
صياد : شوية المية الحدقة هيقضوا على ورد النيل والبوردى والغاب وتطهير البغاز ده اهم حاجة عند الغلابة دول
مفيد فوزى : طيب المية الحدقة الملحة تيجى ازاى للبحيرة
صياد : لو البوغاز متنظف كويس واخذ حقة فى التنظيف قوة ضغط البحر العالى هيتطرد المية الحلوة وهيموت ادامه وهيجيب خيرات تنزل البحيرة
مفيد فوزى :هل السمك الان ملوث؟
صياد : ملوث 100%
مفيد فوزى : عايز اقولك كلام وترد عليا بجدعنه وبرجولة وانت باين عليك راجل
صياد : الحمد لله
مفيد فوزى : قالوا لى ان حد من الناس اللى سجلوا معايا ملك نصف البحيرة صح
صياد : نصف البحيرة فيه واحد سجل معاك اه بس مالك مش نصف البحيرة جزء من البحيرة
اسمة على اقول على اسمه يعنى
مفيد فوزى : اه
صياد :على حوالى على يوسف حوالى
مفيد فوزى :ده عامل ايه يعنى يعنى مسيطر على ايه
صياد : مسيطر على الميه ويجى يعمل الميه لمؤاخذة ويعمل الناس الغلابه تحوشة يروح منعهم خت بال سيادتك وبيروح جايب الفحار فيه فحارات اهالى فى المطرية حوالى 200فحار لمؤاخذ والناس عارفة المسطحات عارفة والثروة عارفة بالاسم الناس ديت احنا لو احنا اتكلمنا بننضرب النارخت بال سيادتك اى واحد غلبان من المطرية يروح البحيرة يتكلم بينضرب وان ما انضربش بيتهدد فى البلد هنا خت بال سياتك احنا مش عارفين نتكلم مش عارفين صوتنا يوصل خت بالك وغلبنا عشان صوتنا يوصل
مفيد فوزى : انا جيلك اهو لغاية عندك وصاحى الساعة 5 الصبح وصوتى اتنبح
صياد : ياسيدى الله يخليك
مفيد فوزى : انا مش طالب منك انك تقولى ربنا يخليك انما عايز اقولك احنا بنيجى لغاية عندك عشان نسمع صوتك والراجل اللى انا سجلت معاه انا معنديش ملفات انا ما اقدرش اقول للامن قولوا لى ملفات الناس دى ايه انت بتقول الراجل ده يملك
صياد : جزء من البحيرة
مفيد فوزى : ليه
صياد :اصل البحيرة 750 فدان
مفيد فوزى : ليه كان حريص ان هو يسجل معايا
صياد : معرفش بقى هو دخل معرفش
مفيد فوزى : هو عنده مشاكل ص هو فيه مشاكل فى البحيرة يعنى
صياد : مفيش مشاكل فى البحيرة
مفيد فوزى : اللى زيه اللى زى على ده عند مشاكل
صياد :ايوه عنده مشاكل
مفيد فوزى : ايه مشاكلة
صياد : لمؤاخذه هو مستولى على مكان خت بالك انت وجاى دارى كل واحد يدارى على نفسة يعنى انا دلوقتى الراجل ده مستولى على مكانى ويدور على نفسة عشان انت والا غيرك يعنى انت دلوقتى الميه كانت مترين
مفيد فوزى : من الملوثات ولا من المعتدين؟
صياد : الملوثات والمعتدين
فاصل
مفيد فوزى :هل تعتقد ان الصيادين الصغيرين الغلابة وضائقتهم الشديدة اللى اتفجرت هذه ا لايام
والحملات اللى بتحصل من البيئة هل تعتقد انها تفيد الصياد لحظة ما
د/فرج الجبالى : انا هقول لسيادتك حاجة لما نتكلم عن مشكلة بحيرة المنزلة مش عايزين نختزلها فى كلام صيادين
مفيد فوزى : اه
د/فرج الجبالى : بحيرة المنزلة بتعانى بعلا من مشاكل لكن المشكلة اللى فيها ليست مشكلة نفوذ ولامراكز قوى ولا بلطجية لان فيه يا مفيد بيه فعلا ان هناك امن وامن قائم بدورة رغم ان المساحة كبيرة وانا اشتغلت فى محافظات عديدة او مدريات امن فيها العديد من البحيرات احنا عندنا خمس بحيرات فى مصر ادكو البرلس البردويل مريوط اسكندرية بحيرة المنزلة اهمها بحيرة المنزلة والبرلس
مفيد فوزى : نعم
د/فرج الجبالى :اهميتها بترتجع ان مشكلة المنزلة انها بحيرة حصل لها نوع من الاعتداء والتجريف والتجفيف قصدى فى مناطق كثيرة يعنى البحيرة دى اصلا كانت مساحتها 750 الف فدان صارت 119 او تزيد قليلا 140 او حاجة زى كده تعديات الاهالى على مدار السينين اللى فاتوا مش وليدة انهاردة او السنوات العشر اللى فاتوا ده على مدارخمسين سنة فاتوا جففوا البحيرة دى عشان يستفيدوا من اراضيها دى عشان يعملوا اما مساكن او اراضى رزاعية الاراضى الرزاعية هناك من اجود الارضى اللى ممكن تزرع والاراضى هناك اصبح لها قيمة كبيرة
مفيد فوزى : التجفيف ده يا افندم تم تحت سمع وبصر الدولة
د/فرج الجبالى : التجفيف دة
مفيد فوزى : تم خفية
د/فرج الجبالى : مش خفية على مراحل تدريجى بحيث ان هو ممكن يزود متر فى اثنين ثلاثة لا شك ان هذه الامور تمت فى غيبة من المسئولين لكن ما نقدرش نقول انها تمت فى يوم وليلة
مفيد فوزى :بيقولوا لى الحفارات بتشتغل بالليل بعد نصف الليل
د/فرج الجبالى : فى الفجر
مفيد فوزى : وفى النهار لا تعمل خشية المسطحات المائية
د/فرج الجبالى :وارد يا مفيد بيه ان تكون هناك مخالفات وان لم تكن هناك مخالفات لم يكن هناك مبرر لوجود شرطة اسمها المسطحات المائية
مفيد فوزى : نعم
د/فرج الجبالى : دا عندنا احنا فى محافظة الدقهلية ادارة كبيرة اسمها المسطحات المائية لا تعمل الا على بحيرة المنزلة رغم ان احنا عندنا مسطحات كبيرة ان احنا المحافظة الوحيدة اللى بتتميز ان فيها من السمطحات المائية المتعدده المتنوعه يعنى عندنا البحر الابيض المتوسط بطول 30 كيلو فى منطقة جمصة عندنا نهر النيل واصل من القاهرة من حدودنا مع القليوبية والغريبية الى شربين بمسافة حوالى 90 كيلو عندنا مسطحات بحيرات مائية كثيرة عندنا مصارف شرطة المسطحات المائية مركزة كل شغلها هناك واضافة الى ان هناك بتشتغل ليلا ونهارا لمكافحة ومعاقبة المجرمين والخارجين عن القانون بحيرة المنزله مشكلتها ليست فى الاشخاص وليست فى الكلام يقال ان هناك مراكز قوى لان العملية
مفيد فوزى : فيه ايه مشكلتها ؟
د/فرج الجبالى : مشكلتها انها بحيرة مصدر غنى من مصادر الثروةالسمكية والمعدنية فى منطقة كانت من الممكن ان تكون من مصادر الثروة الغنية لمصر وكانت مساحتها 750 الف فدان زى ما قلنا وصلنا الى انها بقت 150 الف فدان
مفيد فوزى : هل انت حزين لما وصلت ايه؟
د/فرج الجبالى :اناحزين جدا لان انا يمكن انا بحكم ان انا اصلا من اسكندرية وهى بلد ساحلية اعلم تماما قيمةالمية والسمك والصيد للناس كلها انهاردة اولا ده مجتمع صيادين مش عايزين نقول فيه الكبير وفيه الصغير وفيه الضعيف وفيه المريض وفية اللى بيحتاج ان هو يزاول هذه المهنة تجفيف البحيرة والتعدى على البحيرة ده بيترتب عليه طبعا مشاكل اجتماعية واقصادية كبيرة احنا بنقف مع الصيادين واجتمعت بيهم هنا وزوت اعانتهم لان احنا عندنا صندوق من الصناديق اللى هى بتخدم الصيادين قعدت مع الصيادين وحلينا مشاكلهم ونزلنا فيه حملات يمكن فى الفترة الاخيرة واكيد سيتك سمعت نزل الامن ضبط حاجات كثيرة لكن ليس من بينها كما يقال بنادق الية
مفيد فوزى : او اعيرة نارية او سلاح
د/فرج الجبالى : مفيش اصل هى بتبقى سلوكيات خاطئة قد تزيد فى معناها الى حد يعنى ان ممكن حد يحاول ان هو يسيطر على الناس الصغيرين عشان كذا وبتاع لكن كل ده بنعتبرة انه هو فى اطار المخالفات القانونية اللى بتستوجب تعقب الناس اللى احنا سمناهم مجرمين وده دور الشرطة والشرطة لا تقصر فيها اطلاقا ارجع تانى يا مفيد بيه اقول ان
مفيد فوزى : اتفضل
د/فرج الجبالى :المشكلة فى البحيرة ليست مشكلة صيادصغير وصياد كبير هذا الكلام المزعوم ليس له اساس من الصحة المشكلة ان هذه البحيرة وهى احدى خمس بحيرات فى مصر وتكاد تكون اهم بحيرة مع بحيرة البرلس اللى مفروض انها كانت بتمد مصر بتمنح مصر ثروة سمكية هائلة فعلا البحيرة مش اخذه الاهتمام الكافى
فاصل
مفيد فوزى :انا جيت لك البيت عشان اعرف بالضبط منك انت ايه المشكلة اللى بيقابلها زوجك كا صياد
زوجة صياد : هو دلوقتى زوجى بيسرح البحارة بيرجع مفيش لان هو مش عارف يشتغل فى البحيرة كلها دشنين وسدود والواحد اخر حتة مستولى عليها مهوش عارف كل ما يروح يشتغل يطلعوا عليه بالنار الناس كلها عادت كبيرة وهو ضعيف مهواش قادر يشتغل ولا قادر يصرف على البيت ساعات بيهاجر مهواش عايز يقعد فى البلد خالص طفشان فا احنا دلوقتى ساكنين وراء القطار من غير ميه ومن غير نور عايشين احنا دلوقتى 10 سنين من غير نور وبيطلعوا علينا الحرميه
مفيد فوزى : جنب البحيرة
زوجة صياد :جنب البحيرة احنا عايشين فى حته من غير نور بيتهجموا علينا
مفيد فوزى : كام سنه من غير نور
زوجة صياد : 10 سنين
مفيد فوزى : بعيد فى المنزلة
زوجة صياد :لأ وراء القطار هنا على طول
مفيد فوزى : ايوها يعنى فين حته
زوجة صياد : فى المطرية فى المطرية فا العيال كانوا فى المدارس مهماش عارفين يذكروا بسبب بردك النور
مفيد فوزى : 10 سنييييييييييين من غير كهربة
زوجة صياد : ايوها ايوها 10 سنين ونشتكى للكبار محدش بيسأل عننا
مفيد فوزى : نفسى اعرف العمل السياسى فى البلد لما الست دى تبقى عايشة فى بيت من 10 سنين مفيش كهربة يبقى العمل السياسى معناه ايه العمل السياسى هوحياة الناس اليومية انا اسف انا قطعت كلامها عشان بس اكلمكم عشان بس اقول ان العمل السياسى هو ان كل بيت فى هذه البلد زى ما سمعت الدكتور نظيف قريبا بيقول احنا خلصنا كذا % كهربة البلد كلها 10 سنين !!!
زوجة صياد : احنا لسة بنستحل عليهم
مفيد فوزى : 10 سنين ومدخلش النور
زوجة صياد :يقولوا شهر 6 شهر 4 شهر 5 قالوا لنا اجروا من الثروة السمكية اجرنا من الثروة السمكية يعنى احنا مش معترضين على حاجة
مفيد فوزى : اجرتوا ايه ؟
زوجة صياد : اجرنا الارض اللى احنا قاعدين فيها
مفيد فوزى : من ا لثروة السمكية ؟
زوجة صياد :الثروة السمكية قالت ان دى بحيرة وانتوا مستوليين عليها قلنا ماشى نأجر زى ما هما
عايزين زى ما هما الحاجة اللى بييقولوا عليها احنا بنعملها
مفيد فوزى : زوجك بيكسب كام فى اليوم دلوقتى
زوجة صياد : ما بيكملش 10 جنية هو 7 جنية 6 جنية ما بيعشوناش يا استاذ مفيد لية البحيرة معدش فيها سمك زى الاول
مفيد فوزى : سببة ايه
زوجة صياد : بيقولوا البشميل بيقولوا مش عارفة فيها مزارع ان راح حتة يشتغل فيها يطلعوا علية بالنار
مفيد فوزى : ايه حكاية النار دى اللى بيطلعوا عليه
زوجة صياد :بطلعوا بالنار على الناس ليه لان هما مستولين على حوز ومزارع ودى والناس بيطلعوا على بعض
مفيد فوزى :قولى مفيش ممكن انه اعضاء فى مجلس الشعب يثيروا القضية دى جوا مجلس الشعب
زوجة صياد :والله يا استاذ مفيد هو البلد عارفة الكبار بتاعت البلد عارفة بحالتها
مفيد فوزى :انت صياد يا راجل
محمد المرسى الصياد : صياد فين فى بحيرة المنزلة
مفيد فوزى : كام سنه صياد؟
محمد المرسى الصياد : حوالى 70 سنه 75 سنه كمان اوبيا كان بيشلنى علىكتفة وانا صياد
مفيد فوزى : طيب قولى ايه المشكلة اللى عند الصيادين
محمد المرسى الصياد : المشكلة اللى عند الصيادين يا ستعادة الباشا فيه عندى 3 فحارات بيطلعوا من الشلاتر باليل
مفيد فوزى : ايه عيل
محمد المرسى الصياد :عيل والله
مفيد فوزى : بيحفر فى البحيرة
محمد المرسى الصياد : بيحفر فى البحيرة
مفيد فوزى : منين العيل ده
محمد المرسى الصياد : اجولك بشويش عشان محدش يسمع ويجتلنى
مفيد فوزى :اه
محمد المرسى الصياد :اسمه موسى العاصى
مفيد فوزى :انت بتوشوشنى عشان محد ش يسمع
محمد المرسى الصياد :اه
مفيد فوزى : بيحفر ايه بقى
محمد المرسى الصياد : بيحفر هنا من السدايد الساعه ب 100 جنية
بيحفر طول الليل
مفيد فوزى : بياخذ فى الساعه 100
محمد المرسى الصياد : 100 جنية
مفيد فوزى : وبعدين
محمد المرسى الصياد : لما يعمل السيجا بيعمل الثانية جنب منها ويعمل تانى جار منها
مفيد فوزى : انت بتكسب كام فى اليوم
محمد المرسى الصياد : بكسب مثلا ان بعت طول النها ر وكسبت 15 جنية
مفيد فوزى : حضرتك عشت فترة طويلة من حياتك فى الثروة السمكية قرأت لك عنوان مقال بتتكلم فيه عن الازمة فى بحيرة المنزلة من فضلك لخص لى رأيك
د/فرج الجبالى : هقول لحضرتك بقى بحيرة المنزلة نشأت فى القرن السادس الميلاد بزلازال مدمر بمساحة 750 الف فدان
مفيد فوزى : صارت الان 119 ما اسباب ذلك
د/فرج الجبالى :اسباب ذلك عدة يعنى
مفيد فوزى : اهمها واحد
د/فرج الجبالى : اهمها بقى ان هيئة التعمير التابعة لوزارة الزراعة قامت بتجفيف اكثر من 90 % من الاراضى اللى تم تجفيفها
مفيد فوزى : يعنى الدولة
د/فرج الجبالى :ايوه الدولة نعم الدولة جففت فى البحيرة الدولة جففت فى البحيرة هيئة التعمير هيئة التعمير لما بتجفف بقى بتشجع ناس على العدوان على البحيرة
مفيد فوزى : اههههه
د/فرج الجبالى : فا اخطر حاجة فى العدوان بقى الناس اللى هما الثابتين بالبحيرة
مفيد فوزى : اللى هما الصيادين
د/فرج الجبالى :هم بقى صيادين على فلاحين
مفيد فوزى : اه
د/فرج الجبالى :وعشان بقى انصافا للحق ال90% من هؤلاء المعتدين ليسوا من المطرية مش من المطرية ولا حاجة دول من بلاد حوالين المطرية
مفيد فوزى : ازمة الصياد الان ايه؟
د/فرج الجبالى : ازمة الصياد ضيق البحيرة وكثرة الجزر
مفيد فوزى :والرزق ايضا
د/فرج الجبالى :ما طبعا عشان كده وبعدين انا كنت زمان وانا عندى 20 سنه فى الخمسينات كنت اقف على شاطئ البحيرة اجد بأن الافق عبارة عن ماء وسماء الافق
مفيد فوزى : الان
د/فرج الجبالى :الان سماء ونبات البشميل والغاب والبوص والحاجات دى
مفيد فوزى : النبات اللى انا شايفة اللى جيباه الكاميرا ده
د/فرج الجبالى :كل حبه لما بتنفصل تبقى الشجيرة الصغيره دى تنتج شجرة
مفيد فوزى :هل وانت راجل اشتغلت فى الثروة السمكية اسماك بحيرة المنزلة الان هل هى نقية والاملوثة
د/فرج الجبالى :لأ ملوثة
مفيد فوزى :انا عايز اسألك عن الثروة السمكية فى البلاد دى هل هى مخنوقة
صياد : هو سعتك دلوقتى ايه الثروة فى البحيرة مجنى عليها عن طريق فية 6 مصارف
مفيد فوزى : بحيرة المنزلة مجنى عليها
صياد : اه 6 مصارف صرف زراعى صرف صناعى صرف صحى بيصبوا فيها يوميا المصارف دى مش شغالة شغالة فى البحيرة على طول
مفيد فوزى : دى مصيبة
صياد : طبعا لازم بتاثر على البيئة اللى فى البحيرة
مفيد فوزى : الاجهزة دى للدولة مش ممكن انها تأخذ موقف حاسم من عملية الصرف
صياد : يغيروا المسار بتعها
مفيد فوزى : يبقى ايه
صياد : سعتك هما دى شغلهم يحددوا المكان المهم يبعدوا عن بحيرة المنزلة
مفيد فوزى : هو الصرف الصحى تبع ايه
ابو بكر الشهاوى : ما ستعتك عارف الصرف الصحى تبع ايه تبع ايه من فضلك
ابو بكر الشهاوى :تبع الهيئة العامة للصرف الصحى
مفيد فوزى :تتبع فى الدولة ايه
ابو بكر الشهاوى : تبع وزارة البيئة
مفيد فوزى :وانت تبع وزارة الزراعة
ابو بكر الشهاوى :ايوها طبعا
مفيد فوزى :الصيادين بيتخنقوا ما بين البيئة والزراعة
ابو بكر الشهاوى :لأ انا بقول لسعتك احنا المجنى علينا الصيادين بتوعى والبحيرة دى ولايتى والمصارف دى اللى بتصب موجوده من زمان مش لسة حديثة كانت من زمان موجودة فى البحيرة
مفيد فوزى : واحد همس كده فى اذنى وقالى ابقى خذ الشريط ده واتفرج عليه قالى الشريط ده بيكشف عن عصابة بتهرب الاثار فى بحيرة المنزلة بعد ان لجأ له بعض الاشخاص اللذين شاهدوا هذه الاثار وكشفها
ابو بكر الشهاوى :الاثار طبعا فية مجموعة اثار موجودة فى البحيرة ودى تبع الاثار مش تبعنا
مفيد فوزى : عمركم شفتوا عذاب راجل زى الراجل وانا بكلمة هو تبع وزارة الزراعة قلت له على الاثار الموجوده هنا قال لى لأ دى مش تبعى دى تبع وزارة الاثار تبع الثقافة يعنى تبع - زاهى حواس- قلت له طب والصرف الصحى قالى ما حضرتك عارف الصرف الصحى تبع مين تضيع المسئوليات فى هذه البلد من هذا التنطيط ولو كلمت واحد عاقل يقول لى لأ وزارة الزراعة تبقى وزارة الزراعة ملهاش دخل بحاجة بحيرة المنزلة انا ما شفتش فى حياتى رغبة فى الصراخ من صيادين او من ناس فى هذه البلد اكثر من صيادين المنزلة